រាជរដ្ឋាភិបាលកម្ពុជា រៀបចំផែនការអភិវឌ្ឍន៍ ខេត្តព្រះសីហនុ ជាតំបន់សេដ្ឋកិច្ចពិសេស គំរូពហុបំណងនៅឆ្នាំ២០៣៨

ខេត្តព្រះសីហនុ៖ ក្រសួងរៀបចំដែនដីនគរូបនីយកម្ម និងសំណង់ សហការជាមួយរដ្ឋបាលខេត្តព្រះសីហនុ បើកសិក្ខាសាលា ពិគ្រោះយោបល់អំពីសេចក្តីព្រាង គោលនយោបាយគ្រប់គ្រងប្រើប្រាស់ដីធ្លី ដើម្បីអភិវឌ្ឍខេត្តព្រះសីហនុ ជាតំបន់សេដ្ឋកិច្ចពិសេសគំរូពហុបំណង។សិក្ខាសាលានេះបានធ្វើនាព្រឹកថ្ងៃចន្ទ ទី២៤ ខែមករា ឆ្នាំ២០២២នៅខេត្តព្រះសីហនុ ក្រោមវត្តមានឯកឧត្តម ប៉ែន សុផល រដ្ឋលេខាធិការក្រសួងដែនដី ឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ តំណាងអភិបាលខេត្ត ជាប់មាត់សមុទ្រ(កោះកុង កំពត និងខេត្តកែប) និងមានការចូលរួមដោយអភិបាលក្រុង ស្រុក មន្ទីរអង្គភាពជុំវិញខេត្តមេឃុំ ចៅសង្កាត់ ស្មៀនផងដែរ។

ឯកឧត្តម ប៉ែន សុផល រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ មានប្រសាសន៍ថា ផ្អែកលើក្របខ័ណ្ឌនៃ ការសិក្សាស្រាវជ្រាវទិន្នន័យតាមរយៈ កំណែទម្រង់ និងយុទ្ធសាស្ត្រអភិវឌ្ឍន៍ជាតិ យុទ្ធសាស្ត្រចតុកោណ ដំណាក់កាលជាបន្តបន្ទាប់ ឆ្លើយតបការផ្លាស់ប្ដូរការរីកចម្រើន សេដ្ឋកិច្ចមានសក្តានុពលក្នុងការ លើកកម្ពស់សេដ្ឋកិច្ចកម្ពុជា ស្របតាមនិន្នាការតំបន់ និងពិភពលោក។ រាជរដ្ឋាភិបាលដាក់ ចេញនូវគោលនយោបាយ អភិវឌ្ឍន៍វិស័យឧស្សាហកម្ម ដោយកំណត់ប្រែក្លាយខេត្តព្រះសីហនុ ជាតំបន់សេដ្ឋកិច្ចពិសេសគំរូពហុបំណង។
គោលនយោបាយគ្រប់គ្រង ប្រើប្រាស់ដី ដើម្បីអភិវឌ្ឍខេត្តព្រះសីហនុមាន គោលដៅរៀបចំគោលនយោបាយ គ្រប់គ្រងវិស័យដីធ្លី ក្នុងនេះមានអនុវិស័យរដ្ឋបាលដីធ្លី អនុវិស័យរៀបចំដែនដី អនុវិស័យ បែងចែកដីធ្លី លំនៅឋាន ការគ្រប់គ្រង និងអភិវឌ្ឍវិស័យសំណង់ ការគ្រប់គ្រងអភិវឌ្ឍន៍តំបន់ឆ្នេរសមុទ្រកម្ពុជា ក្នុងខេត្តព្រះសីហនុ ទាមទារអោយ មានការចូលរួមយ៉ាងសកម្មពីវិស័យពាក់ព័ន្ធ ការគ្រប់គ្រង ការប្រើប្រាស់ដីធ្លី និងធនធានធម្មជាតិ និងធ្វើសមាហរណកម្មវិស័យ ពាក់ព័ន្ធដីធ្លី ផ្អែកលើមូលដ្ឋាន គោលនយោបាយដីធ្លី សៀវភៅដីធ្លី គោលនយោបាយជាតិ ស្តីពីការរៀបចំដែនដីនៃព្រះរាជាណាចក្រកម្ពុជា។ គោលនយោបាយអភិវឌ្ឍន៍ប្រើប្រាស់ដី ខេត្តព្រះសីហនុ មានគោលដៅតម្រង់ទិស កំណត់ការគ្រប់គ្រងប្រើប្រាស់តាមបែបគំរូថ្មី ផ្អែកលើកត្តាភូមិសាស្ត្រ នៃតំបន់ឆ្នេរសមុទ្រកម្ពុជា កត្តាធនធានធម្មជាតិ បរិស្ថាន វប្បធម៌ និងតម្រូវការវិវឌ្ឍន៍សេដ្ឋកិច្ចសង្គម ស្របវតាមគោលនយោបាយ ច្បាប់ បទដ្ឋានគតិយុត្តព្រមទាំងការសិក្សា ស្រាវជ្រាវពីអន្តរជាតិមានកូរ៉េខាងត្បូង ចក្រភពអង់គ្លេស ហូឡង់ ម៉ាឡេស៊ី ជប៉ុន ចិន ម៉ូណាកូជាដើម។
ឯកឧត្តមបានបន្តថា សិក្ខាសាលានេះ មានសារៈសំខាន់ សម្រាប់ជាចក្ខុវិស័យ គោលនយោបាយកំណត់ឆ្នាំ២០៣៨ មានរយៈពេល ១៥ឆ្នាំខាងមុខទៀត ដែលជាសរសរស្តមដល់វិស័យ ពាក់ព័ន្ធអភិបាលកិច្ចល្អ ទាក់ទាញអ្នកវិនិយោគ និងការបង្ការគ្រោះមហន្តរាយ ព្រមទាំងផែនការសកម្មភាពទាំង៨១ ដែលជាវិធានការគោលនយោបាយ សម្រេចគោលដៅប្រែក្លាយខេត្តព្រះសីហនុ ទៅជាតំបន់សេដ្ឋកិច្ចពិសេសគំរូពហុបំណង។

ទន្ទឹមនេះឯកឧត្តម គួច ចំរើន អភិបាលខេត្តព្រះសីហនុ ក៏បានបង្ហាញការសាទរនិងគាំទ្រ រាជរដ្ឋាភិបាលចំពោះផែនការប្រែក្លាយខេត្តព្រះសីហនុជាតំបន់សេដ្ឋកិច្ចពិសេសគំរូពហុបំណង។ឯកឧត្តម គួច ចំរើន ក៏បានថ្លែងអំណរគុណយ៉ាងជ្រាលជ្រៅ ចំពោះសម្តេចតេជោហ៊ុន សែន ប្រមុខរាជរដ្ឋាភិបាល ដែលបានផ្តល់ ការគាំទ្រក្នងការអភិវឌ្ឍពហុវិស័យនៅ ខេត្តព្រះសីហនុដើម្បីធ្វើអោយ ខេត្តព្រះសីហនុ ជាខេត្តនៃកំណើនសេដ្ឋកិច្ចរបស់ប្រទេសជាតិ។

សេចក្តីព្រាងគោលនយោបាយ ការប្រើប្រាស់ដីធ្លីនៅខេត្តព្រះសីហនុ បានកំណត់ចំណុចគោលចំនួន៧
ដើម្បីអភិវឌ្ឍខេត្តព្រះសីហនុ ជាតំបន់សេដ្ឋកិច្ចពិសេស គំរូពហុបំណង៖
១.គោលនយោបាយអភិវឌ្ឍន៍វិស័យឧស្សាហកម្មកម្ពុជា ប្រែក្លាយខេត្តព្រះសីហនុ ជាតំបន់សេដ្ឋកិច្ចពិសេសគំរូពហុបំណង។
២.ចក្ខុវិស័យឆ្នាំ២០៣៨ ខេត្តព្រះសីហនុ ត្រូវបានគ្រប់គ្រងប្រើប្រាស់បែងចែក និងអភិវឌ្ឍប្រកបដោយសមធម៌ តម្លាភាព ប្រសិទ្ធភាព អភិវឌ្ឍន៍ខេត្តជាតំបន់ សេដ្ឋកិច្ចពិសេសគំរូពហុបំណង ជាទីក្រុងអាស៊ាន នៃប៉ូលអភិវឌ្ឍន៍ជាតិ ប្រកបដោយចីរភាព ជាមជ្ឈមណ្ឌលកំណើនជាតិ មជ្ឈមណ្ឌលហិរញ្ញវត្ថុអន្តរជាតិ ច្រកចេញចូលអន្តរជាតិ មជ្ឈមណ្ឌលភស្តុភាជាតិ មានទំនាក់ទំនងជាមួយទីផ្សារអាស៊ាន និងសាកលលោក។
៣.គោលបំណង ប្រើប្រាស់ដីធ្លី ការបែងចែកដី ការអភិវឌ្ឍន៍ដែនដីនគរូបនីយកម្ម អភិវឌ្ឍន៍ខេត្តប្រកបដោយប្រសិទ្ធភាព និងបរិយាបន្នមានភាពទាក់ទាញ និងឧត្ដមភាពប្រកួតប្រជែងសំដៅរួម ចំណែកប្រែក្លាយកម្ពុជា ជាប្រទេសមានចំណូលមធ្យមកម្រិតខ្ពស់។
៤.យុទ្ធសាស្ត្រ អនុវិស័យរដ្ឋបាលដីធ្លី អនុវិស័យរៀបចំដែនដី ការគ្រប់គ្រង ការអភិវឌ្ឍតំបន់ឆ្នេរសមុទ្រកម្ពុជា អនុវិស័យបែងចែកដីធ្លី ការគ្រប់គ្រង និងអភិវឌ្ឍន៍វិស័យសំណង់ យុទ្ធសាស្ត្រសមាហរណកម្មវិស័យ ពាក់ព័ន្ធទៅនឹងដីធ្លី ការពង្រឹងការគ្រប់គ្រង អភិបាល កិច្ចល្អ និងស្ថាប័នយុទ្ធសាស្ត្រទាក់ទាញការវិនិយោគ និងធនធានការគ្រប់គ្រង ហានិភ័យសំខាន់ៗ និងបង្ការគ្រោះមហន្តរាយធម្មជាតិ។

៥.ផែនការសកម្មភាពអភិវឌ្ឍន៍ខេត្តព្រះសីហនុ រយៈពេលខ្លី (២០២១-២០២៥) រយៈពេលមធ្យម ( ២០២៥-២០៣០) រយៈពេលវែង (២០៣០-២០៣៨)។
៦.ក្របខណ្ឌអនុវត្ត និងយន្តការដឹកនាំ សម្របសម្រួល តាមដាន វាយតម្លៃ ធានាប្រសិទ្ធភាពនៃ ការអនុវត្តគោលនយោបាយគ្រប់គ្រង និងប្រើប្រាស់ដីធ្លី អង្គភាពថ្នាក់ជាតិ និងថ្នាក់ខេត្ត ក្រសួងស្ថាប័នពាក់ព័ន្ធត្រូវ រៀបចំផែនការសកម្មភាព ដើម្បីអនុវត្តតាមដានវាយតម្លៃត្រួតពិនិត្យ ឆ្លើយតបទៅនឹងយុទ្ធសាស្ត្រតាម វិស័យក្នុងការគ្រប់គ្រងដីធ្លី និងធន ធានធម្មជាតិឱ្យមាននិរន្តរភាព ស្របតាមចក្ខុវិស័យនៃគោលនយោបាយ ។
៧.សេចក្តីសន្និដ្ឋាន សកម្មភាពទាំងនេះត្រូវប្រើប្រាស់ ជាមូលដ្ឋានសម្រាប់រៀបចំ សកម្មភាព របស់អង្គភាពថ្នាក់ជាតិ និងថ្នាក់ក្រោមជាតិ តាមដានត្រួតពិនិត្យធានា បាននូវការអនុវត្តប្រកប ដោយការទទួលខុសត្រូវ ប្រសិទ្ធភាពពីក្រសួងស្ថាប័នពាក់ព័ន្ធ វិស័យឯកជន និងប្រជាពលរដ្ឋសំដៅ សម្រេចឱ្យបានចក្ខុវិស័យ ដើម្បីធានាការ អភិវឌ្ឍសេដ្ឋកិច្ចសង្គមជាក់ស្ដែង៕