ទេសរដ្ឋមន្រ្តី លី ធុជ ៖ សម្តេចតេជោ ហ៊ុន សែន បានដឹកនាំប្រទេសកម្ពុជាយ៉ាងរឹងមាំប្រកបដោយទស្សនវិស័យវែងឆ្ងាយ និងបង្កើតនូវបរិយាកាសល្អសម្រាប់ធុរកិច្ចជន
ភ្នំពេញ៖ នេះជាការថ្លែងរបស់លោក លី ធុជ ទេសរដ្ឋមន្រ្តីទទួលបន្ទុកបេសកកម្មពិសេស ក្នុងនាមរាជរដ្ឋាភិបាលកម្ពុជា នាល្ងាចថ្ងៃទី០៨ ខែមេសា ឆ្នាំ២០២២ ដែលបានអញ្ជើញជាភ្ញៀវកិត្តិយស និងថ្លែងសុន្ទរកថាទៅកាន់ធុរកិច្ចជន ក្នុងឱកាសប្រារព្ធពិធីអបអរសាទរខួបលើកទី ១០ នៃសភាពាណិជ្ជកម្មឥណ្ឌានៅកម្ពុជា។ លោកទេសរដ្ឋមន្រ្តី បានកោតសរសើរជូនចំពោះ លោក Sandeep Majumdar ប្រធានសភាពាណិជ្ជកម្មឥណ្ឌានៅកម្ពុជា និងក្រុមប្រឹក្សាភិបាល ដែលបានចូលរួមក្នុងការពង្រឹងទំនាក់ទំនងពាណិជ្ជកម្មរវាងប្រទេសទាំងពីរទទួលបានជោគជ័យ។
ជាមួយគ្នានេះ លោកទេសរដ្ឋមន្រ្តី បានសម្ដែងនូវការអបអរសាទរខួបលើកទី ៧០ នៃទំនាក់ទំនងជាប្រវត្តិសាស្ត្ររវាងកម្ពុជា និងឥណ្ឌា ដែលលោកប្រាកដថា ទំនាក់ទំនងនេះ នឹងនាំមកនូវការធ្វើឲ្យប្រសើរឡើងបន្ថែមទៀត ក្នុងការចូលរួមយ៉ាងសកម្ម សម្រាប់វិស័យពាណិជ្ជកម្ម និងអាជីវកម្ម។ ក្នុងឱកាសនោះ លោកទេសរដ្ឋមន្រ្តី បានថ្លែងប្រាប់អង្គពិធីថា រាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី មានការដឹកនាំរឹងមាំប្រកបដោយទស្សនវិស័យវែងឆ្ងាយ នាំមកនូវសន្តិភាព និងស្ថិរភាព ព្រមទាំងបានបង្កើតនូវគោលនយោបាយ ផ្តល់ឱកាស និងបរិយា កាសយ៉ាងច្រើនគាំទ្រដល់ការវិនិយោគសម្រាប់ធុរកិច្ចជន និងការទាក់ទងការវិនិយោគជិតឆ្ងាយមកកម្ពុជា។
ជាមួយនឹងការដឹកនាំដ៏ប៉ិនប្រសប់នេះ ប្រទេសកម្ពុជា មានផលិតផលក្នុងស្រុកកេីនឡេីងរយៈពេលជាងពីរទសវត្សរ៍ ដែលផលិតផលមូលដ្ឋានគឺកសិកម្ម មានការវិនិយោគប្រកបដោយភាពស្និទ្ធស្នាល កម្លាំងពលកម្មច្រេីនលើវិស័យសហគ្រាសធុនតូចនិងមធ្យម និងការចូលទៅកាន់ទីផ្សារអាស៊ីអាគ្នេយ៍ជាដើម។ លោកទៀត ក្នុងនាមរាជរដ្ឋាភិបាលកម្ពុជា លោកទេសរដ្ឋមន្រ្តី បានថ្លែងអំណរគុណ យ៉ាងជ្រាលជ្រៅចំពោះធុរកិច្ចជនទាំងអស់ ដែលបានជ្រើសរើស ប្រទេសកម្ពុជាជាគោលដៅវិនិយោគ និងធ្វេីជាផ្ទះទីពីររបស់ខ្លួន ៕ សំរិត
