ផ្ទុះភ្នំភ្លើង Semeru បណ្តាលឲ្យមនុស្សចំនួន ១៤នាក់បានស្លាប់ និងមនុស្សរាប់សិបនាក់ផ្សេងទៀតបានរងរបួសនៅប្រទេសឥណ្ឌូនេស៊ី
ឥណ្ឌូណេស៊ី ៖ កាលពីថ្ងៃអាទិត្យ ទីភ្នាក់ងារគ្រប់គ្រងគ្រោះមហន្តរាយ របស់ឥណ្ឌូណេស៊ីបាននិយាយថា ភ្នំភ្លើង Semeru បានផ្ទុះបណ្តាលឲ្យមនុស្សយ៉ាងហោចណាស់ ១៤នាក់បានស្លាប់ និងមនុស្សរាប់សិបនាក់ផ្សេងទៀតបានរងរបួសនៅលើកោះ Java ខណៈដែលក្រុមជួយសង្គ្រោះបានស្វែងរកជនរងគ្រោះនៅក្រោមគំនរផេះ និងពេលខ្លះត្រូវកាយរកដោយដៃទទេ។
កាលពីថ្ងៃសៅរ៍ ភ្នំ Semeru ដែលជាភ្នំខ្ពស់ជាងគេនៅលើកោះ Java បានផ្ទុះកម្អែលភ្នំភ្លើង និងកម្តៅដ៏ខ្លាំង ដែលធ្វើឲ្យភូមិមួយចំនួនដែលស្ថិតក្បែរនោះក្នុងខេត្ត East Java ត្រូវគ្របដណ្តប់ដោយ ពពកខ្មៅ និងបានធ្វើឲ្យមនុស្សជាច្រើននាក់ភៀសខ្លួនដោយការភ័យស្លន់ស្លោ។
អាជ្ញាធរបាននិយាយថា ការផ្ទុះនេះបានបំផ្លាញអគារជាច្រើន និងបានកាត់ផ្តាច់ស្ពានយុទ្ធសាស្ត្រដែល តភ្ជាប់តំបន់ពីរនៅក្នុងសង្កាត់ Lumajang ដែលនៅក្បែរនោះជាមួយទីក្រុង Malang។
កាលពីល្ងាចថ្ងៃអាទិត្យ នៅក្នុងសន្និសីទសារព័ត៌មានមួយ មន្ត្រីរបស់ក្រុមប្រឹក្សាជាតិឥណ្ឌូនេស៊ីសម្រាប់គ្រប់គ្រងគ្រោះមហន្តរាយ (BNPB) បាននិយាយថា ក្នុងចំណោមមនុស្សចំនួន ១៤នាក់ បានស្លាប់ មានចំនួន ០៩នាក់ត្រូវបានស្គាល់អត្តសញ្ញាណ ហើយមានមនុស្សចំនួន ៥៦នាក់ ផ្សេងទៀតបានរងរបួស ដែលភាគច្រើនដោយសារការរលាកភ្លើង។
ក្រុមប្រឹក្សាជាតិឥណ្ឌូនេស៊ីសម្រាប់ការគ្រប់គ្រងគ្រោះមហន្តរាយ (BNPB) បាននិយាយថា មនុស្សប្រមាណ ១៣០០នាក់ ត្រូវបានជម្លៀសចេញ ខណៈដែលមនុស្សចំនួន ០៩នាក់ ផ្សេងទៀតបានបាត់ខ្លួន។
លោក Taufiq Ismail Marzuqi ដែលជាអ្នកស្រុករស់នៅក្នុងសង្កាត់ Lumajang ដែលបានស្ម័គ្រចិត្តចូលរួមក្នុងការសង្គ្រោះ ដោយប្រាប់សារព័ត៌រ៉យទ័រថា ការខិតខំប្រឹងប្រែងជួយសង្គ្រោះគឺ “ពិបាកខ្លាំងណាស់” ដោយសារតែស្ពានត្រូវបានខូចខាតយ៉ាងដំណំ និងអ្នកស្ម័គ្រចិត្តខ្វះបទពិសោធន៍ ៕
