៦០នាក់ ត្រូវបានសម្លាប់ នៅក្នុងការវាយប្រហារ របស់កងជីវពល នៅក្នុងជំរុំជនភៀសខ្លួនមួយ នៅភាគខាងកើត នៃប្រទេសកុងហ្គោ
Congo ៖ សារព័ត៌មានReutersបានចេញផ្សាយថា ប្រធានក្រុមមនុស្សធម៌ក្នុងស្រុកម្នាក់ និងអ្នករស់នៅជំរុំម្នាក់បានឱ្យដឹងថា កាលពីព្រឹកថ្ងៃពុធ យ៉ាងហោចណាស់មនុស្សចំនួន ៦០នាក់ ត្រូវបានសម្លាប់នៅក្នុងការវាយប្រហាររបស់កងជីវពលនៅក្នុងជំរុំជនភៀសខ្លួនមួយ ដែលស្ថិតនៅភាគខាងកើតនៃសាធារណរដ្ឋប្រជាធិបតេយ្យកុងហ្គោ។
ប្រភពទាំងពីរបានប្រាប់សារព័ត៌មានរ៉យទ័រថា កងជីវពល CODECO ទទួលខុសត្រូវចំពោះការសម្លាប់នៅម៉ោងប្រហែល០២ នៅជំរុំ Savo ក្បែរតំបន់ Bule ក្នុងខេត្ត Ituri។
អ្នកនាំពាក្យកងទ័ពខេត្ត Ituri លោក Jules Ngongo បានបញ្ជាក់ពីការវាយប្រហារដោយ កងជីវពល CODECO ដែលបានធ្វើឱ្យតួលេខអ្នកស្លាប់បណ្តោះអាសន្នមានចំនួនប្រហែល ២០នាក់។
លោកបាននិយាយថា កាលពីយប់ថ្ងៃអង្គារ កងទ័ពកុងហ្គោបានប៉ះទង្គិចជាមួយកងជីវពល ប៉ុន្តែក្រុមវាយប្រហារបានផ្លាស់ប្តូរទិសដៅ ហើយបានឆ្លងកាត់ពួកគេដើម្បីទៅដល់ជំរំនោះ។
CODECO គឺជាកងជីវពលមួយក្នុងចំនោមកងជីវពលដែលប្រតិបត្តិការនៅភាគខាងកើតកុងហ្គោចំពេលមានជម្លោះយូរអង្វែងលើបញ្ហាដីធ្លី និងធនធាន។ យុទ្ធជនរបស់ CODECO បានសម្លាប់ជនស៊ីវិលរាប់រយនាក់ក្នុងទីក្រុង Ituri និងបានបង្ខំមនុស្សរាប់ពាន់នាក់ឱ្យភៀសខ្លួនចេញពីផ្ទះសម្បែងរបស់ខ្លួន នេះបើតាមអង្គការសហប្រជាជាតិ។
ក្នុងរយៈពេលប៉ុន្មានខែថ្មីៗនេះ ក្រុមនោះបានកំណត់គោលដៅវាយប្រហារជំរុំភៀសខ្លួន ដែលមនុស្សមួយចំនួនបានតាំងទីលំនៅ បន្ទាប់ពីបានភៀសខ្លួនពីការវាយប្រហារផ្សេងទៀតដោយ CODECO ៕
