នគរបាលព្រហ្មទណ្ឌកំរិតស្រាល បានស្រាវជ្រាវឃាត់ខ្លួនជនសង្ស័យម្នាក់ ពាក់ព័ន្ធករណី លួចម៉ូតូ

ភ្នំពេញ៖ កម្លាំងការិយាល័យនគរបាលព្រហ្មទណ្ឌកំរិតស្រាល នៃស្នងការដ្ឋាននគរបាលរាជធានីភ្នំពេញ បានស្រាវជ្រាវឃាត់ខ្លួនជនសង្ស័យម្នាក់ ពាក់ព័ន្ធករណី លួចម៉ូតូនៅចំណុចផ្ទះជួលលេខ៥១ ផ្លូវលំ ភូមិបុរីកម្មករ សង្កាត់ទឹកថ្លា ខណ្ឌសែនសុខ រាជធានីភ្នំពេញ កាលពីថ្ងៃទី២៦ ខែតុលា ឆ្នាំ២០២១ វេលាម៉ោង១៣និង៣៥នាទី។

ប្រតិបត្តិការបានធ្វើឡើងកាលពីថ្ងៃទី០១ ខែវិច្ឆិកា ឆ្នាំ២០២១ វេលាម៉ោង១០និង៣០នាទី នៅចំណុចផ្ទះលក់ម្ជូរវត្តភ្នំ១៦៨ ផ្លូវលេខ៤៧ សង្កាត់ស្រះចក ខណ្ឌដូនពេញ រាជធានីភ្នំពេញ។

លោកវរសេនីយ៍ឯក ប៊ុន សត្យា នាយការិយាល័យនគរបាលព្រហ្មទណ្ឌកំរិតស្រាលរាជធានីភ្នំពេញ បានឲ្យដឹងថាជនសង្ស័យបានប្រព្រឹត្តលួចយកម៉ូតូម៉ាកហុងដាសេ១២៥ ពណ៌ខ្មៅ ស៊េរីឆ្នាំ២០១០ លេខតួ-លេខម៉ាស៊ីន ៨៤៧៦៦៨៨ ពាក់ផ្លាកលេខភ្នំពេញ 1AO-5406 នៅចំណុចផ្ទះជួលលេខ៥១ ផ្លូវលំ ភូមិបុរីកម្មករ សង្កាត់ទឹកថ្លា ខណ្ឌសែនសុខ រាជធានីភ្នំពេញ។

នាយការិយាល័យនគរបាលព្រហ្មទណ្ឌកំរិតស្រាលរាជធានីភ្នំពេញ បន្តថា ជនសង្ស័យឈ្មោះ សែម រដ្ឋា ហៅ វី ភេទប្រុស អាយុ២៩ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅមិនពិតប្រាកដ។

វត្ថុតាងចាប់យកៈ ម៉ូតូម៉ាកស៊ុយហ្ស៊ុយគីនិច ពណ៌ស លេខតួ-លេខម៉ាស៊ីន៣១៣២៨២ ពាក់ស្លាកលេខ ភ្នំពេញ 1CC-6667។

ជនរងគ្រោះឈ្មោះ ម៉ី ចិន្តា ភេទស្រី អាយុ៣២ឆ្នាំ ជនជាតិខ្មែរ ស្នាក់នៅផ្ទះលេខ៥១ ផ្លូវលំ ភូមិបុរីកម្មករ សង្កាត់ទឹកថ្លា ខណ្ឌសែនសុខ រាជធានីភ្នំពេញ មុខរបរលក់ដូរ។

សម្ភារបាត់បង់ៈ ម៉ូតូម៉ាកហុងដាសេ១២៥ ពណ៌ខ្មៅ ស៊េរីឆ្នាំ២០១០ លេខតួ-លេខម៉ាស៊ីន៨៤៧៦៦៨៨ ពាក់ផ្លាកលេខភ្នំពេញ 1AO-5406។

លោកវរសេនីយ៍ឯក ប៊ុន សត្យា នាយការិយាល័យនគរបាលព្រហ្មទណ្ឌកំរិតស្រាលរាជធានីភ្នំពេញ កាលពីថ្ងៃទី២៦ ខែតុលា ឆ្នាំ២០២១ វេលាម៉ោង១៣និង៣៥នាទី មានករណីអំពើលួច (លួចយកម៉ូតូម៉ាកហុងដាសេ១២៥ ពណ៌ខ្មៅ ស៊េរីឆ្នាំ២០១០ លេខតួ-លេខម៉ាស៊ីន ៨៤៧៦៦៨៨ ពាក់ផ្លាកលេខភ្នំពេញ១AO-៥៤០៦) នៅចំណុចផ្ទះជួលលេខ៥១ ផ្លូវលំ ភូមិបុរីកម្មករ សង្កាត់ទឹកថ្លា ខណ្ឌសែនសុខ រាជធានីភ្នំពេញ បង្កឡើងដោយជនសង្ស័យចំនួន០២នាក់មានឈ្មោះ ពីន ហៅ ខ្មៅ ភេទប្រុស អាយុប្រហែល២៥ឆ្នាំ ជនជាតិខ្មែរ និងឈ្មោះ សែម រដ្ឋា ហៅ វី នៅពេលជនសង្ស័យឈ្មោះ សែម រដ្ឋា ហៅ វី កំពុងដេកនៅលើបង់មុខមន្ទីរពេទ្យគន្ធបុប្ផា ហើយឈ្មោះ ពីន ហៅ ខ្មៅ បានជិះម៉ូតូម៉ាកស៊ុយហ្ស៊ុយគីនិច ពណ៌ស ពាក់ស្លាកលេខ ភ្នំពេញ ១CC-៦៦៦៧ មកជួបឈ្មោះ សែម រដ្ឋា ហៅ វី ហើយបបួលគ្នាចេញធ្វើសកម្មភាពលួច ម៉ូតូរបស់ប្រជាពលរដ្ឋក្នុង រាជធានីភ្នំពេញ ពេលជនសង្ស័យឈ្មោះ ពីន ហៅ ខ្មៅ បើកម៉ូតូឌុបឈ្មោះ សែម រដ្ឋា ហៅ វី មកដល់ចំណុចកើតហេតុខាងលើក៏បានឃើញម៉ូតូរបស់ជនរងគ្រោះម៉ាកខាងលើចតទុកនៅមុខផ្ទះកន្លែងកើតហេតុ ឃើញស្ងាត់ពុំមានមនុស្សជនសង្ស័យឈ្មោះ ពីន ហៅ ខ្មៅ ក៏ឈប់ម៉ូតូនៅចិញ្ចើមថ្នល់រួចដើរចូលទៅធ្វើសកម្មភាពលួចម៉ូតូរបស់ជនរងគ្រោះ ចំណែកឈ្មោះ សែម រដ្ឋា ហៅ វី អង្គុយលើម៉ូតូជាអ្នកមើលផ្លូវ បន្ទាប់ពីឈ្មោះ ពីន ហៅ ខ្មៅ ធ្វើសកម្មភាពលួចម៉ូតូរបស់ជនរងគ្រោះបានសម្រេចរួចហើយ ឈ្មោះ ពីន ហៅ ខ្មៅ ជិះម៉ូតូរបស់ជនរងគ្រោះគេចខ្លួន ចំណែកឈ្មោះ សែម រដ្ឋា ហៅ វី ជិះម៉ូតូរបស់ឈ្មោះ ពីន ហៅ ខ្មៅ តាមពីក្រោយគេចខ្លួនបាត់អស់ ។

បច្ចុប្បន្នជនសង្ស័យខាងលើនិងវត្ថុតាង ការិយាល័យកសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការតាមនីតិវិធី ៕