រថយន្តក្រុងទេសចរណ៍មកពីប្រទេស North Macedonia បានឆាបឆេះ ស្លាប់ចំនួន ៤៥នាក់
Reuters - កាលពីថ្ងៃអង្គារ រថយន្តក្រុងទេសចរណ៍មកពីប្រទេស North Macedonia បានឆាបឆេះនៅលើផ្លូវល្បឿនលឿនមួយនៅភាគខាងលិចប្រទេស Bulgaria មុនពេលថ្ងៃរះ ដោយបានសម្លាប់មនុស្សយ៉ាងហោចណាស់ចំនួន ៤៥នាក់ ដែលក្នុងនោះមានកុមារចំនួន ១២នាក់។
អាជ្ញាធរបាននិយាយថា មូលហេតុនៃគ្រោះថ្នាក់នេះមិនទាន់ដឹងច្បាស់នៅឡើយទេ ប៉ុន្តែប្រហែលជារថយន្តក្រុងនោះបានបុករបាំងថ្មើរជើងមុន ឬក្រោយពេលឆេះ។
បុគ្គលិកមន្ទីរពេទ្យបាននិយាយថា មនុស្សចំនួន ០៧នាក់ ដែលបានលោតពីលើរថយន្តក្រុងដែលកំពុងឆេះនោះ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ Pirogov ក្នុងរដ្ឋធានី Sofia ប្រទេស Bulgaria ហើយស្ថិតក្នុងស្ថានភាពនឹងនរ។ ពួកគេមានរបួសរលាក និងម្នាក់ទៀតរបួសជើង។
ក្រសួងមហាផ្ទៃប្រទេស Bulgaria បាននិយាយថា មនុស្ស ៤៥នាក់បានស្លាប់ ដែលនេះក្លាយជាឧបទ្ទវហេតុរថយន្តក្រុងដ៏សាហាវបំផុតក្នុងប្រវត្តិសាស្ត្ររបស់ប្រទេសក្នុងតំបន់ Balkan ។
រដ្ឋមន្ត្រីក្រសួងមហាផ្ទៃលោក Boyko Rashkov បាននិយាយថា សាកសពត្រូវបាន “ផ្តុំគ្នានៅខាងក្នុង ហើយត្រូវបានឆេះក្លាយជាផេះ” ។
លោកបានប្រាប់អ្នកយកព័ត៌មាននៅកន្លែងកើតហេតុថា “រូបភាពនេះគួរឲ្យខ្លាច ពិតជាគួរឲ្យភ័យខ្លាច។ ខ្ញុំមិនដែលឃើញពីមុនទេ” ។
ឧបទ្ទវហេតុនេះបានកើតឡើងនៅលើផ្លូវល្បឿនលឿន Struma ដែលមានចម្ងាយប្រហែល ៣០គីឡូម៉ែត្រ ខាងលិចទីក្រុង Sofia នៅវេលាប្រហែលម៉ោង ពីរទៀបភ្លឺ ៕
