កម្ពុជា បានចូលរួមចែករំលែកយ៉ាងសកម្មក្នុងវិស័យមីន ដល់បណ្តាប្រទេសទាំងក្នុងតំបន់ និងពិភពលោក ដែលទទួលរងគ្រោះដោយសារសំណល់ជាតិផ្ទុះពីសង្រ្គាម ដូចកម្ពុជាដែរ
ភ្នំពេញ ៖ នៅទីស្នាក់ការអាជ្ញាធរមីន ថ្ងៃទី១៨ ខែមីនា ឆ្នាំ២០២២ លោកទេសរដ្ឋមន្រ្តី លី ធុជ អនុប្រធានទី១នៃអាជ្ញាធរមីន បានបទសម្ភាសន៍ជាមួយអ្នកពិគ្រោះយោបល់អន្តរជាតិ ស្តីពីការរួមចំណែកវិស័យមីនកម្ពុជា ក្នុងកិច្ចសហប្រតិបត្តិការត្បូងត្បូង (South South Cooperation)។
ក្នុងបទសម្ភាសន៍នោះ លោកទេសរដ្ឋមន្រ្តី លី ធុជបានលើកឡើងថា ចាប់ពីឆ្នាំ១៩៩២ វិស័យមីនកម្ពុជា បានចាប់ផ្តើមកំណើតឡើងដែលមានរាជរដ្ឋាភិបាលកម្ពុជា ជាម្តាយ និងសហគមន៍ជាតិ-អន្តរជាតិ ជាឳពុក ហើយឥឡូវនេះរយៈពេល ៣០ ឆ្នាំ កម្ពុជា បានទទួលនូវមេរៀនគ្រប់បែបយ៉ាង និងបទពិសោធន៍យ៉ាងច្រើន ព្រមទាំងមានមហិច្ឆតា ចូលរួមចែករំលែកជួយទៅដល់ប្រជាជន និងបណ្តាប្រទេស ទាំងក្នុងតំបន់ និងពិភពលោក ដែលត្រូវការចាំបាច់ នូវការងារបោសសម្អាតមីន។
ដើម្បីចូលរួមដល់កិច្ចសហប្រតិបត្តិការត្បូងត្បូង កម្ពុជា បានរៀបចំឲ្យមានយន្តការរឹងមាំ គោលនយោបាយ ផែនការយុទ្ធសាស្រ្ត និងផែនការសកម្មភាពច្បាស់លាស់ សម្រាប់វិស័យ សកម្មភាពមីនទាំងនៅថ្នាក់ជាតិ និងថ្នាក់ក្រោមជាតិ ព្រមទាំងមានកិច្ច សហការយ៉ាងជិតស្និទ្ធ ជាមួយប្រតិបត្តិករបោសសម្អាតមីនជាតិ-អន្តរជាតិ ដែលសមិទ្ធផលទាំងនេះ បានកើតឡើងចេញពីការយក ចិត្តទុកខ្ពស់របស់ រាជរដ្ឋាភិបាលកម្ពុជា និងមានការចូលរួមគាំទ្រពីដៃគូអភិវឌ្ឍន៍ និងប្រទេសជាមិត្ត។
ជាមួយគ្នានេះ ក្នុងនាមជាប្រទេសស្រឡាញ់សន្តិភាព សម្តេចតេជោ តែងតែចែករំលែកនូវបេះដូង និងសេចក្ដីស្រលាញ់សន្តិភាព ទៅបណ្ដាប្រទេសនានា ដែលទទួលរងគ្រោះដោយសារសង្រ្គាម ដូចកម្ពុជា តាមរយៈការបញ្ជូន កងកម្លំាងរក្សាសន្តិភាព ក្នុងក្របខណ្ឌអង្គការសហប្រជាជាតិ។
ឆ្លៀតក្នុងឱកាសនេះ ទេសរដ្ឋមន្រ្តី លី ធុជ សូមកោតសរសើរ និងថ្លែងអំណរគុណជូនចំពោះប្រតិបត្តិករជាតិ-អន្តរជាតិ ដែលតែងតែចែករំលែកនូវបទពិសោធន៍និងបច្ចេកទេសរបស់ខ្លួនជាមួយបណ្ដាប្រទេសក្នុងតំបន់ និងជុំវិញពិភពលោក។ ជាមួយគ្នានេះ ទេសរដ្ឋមន្រ្តី លី ធុជ សូមថ្លែងអំណរគុណជូនចំពោះដៃគូអភិវឌ្ឍន៍ និងប្រទេសជាមិត្ត ដែលបាននិងកំពុងចូលរួមគាំទ្រដល់វិស័យសកម្មភាពមីននៅកម្ពុជា៕
