អភិបាលខេត្តកំពង់ចាម និងលោកស្រីនាំយកអំណោយ ចែកជូនពលរដ្ឋរងគ្រោះដោយទឹកជំនន់ ជិត១ពាន់គ្រួសារ នៅស្រុកស្ទឹងត្រង់
កំពង់ចាម៖ អភិបាល នៃគណៈអភិបាលខេត្តកំពង់ចាម លោក គួច ចំរើន និងលោកស្រី នៅព្រឹកថ្ងៃទី០៥ កញ្ញានេះបានអញ្ជើញជួបសំណេះសំណាល សាកសួរសុខទុក្ខ និងនាំយកអំណោយមនុស្សធម៌កាកបាទក្រហមកម្ពុជា ទៅចែកជូនដល់បងប្អូនប្រជាពលរដ្ឋ ដែលរងគ្រោះដោយទឹកជំនន់ទន្លេមេគង្គ ប្រមាណ៨១៩គ្រួសារ នៅឃុំព្រែកកក់ និងឃុំព្រែកបាក់ ស្រុកស្ទឹងត្រង់ ខេត្តកំពង់ចាម ដោយមានការចូលរួមជួយឧបត្ថម្ភ ពីអង្គការមូលនិធិពុទ្ធសាសនា ឆឺ ជី និងជួយសម្របសម្រួលពីសមាគមគ្រូពេទ្យស្ម័គ្រចិត្តសម្តេចតេជោ(TYDA) រួមជាមួយសហភាពសហព័ន្ធយុវជនកម្ពុជា (ស.ស.យ.ក)។
លោក គួច ចំរើន ក្នុងឱកាសនោះ បានពាំនាំមកនូវការផ្តាំផ្ញើសាកសួរសុខទុក្ខ ពីសំណាក់ពីសំណាក់សម្ដេចអគ្គមហាសេនបតីតេជោ ហ៊ុន សែន នាយករដ្ឋមន្ត្រី និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនចំពោះប្រជាពលរដ្ឋរងគ្រោះដោយទឹកជំនន់ទាំងអស់ ដែលជានិច្ចកាលសម្តេចតែងតែយកចិត្តទុកដាក់ ចំពោះសុខទុក្ខរបស់បងប្អូនប្រជាពលរដ្ឋ ដោយមិនប្រកាន់ពីនិន្នាការនយោបាយអ្វីឡើយ។
ជាមួយគ្នានេះ លោកអភិបាលខេត្ត បានស្នើដល់ប្រជាពលរដ្ឋទាំងអស់ ត្រូវមានការប្រុងប្រយ័ត្ន ចំពោះហេតុការណ៍ចៃដន្យណាមួយ ដែលបណ្តាលឲ្យប៉ះពាល់ដល់អាយុជីវិត ពិសេស ត្រូវប្រុងប្រយ័ត្នខ្ពស់ចំពោះ កុមារ ជនពិការ និងចាស់ជរា។
លោកអភិបាលខេត្ត ក៏សូមឲ្យប្រុងប្រយ័ត្ន ចំពោះសត្វពស់ និងសត្វអាសិរពិសនានាចឹក ព្រោះថាក្នុងកំឡុងពេលទឹកឡើងនេះ គឺមានមនុស្សចំនួន៧៧នាក់ហើយ ដែលត្រូវពស់ចឹក និងសត្វអាសិរពិសទិចឬខាំ ប៉ុន្តែត្រូវបានព្យាបាលទាន់ពេលវេលា។ លោក គួច ចំរើន បានសង្កត់ធ្ងន់ថា បើក្នុងករណីមានសត្វអសិរពិសចឹក សូមបញ្ជូនជនរងគ្រោះជាបន្ទាន់ទៅកាន់មន្ទីរពេទ្យបង្អែក មណ្ឌលសុខភាព ឬប៉ុស្តិ៍សុខភាពដែលនៅជិតបំផុត ព្រោះមានក្រុមគ្រូពេទ្យ និងឱសថគ្រប់គ្រាន់សម្រាប់ព្យាបាលភ្លាមៗ ចៀសវាងមានគ្រោះថ្នាក់ដល់អាយុជីវិត។
លោកអភិបាលខេត្ត ក៏សូមឲ្យយប្រជាពលរដ្ឋដែររងគ្រោះទាំងអស់ យកចិត្តទុកដាក់ពីអនាម័យ ទាំងអំឡុងពេលទឹកជំនន់ និងពេកស្រកទៅវិញ គឺត្រូវសម្អាតកន្លែងស្នាក់នៅឲ្យបានស្អាតត្រឹមត្រូវ និងត្រូវពិសារទឹកដាំអោយឆ្អិនល្អ។ ហើយក៏ត្រូវត្រៀមនូវពូជធារ ដោយសហការជាមួយស្ថាប័នជំនាញ ដើម្បី ស្ដារលទ្ធភាពកសិកម្ម ឡើងវិញ។
គួរបញ្ជាក់ផងដែរថា អំណោយដែលត្រូវចែកជូនដល់ប្រជាពលរដ្ឋរងគ្រោះដោយទឹកជំនន់នេះ គឺមានចំនួន២ឃុំ រួមមាន ឃុំព្រែកកក់ សរុបចំនួន៤៦០គ្រួសារ និងឃុំព្រែកបាក់សរុប ចំនួន៣៩០គ្រួសារ ក្នុងមួយគ្រួសារៗទទួលបាន មីមួយកេស អង្ករ៤០គីឡូ និងនំប័ង២ដើមផងដែរ៕
