នគរបាលរាជធានីភ្នំពេញ ៖ ករណីម្ចាស់ផ្ទះចាក់សោរទ្វារ ដោយមិនបានដឹងថា មានបុគ្គលិកអនាម័យចំនួន ០២ នាក់នៅខាងក្នុង
ភ្នំពេញ ៖ ជាក់ស្តែងមិនមែនជាករណីបង្ខាំងមនុស្សខុសច្បាប់នោះទេ គឺជាករណីជម្លោះរវាងភាគីម្ចាស់ផ្ទះ ខឹងនឹងអ្នកជួលដោយមិនបានបង់ថ្លៃជួលតាមកិច្ចសន្យា ម្ចាស់ផ្ទះបានមកចាក់ចោរពីខាងក្រៅ ដោយពុំបានដឹងថាមានអ្នកអនាម័យ២នាក់នៅខាងក្នុងនោះទេ ក្រោយទទួលបានព័ត៌មាន ម្ចាស់ផ្ទះក៏បានមកចាក់បើកសោរឱ្យគាត់ចេញវិញហើយ ។
នៅថ្ងៃទី២៤ ខែវិច្ឆិកា ឆ្នាំ២០២១ វេលាម៉ោង១១និង៣០នាទី កម្លាំងអធិការដ្ឋាននគរបាលខណ្ឌបឹងកេងកង បានចុះជួយអន្តរាគមន៍ដោះស្រាយករណីចាក់សោរទ្វារផ្ទះជាប់បុគ្គលិកអនាម័យ ចំនួន០២នាក់ ដោយសារម្ចាស់ផ្ទះបានយកសោរចាក់ទ្វារពីក្រៅនៅចំណុចក្រុមហ៊ុនជេស៊ី អ៊ែរឡាញផ្ទះ លេខ២៤៧EO ផ្លូវម៉ៅសេទុងក្រុមទី៤២ ភូមិ៥ សង្កាត់ទួលស្វាយព្រៃទី១ ខណ្ឌបឹងកេងកង រាជធានីភ្នំពេញ ដោយមូលហេតុខឹង និងក្រុមហ៊ុនពុំបានបង់ប្រាក់ឈ្នួលជួលផ្ទះឲ្យ គោលបំណងមិនឲ្យក្រុមហ៊ុនយកអីវ៉ាន់ចេញ ដោយពុំដឹងថាមានបុគ្គលិកនៅក្នុងផ្ទះនោះទេ ។
ម្ចាស់ផ្ទះឈ្មោះ សុខ ហួត អាយុ៥៣ឆ្នាំ ជនជាតិខ្មែរ មុខរបរ លក់ដូរ ស្នាក់នៅផ្ទះលេខ ៦ ផ្លូវលេខ៣២៨ ភូមិ៣ សង្កាត់ទួលស្វាយព្រៃ១ ខណ្ឌបឹងកេងកង រាជធានីភ្នំពេញ ។ បុគ្គលិកអនាម័យចំនួន០២នាក់ ៖ ១- ឈ្មោះ នួន មុំ ភេទស្រី អាយុ៤០ឆ្នាំ ជនជាតិខ្មែរ មុខរបរ អនាម័យ ស្នាក់នៅផ្ទះជួលបន្ទប់លេខ២៨ ផ្លូវលេខជាតិ៥ សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ ។ ២- ឈ្មោះ លឹម សុធា ភេទស្រី អាយុ៣៩ ឆ្នាំ ជនជាតិខ្មែរ មុខរបរ អនាម័យ ស្នាក់នៅផ្ទះជួលបន្ទប់លេខ២៨ ផ្លូវលេខជាតិ៥ សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ ៕
