ចុះហត្ថលេខាលើអនុស្សរណៈ នៃការយោគយល់គ្នារវាង វិទ្យាស្ថានជាតិវិទ្យាសាស្រ្ត បច្ចេកវិទ្យា និងនវានុវត្តន៍ នៃក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ និងសាកលវិទ្យាល័យអន្តរជាតិផារ៉ាហ្គន
ភ្នំពេញ៖ ថ្ងៃទី៩ ខែធ្នូ ឆ្នាំ២០២១ នាវេលាម៉ោង ៣:០០ នាទីរសៀល ក្រសួងឧស្សាហកម្មវិទ្យាសាស្រ្ត បច្ចេកវិទ្យា និងនវានុវត្តន៍ បានរៀបចំពិធីចុះហត្ថលេខាលើអនុស្សរណៈនៃការយោគយល់គ្នា រវាងវិទ្យាស្ថានជាតិវិទ្យាសាស្រ្ត បច្ចេកវិទ្យា និងនវានុវត្តន៍ និងសាកលវិទ្យាល័យអន្តរជាតិផារ៉ាហ្គន។ ពិធីចុះហត្ថលេខានេះ ត្រូវបានប្រព្រឹត្តទៅតាមប្រព័ន្ធអនឡាញ ក្រោមអធិបតីភាពដ៏ខ្ពង់ខ្ពស់របស់ ឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្រ្តីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ព្រមទាំងមានការអញ្ជើញចូលរួម ពីសំណាក់ថ្នាក់ដឹកនាំ និងមន្រ្តីជាន់ខ្ពស់នៃស្ថាប័នទាំងពីរផងដែរ។
កិច្ចសហការណ៍របស់ស្ថាប័នទាំងពីរ គឺជាគោលដៅអាទិភាព របស់រដ្ឋាភិបាល ដើម្បីសម្រេចបានចក្ខុវិស័យអភិវឌ្ឍសេដ្ឋកិច្ចជាតិឆ្នាំ ២០៣០-២០៥០ តាមរយ:ការពង្រឹងវិស័យវិទ្យាសាស្រ្ត បច្ចេកវិទ្យា និងនវានុវត្តន៍ ដែលក្នុងនោះ ក្រសួងឧស្សាហកម្មវិទ្យាសាស្រ្ត បច្ចេកវិទ្យា និងនវានុវត្តន៍ មានភារ:កិច្ច និងតួនាទីធំទូលាយក្នុងការសម្របសម្រួលដ៏ចាំបាច់ ក្រោមការដឹកនាំរបស់ ឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្រ្តីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍។
មតិស្វាគមន៍ និងចំណាប់អារម្មណ៍របស់ថ្នាក់ដឹកនាំនៃស្ថាប័នទាំងពីរ បានបង្ហាញការសាទរយ៉ាងពេញទំហឹង លើការចុះអនុស្សរណៈនៃការយោគយល់គ្នានេះ និងមានជំនឿថាកិច្ចសហការណ៍នេះ នឹងរួមចំណែកក្នុងការជំរុញការរៀបចំវេទិកាវិទ្យាសាស្រ្ត អភិវឌ្ឍសមត្ថភាពបុគ្គលិក លើកតម្កើងគុណតម្លៃ នៃវិទ្យាសាស្រ្ត បច្ចេកវិទ្យា និងនវានុវត្តន៍ ដើម្បីធានាបានការអភិវឌ្ឍប្រកបដោយចីរភាពរបស់ប្រទេសកម្ពុជា។
ឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី ព្រមទាំងថ្នាក់ដឹកនាំ និងមន្រ្តីជាន់ខ្ពស់ នៃស្ថាប័នទាំងពីរ បានអញ្ជើញធ្វើជាសាក្សី ក្នុងពិធីចុះហត្ថលេខា លើអនុស្សរណៈ នៃការយោគយល់គ្នារវាង ឯកឧត្តម បណ្ឌិត គួក ហ្វីដេរ៉ូ អគ្គនាយក នៃវិទ្យាស្ថានជាតិវិទ្យាសាស្រ្ត បច្ចេកវិទ្យា និងនវានុវត្តន៍ និង លោកបណ្ឌិត ដេត សុខឧត្តម សាកលវិទ្យាធិការ នៃសាកលវិទ្យាល័យអន្តរជាតិផារ៉ាហ្គន។
ក្នុងគោលបំណងរួមគ្នា ដើម្បីបណ្ដុះបណ្ដាល និងអភិវឌ្ឍសមត្ថភាពបុគ្គលិក និងការស្រាវជ្រាវអនុវត្ត ការអភិវឌ្ឍ ដើម្បីលើកកម្ពស់ដល់វិទ្យាសាស្រ្ត បច្ចេកវិទ្យា នវានុវត្តន៍ និងពត៌មានវិទ្យា នៅក្នុងប្រទេសកម្ពុជា ភាគីទាំងពីរ នឹងធានាកិច្ចសហប្រតិបត្តិការដោយឈរលើគោលការណ៍អត្ថប្រយោជន៍ទៅវិញទៅមកលើចំណុចអាទិភាពរួមគ្នាមួយចំនួនដូចតទៅ ៖
–
– ការស្រាវជ្រាវអនុវត្ត និងការអភិវឌ្ឍ
– ការជំរុញលើកកម្ពស់វិស័យវិទ្យាសាស្រ្ត បច្ចេកវិទ្យា នវានុវត្តន៍ និងពត៌មានវិទ្យា
– ការបណ្ដុះបណ្ដាល និងការសិក្សាអំពីវិទ្យាសាស្រ្ត បច្ចេកវិទ្យា នវានុវត្តន៍ និងពត៌មានវិទ្យា
– ការអភិវឌ្ឍសមត្ថភាព ការបណ្ដុះបណ្ដាល និងការអភិវឌ្ឍជំនាញបុគ្គលិករួមគ្នា
– ការអនុវត្តចំណុចសកម្មភាពផ្សេងៗទៀត ដែលទទួលបានការឯកភាពដោយគូភាគី។
អនុស្សរណៈនៃការយោគយល់គ្នារវាងវិទ្យាស្ថានជាតិវិទ្យាសាស្រ្ត បច្ចេកវិទ្យា និងនវានុវត្តន៍ នៃក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ និងសាកលវិទ្យាល័យអន្តរជាតិផារ៉ាហ្គន នឹងចូលរួមសំរេចបានទិសដៅរួមគ្នាក្នុងការជំរុញវេទិកាវិទ្យាសាស្រ្ត និងការបណ្ដុះបណ្ដាល ធនធានមនុស្សនៅក្នុងប្រទេសកម្ពុជា។
