តារាចម្រៀង កញ្ញា ស៊ូ ដាណេ បើកហាងថ្មីភ្លែត ក្រោយពីភ្ជាប់រួច

ភ្នំពេញ៖ ជាតារាចម្រៀងមនោសញ្ចេតនាកញ្ញាស៊ូ ដាណេ បានភ្ជាប់ពាក្យស្ងាត់ៗ កាលពីសប្តាហ៍មុនជាមួយបុរសអាណិក ជនខ្មែរអាមេរិកកាំងម្នាក់ ។ ភ្ជាប់ពាក្យមិនបានប៉ុន្មានថ្ងៃផងស្រាប់តែតារាស្រីពហុជំនាញរូបនេះប្រកាសបើកដំណើរ ការហាងកាហ្វេ និងផឹកស៊ីមួយកន្លែងភ្លាមៗផងដែរ ។ ការប្រកាសបើកហាងយីហោធម្មជាតិកាហ្វេ ជាផ្លូវការរបស់នាងធ្វើឡើងកាលពី រាត្រីថ្ងៃទី៥ ខែកញ្ញានេះនៅទីតាំងមួយកន្លែងដែលហាង តាមបណ្តោយផ្លូវត្រសក់ផ្អែមជិតកន្លែងលក់ដូង ។ តារាស្រីរូបនេះបញ្ជាក់ថា តាមពិតហាងនាងបើកដំណើរកាលកាលពីចុងខែសីហា កន្លងទៅមកម្ល៉េះទើបតែថ្ងៃនេះមាន ឱកាសបើកសម្ពោធជាផ្លូវការដោយមានវត្តមាន មានសិល្បករជិតដិតមួយចំនួនប៉ុណ្ណោះចូលរួម ។ នាងបញ្ជាក់ថា ហាងនេះនាងមានភាគហ៊ុនផ្ទាល់ រួមជាមួយមិត្តភ័ក្កិនាងម្នាក់ ។ នាងបន្តថានាងស្រឡាញ់អាជីពថ្មីនេះ យូរមកហើយដោយគិតថាថ្ងៃណាមានឱកាស និងបង្កើតមុខរបរបើកហាងហូបចុកមានស្រាខ្លះៗកំដរ និងតន្ត្រីកម្សាន្ត ។

កញ្ញាតារាចម្រៀងរូបនេះបានបន្ដថា៖ ដោយសារតែនាងមានរូបភាពថ្មីៗចូលព្រមគ្នាទើបភ្ជាប់ពាក្យ និងបើកហាងរកស៊ីបែបនេះទើបគិតក្នុងចិត្តរួចជាស្រេច ដោយពិភាក្សាជាមួយអនាគតស្វាមីពន្យារ​ពេលរៀបការមិនឆាប់ឡើយគឺពង្រឹងកន្លែងរកស៊ីសិន ។ នាងគ្រោងចូលរោងការនៅអំឡុង ខែកក្កដាឆ្នាំ២០១៩ ដែលជាពេលវេលាយូរគួរសមហើយមិនរំពឹងថាយើង ទាំងពីរមានបញ្ហាអ្វីឡើយក្នុងពេលអារម្មណ៍​យល់ចិត្តគ្នាកាន់តែមានការយល់ជ្រៅធ្វើអ្វីៗសុទ្ឋតែកើតចេញពីការសម្រេចចិត្តដូចគ្នា កញ្ញាស៊ូ ដាណេ ឈ្មោះពិតឆោម ច័ន្ទណេតបើទោះជារៀបការហើយចេញទៅ​សាងជីវិតថ្មីជាមួយស្វាមីបណ្តូលចិត្តក៏តារារូបនេះ​គ្រោងមករស់នៅក្នុងស្រុកវិញ​ជាមួយការបង្កើតមុខជំនួញដែលចូលចិត្ត ។ តារារូបនេះត្រូវបានមហាជន និងអ្នកសិល្បៈសរសើរថា ជាតារាមានជំនាញសិល្បៈច្រើន​​ក្រៅពីមានសំឡេងច្រៀងស្រដៀងអ្នកស្រីប៉ែន រ៉ន ក៍ចេះខាងរាំរបាំបុរាណ ប្រពៃណី ចម្រៀងយីកេ មហោរី និងស្មូត្រជាដើមធ្វើឲនាងឧស្សាហ៍ឆក់ឱកាស​ ទៅសម្តែងនៅក្រៅប្រទេសជាហូរហែរ ៕