ឆ្លងចរន្តអគ្គិសនី បណ្តាលឲ្យឆាបឆេះ ផ្ទះអស់៥ខ្នង

ភ្នំពេញ៖ នាវេលាម៉ោង ២០និង១៥នាទី យប់ថ្ងៃទី២៨ ខែធ្នូ ឆ្នាំ២០២១ មានករណីគ្រោះអគ្គិភ័យមួយ បានកើតឡើងដោយសារឆ្លងចរន្តអគ្គិសនី ហេតុការណ៍នេះស្ថិត នៅតាមបណ្តោយផ្លូវលំ ភូមិដេីមចាន់ សង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញ។

លោក ញាណ ចាន់សោភា នាយករដ្ឋបាលខណ្ឌច្បារអំពៅ បានប្រាប់ឲ្យដឹងថា ទីតាំងខាងលេី មានឈ្មោះ ស៊ុក គ្រៀវ ភេទស្រី អាយុ ៤៦ឆ្នាំ មុខរបរ លក់កាហ្វេ ហេីយចំពោះមូលហេតុ នៃការឆាបឆេះ បណ្តាលមកពីការ ឆ្លងចរន្តអគ្គីសនី។ ក្នុងហេតុការណ៍ គ្រោះអគ្គិភ័យខាងលេីនេះ បណ្តាលឲ្យឆាបឆេះផ្ទះឈេីប្រក់ស័ង្កសី ទំហំ ២ម៉ែត្រ x ៣ម៉ែត្រ ចំនួន ៥ខ្នង អស់ទាំងស្រុង និងពុំបណ្តាលឲ្យរាលដាល ដល់ផ្ទះក្បែរខាងឡេីយ។

លោក ញាណ ចាន់សោភា នាយករដ្ឋបាលខណ្ឌច្បារអំពៅ ដែលបានចុះអន្តរាគមន៍ផ្ទាល់ បានអោយដឹងថា សម្រាប់ប្រតិបត្តិការសង្គ្រោះវិញ កម្លាំងជំនាញបានប្រើប្រាស់ រថយន្ដការិយាល័យបង្ការ និងពន្លត់អគ្គិភ័យ ចំនួន ៦គ្រឿង ប្រើប្រាស់ទឹកអស់ ៣ឡាន ស្មើរនឹង ១២ម៉ែត្រគូប និងរថយន្តជំនួយពន្លត់អគ្គិភ័យ របស់ក្រសួងមហាផ្ទៃ ចំនួន ៤គ្រឿង ពុំប្រើប្រាស់ទឹក និងរថយន្តពន្លត់អគ្គិភ័យ របស់សាលាខណ្ឌច្បារអំពៅ ចំនួន ១គ្រឿង ប្រេីប្រាស់ទឹកអស់ ១ឡាន ស្មេីនឹង ៦ម៉ែត្រគូប ទើបរលត់ទាំងស្រុង នៅវេលាម៉ោង ២១និង៤៥នាទីនាថ្ងៃដដែល ៕