ជនបែកថ្នាំញៀន លួចបើករថយន្តរត់គេច ត្រូវសមត្ថកិច្ចស្ទាក់ចាប់ខ្លួន ក្រោយពេលម្ចាស់រថយន្តចតភ្លេចដកសោរ
បាត់ដំបង៖ កម្លាំងនគរបាលការិយាល័យព្រហ្មទណ្ឌកំរិតស្រាល សហការជាមួយការិយាល័យនគរបាលព្រហ្មទណ្ឌកំរិតធ្ងន់ បានចុះប្រតិបត្តិការបង្ក្រាបករណីលួច (រថយន្ត) ០១ករណី នៅថ្ងៃ១៥ ខែធ្នូ ឆ្នាំ២០២១ វេលាម៉ោង២០និង៤០នាទី ត្រង់ចំណុចភូមិពុកឆ្មា ឃុំអន្លង់វិល ស្រុកសង្កែ ខេត្តបាត់ដំបង ។
សមត្ថកិច្ចបានឃាត់ខ្លួនជនសង្ស័យឈ្មោះ អឿន សារិត ភេទប្រុស អាយុ ២២ឆ្នាំ មានទីលំនៅភូមិព្រៃដំរី ឃុំព្រៃតូច ស្រុកមោងឫស្សី ខេត្តបាត់ដំបង យកមកស្នងការដ្ឋាននគរបាលខេត្តបាត់ដំបង ដើម្បីធ្វើការសាកសួរ ។ សមត្ថកិច្ចបានធ្វើការដកហូតរថយន្ត ០១គ្រឿង ម៉ាកហ៊ីយ៉ុនដាយ Hyundai ធុនធំ ពណ៌ស-លឿង ស៊េរីឆ្នាំ២០០២ ពាក់ស្លាកលេខ ភ្នំពេញ 3F-1578 ។
សូមជម្រាបជូនថា ជនសង្ស័យខាងលើបានធ្វើសកម្មភាព ឡើងបើករថយន្តខាងលើ ដែលទុកនៅកន្លែងលើកស្រូវ ដោយមានសោរនៅទីនោះស្រាប់ទើបបើកមកតែម្ដង ព្រោះជនសង្ស័យជាមនុស្សបែកថ្នាំញៀន និងរវើរវាយ បានលួចយករថយន្តរបស់ជនរងគ្រោះ១នាក់ឈ្មោះ ទូច ដារ៉ា ភេទប្រុស អាយុ ២២ឆ្នាំ មានទីលំនៅភូមិពោធិ៍ស្វាយមីង ឃុំអំពិលតាពត ស្រុកអូររាំងឪ ខេត្តកំពង់ចាម ជិះមកក្រុងបាត់ដំបង។
ករណីនេះ ដោយអនុវត្តតាមយោបល់ដឹកនាំរបស់លោកឧត្ដមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង រួមនឹងយោបល់លោកវរសេនីយ៍ឯក លឹម ពុទ្ធីឡា ស្នងការរងផែនការងារនគរបាលព្រហ្មទណ្ឌ និងដោយមានការសម្របសម្រួលលើនីតិវិធីពីឯកឧត្តម កែវ សុជាតិ ព្រះរាជវអាជ្ញានៃអយ្យការអមសាលាដំបូងខេត្តបាត់ដំបង ផងនោះ លោកវរសេនីយ៍ឯក ឈឿង គឹមសុង នាយការិយាល័យនគរបាលព្រហ្មទណ្ឌកម្រិតស្រាល បានកសាងសំណុំរឿងបញ្ជូនជនសង្ស័យខាងលើទៅសាលាដំបូងខេត្តដើម្បីចាត់ការបន្តតាមនីតិវិធី។ ចំណែករថយន្តសមត្ថកិច្ចបានប្រគល់ជូនទៅម្ចាស់វិញ ៕
