ប្រជាពលរដ្ឋនាំគ្នាសម្រុកទៅ ទទួលវ៉ាក់សាំងដូសទី៣ ឬដុសជំរុញ យ៉ាងច្រើនកុះករ នៅថ្ងៃ១១តុលានេះ

ភ្នំពេញ៖ ប្រមុខរាជរដ្ឋាភិបាលបានសម្រេចអោយមាន ការបើកយុទ្ធនាការ ចាក់វ៉ាក់សាំងដូសទី៣ ឬដូសជំរុញជូនប្រជាពលរដ្ឋទូទៅឲ្យបានគ្រប់គ្នា ។យុទ្ធនាការនេះ បានចាប់ផ្ដើមពីថ្ងៃទី១១ ខែតុលាឆ្នាំ២០២១នេះតទៅ ក្រោមកិច្ចសហការ រវាងអាជ្ញាធររាជធានីភ្នំពេញ កងកម្លាំងពាក់ព័ន្ធនិងក្រុមគ្រូពេទ្យ
ក្រោយពី រាជរដ្ឋាភិបាលបានចាក់វ៉ាក់សាំង ជូនកុមារអាយុចាប់ពី៦ឆ្នាំដល់ ក្រោម១២ឆ្នាំរួចសម្រាប់ដូសទី១និងបន្តដូសទី២នៅពេលជាមួយគ្នានេះដែរ។
ជាក់ស្ដែងនៅព្រឹកថ្ងៃទី១១ ខែតុលាឆ្នាំ២០២១ នេះ នៅរាជធានីភ្នំពេញ មានប្រជាពលរដ្ឋយ៉ាងច្រើនកុះករបាននាំគ្នាសម្រុកទៅចាក់វ៉ាក់សាំង នៅតាមមណ្ឌល ឬគោលដៅដែលខ្លួនរស់នៅ ក្រោមការរៀបចំយ៉ាងហ្មត់ចត់ពីអាជ្ញាធរមូលដ្ឋាន និងក្រុមការងារស្ម័គ្រចិត្ត កងកម្លាំងនៃកងរាជ អាវុធហត្ថនិងកម្លាំងពាក់ព័ន្ធមួចចំនួនទៀត យ៉ាងយកចិត្តទុកដាក់ ក្នុងន័យរក្សាការពារ ទប់ស្កាត់ការរីករាលដាលនៃជំងឺកូវីដ-១៩ នៅក្នុងសហគមន៍។
បើតាមការ អះអាងរបស់អាជ្ញាធរមូលដ្ឋានថា៖ បើបងប្អូនប្រជាពលរដ្ឋមានការ ចូលរួមយ៉ាងសស្រាក់សស្រាំដូច្នេះ ការចាក់វ៉ាក់សាំងដូសទី៣ឬដូសជម្រុញនេះ នៅរាជធានីភ្នំពេញអាចនឹងលឿនជាងផែនការកំណត់។
សូមបញ្ជាក់ថា កាលពីពេលថ្មីនេះសម្ដេច តេជោ ហ៊ុន សែន នាយករដ្ឋមន្ត្រីនៃកម្ពុជា បានបង្ហាញពីការទន្ទឹងរង់ចាំមើលលទ្ធផល នៅក្រោយពិធីបុណ្យប្រពៃណីភ្ជុំបិណ្ឌរួចរាល់មកនេះថា តើចំនួនអ្នកឆ្លងមានការថយ ចុះកម្រិតណានោះ ប្រមុខរាជរដ្ឋាភិបាលក៏គ្រោង នឹងបើកសេដ្ឋកិច្ចសង្គមលើគ្រប់វិស័យឡើងវិញជាធម្មតា ដើម្បីឱ្យប្រទេសមានកំណើន សេដ្ឋកិច្ចឡើងវិញបន្ទាប់ពីរងផលប៉ះពាល់ ដោយជំងឺកូវីដ-១៩នេះ អស់រយៈពេលជាយូរមកនេះ៕