កម្លាំងនគរបាលព្រហុ្មទណ្ឌ បង្ក្រាប ករណី ប៉ុនប៉ងមនុស្សឃាត ,កាន់កាប់ រក្សាទុក ប្រើប្រាស់អាវុធដោយខុសច្បាប់ និងប៉ុនប៉ងចាប់ជំរិត ឃាត់ខ្លួនជនជាតិចិន២នាក់
ព្រះសីហនុ ៖ ជនសង្ស័យជាជនជាតិចិនចំនួន២នាក់ ត្រូវបានសមត្ថកិច្ចនគរបាលព្រហ្មទណ្ឌកំរិតស្រាល នៃស្នងការដ្ឋាននគរបាលខេត្តព្រះសីហនុ ធ្វើការស្រាវជ្រាវឃាត់ខ្លួន ពាក់ព័ន្ធករណីប៉ុនប៉ងមនុស្សឃាត ,កាន់កាប់រក្សាទុក ប្រើប្រាស់អាវុធដោយខុសច្បាប់ និងប៉ុនប៉ងចាប់ជំរិត ។
សមត្ថកិច្ចបានឲ្យដឹងថា នៅថ្ងៃទី២៣ ខែធ្នូ ឆ្នាំ២០២១ វេលាម៉ោង១៣និង២០នាទី មានជនសង្ស័យ ០២នាក់ ជាជនជាតិចិន ភេទប្រុស ១-ឈ្មោះ JIANG FENG ,២-ឈ្មោះ BAO JIE បានទៅជួបអ្នកគ្រប់គ្រងសណ្ឋាគារ និងកាស៊ីណូខ្សាច់មាស ស្ថិតនៅ ភូមិ៤ សង្កាត់៤ ក្រុង-ខេត្តព្រះសីហនុ ។ ពេលទៅដល់ជនសង្ស័យទាំង ០២នាក់ សុំចូលធ្វើការនៅសណ្ឋាគារ និងកាស៊ីណូខ្សាច់មាស ដោយពួកគេ បានសុំខ្ចីលុយពីអ្នកគ្រប់គ្រង ក្នុងម្នាក់ ១៨,០០០$ (មួយម៉ឺនប្រាំបីពាន់)ដុល្លារអាមេរិក សរុបចំនួន ៣៦,០០០ (បីម៉ឺនប្រាំមួយពាន់)ដុល្លារអាមេរិក ។
សមត្ថកិច្ចបន្តថា លុះក្រោយពេលអ្នកគ្រប់គ្រងសណ្ឋាគារ និងកាស៊ីណូ ខ្សាច់មាស បានវេរលុយឲ្យជនសង្ស័យទាំង០២នាក់រួចមក ស្រាប់តែជនសង្ស័យទាំង ០២នាក់ ព្យាយាមចាប់ខ្លួនអ្នកគ្រប់គ្រងរូបនោះ ដោយជនសង្ស័យឈ្មោះ JIANG FENG យកកាំភ្លើងខ្លីភ្ជង់ក្បាលពោះជនរងគ្រោះ ។ រីឯជនសង្ស័យឈ្មោះ BAO JIE ចាប់ក្រៀកក ខណៈនោះក៏ត្រូវបានសន្តិសុខ និងបុគ្គលិកសណ្ឋាគារ និងកាស៊ីណូ វិមានខ្សាច់មាសឃើញ ក៏បានចូលទៅប្រតាយប្រតប់ជាមួយជនសង្ស័យទាំង ០២នាក់ ។ ដោយឃើញសភាពការណ៍មិនសូវស្រួល ជនសង្ស័យឈ្មោះ JIANG FENG បានទាញកាំភ្លើងខ្លីបាញ់សំដៅទៅសន្តិសុខ និងបុគ្គលិក ០១គ្រាប់ បណ្តាលឲ្យត្រូវសន្តិសុខជនជាតិចិនម្នាក់ រងរបួសត្រង់ក្បាលពោះ បៀមគ្រាប់ជាប់ខាងក្នុង បន្ទាប់មកជនសង្ស័យទាំង ០២នាក់ បាននាំគ្នារត់គេចខ្លួនបាត់អស់ ។
បន្ទាប់ពីទទួលបានព័ត៌មាននេះភ្លាម កម្លាំងជំនាញផែនការងារនគរបាលព្រហ្មទណ្ឌ បានសហការជាមួយកម្លាំងអធិការដ្ឋាននគរបាលក្រុងព្រះសីហនុ កម្លាំងអន្តរាគមន៍ពិសេស ចុះទៅដល់កន្លែងកើតហេតុ ធ្វើការស្រាវជ្រាវយ៉ាងយកចិត្តទុកដាក់ រហូតដល់វេលាម៉ោង១៤និង៣០នាទី ទើបឃាត់ខ្លួនបានជនសង្ស័យ ០១នាក់ ឈ្មោះ BAO JIE រីឯជនសង្ស័យ ០១នាក់ទៀត ឈ្មោះ JIANG FENG ជាជនដៃដល់ បានរត់គេចខ្លួន ដោយយកកាំភ្លើងខ្លីទៅជាមួយ ។
បន្ទាប់មក កម្លាំងជំនាញផែនការងារនគរបាលព្រហ្មទណ្ឌ បានសហការជាមួយកម្លាំងអធិការដ្ឋាននគរបាលក្រុងព្រះសីហនុ និងកម្លាំងអធិការដ្ឋាននគរបាលស្រុកព្រៃនប់ បន្តការស្រាវជ្រាវយ៉ាងយកចិត្តទុកដាក់ ដើម្បីតាមចាប់ខ្លួនជនសង្ស័យឈ្មោះ JIANG FENG ។ រហូតដល់ថ្ងៃទី ២៤ ខែធ្នូ ឆ្នាំ២០២១ វេលម៉ោង១៦និង៣០នាទី ទើបចាប់ឃាត់ខ្លួនបានជនសង្ស័យឈ្មោះ JIANG FENG ដែលកំពុងសង្ងំលាក់ខ្លួននៅនៅក្នុងសណ្ឋាគារមួយកន្លែង ស្ថិតនៅភូមិអ៊ុង ឃុំរាម ស្រុកព្រៃនប់ ខេត្តព្រះសីហនុ ព្រមទាំងដកហូតបានវត្ថុតាងកាំភ្លើងខ្លី ០១ដើម ដែលជនសង្ស័យយកទៅលាក់ទុកនៅបន្ទប់ជួលមួយកន្លែងម្តុំ អ៊ិលវីចាស់ ។
ជនរងគ្រោះដែលត្រូវបានជនសង្ស័យ ប៉ុនប៉ងចាប់ជំរិត មានឈ្មោះ WANG BING JIE ភេទប្រុស អាយុ២៥ឆ្នាំ ជនជាតិចិន មុខរបរ អ្នកគ្រប់គ្រងសណ្ឋាគារ និងកាស៊ីណូ វិមានខ្សាច់មាស មានទីលំនៅ ភូមិ៤ សង្កាត់៤ ក្រុង-ខេត្តព្រះសីហនុ ។ ជនរងគ្រោះ រងរបួសដោយត្រូវគ្រាប់កាំភ្លើង ០១គ្រាប់ មានឈ្មោះ ZHANG SHUANG ភេទប្រុស អាយុ ៣៣ឆ្នាំ ជនជាតិចិន មុខរបរ សន្តិសុខសណ្ឋាគារ និងកាស៊ីណូ វិមានខ្សាច់មាស មានទីលំនៅ ភូមិ៤ សង្កាត់៤ ក្រុង-ខេត្តព្រះសីហនុ ។
វត្ថុតាងចាប់យកបាន ៖ -កាំភ្លើងខ្លី ០១ដើម ម៉ាក ZORAKI M906-TD ពណ៌ទឹកប្រាក់-ខ្មៅ មានលេខសម្គាល់ៈ 000168, -បង់កាំភ្លើង ០១ មាន ០៥គ្រាប់,-បំពង់ផ្ទប់សម្លេង (ស៊ីឡង់) ០១ ពណ៌ខ្មៅ, -ខ្នោះដៃ ០២គូ, -ពិលឆក់ ០១គ្រឿង និង -ស្កុត ០១ដុំ ។
ចំពោះជនសង្ស័យខាងលើ កម្លាំងការិយាល័យនគរបាលព្រហ្មទណ្ឌកម្រិតស្រាល កសាងសំណុំរឿងបញ្ជូនទៅសាលាដំបូងខេត្តព្រះសីហនុ ដើម្បីផ្ដន្ទាទោសតាមច្បាប់ ៕