ក្រុមបាល់ទាត់ជម្រើសជាតិនារីនឹងចូលរួមព្រឹត្តិការណ៍ AFF Women’s Championship

ភ្នំពេញ៖ពេលនេះក្រុមបាល់ទាត់ជម្រើសជាតិនារីកម្ពុជាកំពុងត្រៀមខ្លួនដើម្បីចូលរួមប្រកួតពានរង្វាន់បាល់ទាត់នារីប្រចាំតំបន់អាស៊ីអាគ្នេយ៍ (AFF Women’s Championship) នាខែកក្កដា ខាងមុខ នៅប្រទេសហ្វីលីពីន។
ជាមួយនឹងការចូលរួមនេះ ខណៈលោក ប្រាក់ វុទ្ធីដែលជាគ្រូបង្វឹក បានបញ្ជាក់ថា ព្រឹត្តិការណ៍នេះ គឺឈានចូលដំណាក់កាលទី២ ដើម្បីត្រៀមស៊ីហ្គេម ឆ្នាំ២០២៣ ដែលកម្ពុជា ធ្វើជាម្ចាស់ផ្ទះបន្ទាប់ពីក្រុមនារីនេះបានចូលរួមស៊ីហ្គេមលើកទី៣១នៅប្រទេសវៀតណាមមកនោះ។
ក្រុមទាំងមូលដែលសព្វថ្ងៃមានសមាជិក២៥នាក់បាននិងកំពុងចាប់ផ្ដើមប្រមូលផ្ដុំហ្វឹកហាត់ នៅមជ្ឈមណ្ឌលសាលាកីឡាបាល់ទាត់ជាតិបាទី ខេត្តតាកែវ ក្រោមការដឹកនាំដោយ លោក ប្រាក់ វុទ្ធី ដែលជាគ្រូបង្វឹក រួមទាំងគ្រូជំនួយ និងមន្ត្រីជាច្រើនរូបទៀត។

ក្រុមចាប់ផ្ដើមប្រមូលផ្ដុំតាំងពីថ្ងៃទី១៧មិថុនាមកម្ល៉េះ។ពួកគេស្ថិតនៅក្នុងស្ថានភាពល្អប្រសើរ ស្មារតី និងឆន្ទៈ មានការប្រឹងប្រែងហ្វឹកហាត់។ក្រុមជម្រើសជាតិនារីកម្ពុជា ត្រូវបានចាប់ឆ្នោតស្ថិតនៅពូល B ជាមួយក្រុមដែលទើបតែឈ្នះមេដាយមាសស៊ីហ្គេម លើកទី៣១ វៀតណាម រួមនឹងក្រុម ៣ផ្សេងទៀតមាន មីយ៉ាន់ម៉ា, ឡាវ និង ទីម័រខាងកើត។ គ្រូបង្វឹករូបនេះបានបង្ហាញការតាំងចិត្តចង់ស្វែងរក៦ពិន្ទុពីការប្រកួតក្នុងពូលនិងធ្វើឲ្យបានល្អជាមួយក្រុមខ្លាំងៗ។
លោកនិយាយថាដោយសារយើងស្ថិតនៅក្នុងពូល B ដែលមានវៀតណាម, មីយ៉ាន់ម៉ា, ឡាវ,ទីម័រខាងកើតនិងកម្ពុជាយើងដូច្នេះឆន្ទៈរបស់យើងគឺយើងដាក់គោលដៅដើម្បីយកឈ្នះឡាវ និងទីម័រ ហើយបន្តឲ្យមានលទ្ធផលល្អជាមួយនឹងក្រុមវៀតណាម និងភូមា បន្តទៀត។ ដូច្នេះឃើញថា ស្មារតីយើងបានល្អ មានការប្រឹងប្រែង ឆន្ទៈខ្លាំង។
គ្រូបង្វឹកវ័យ ៥១ឆ្នាំរូបនេះបានសង្គត់ធ្ងន់ថា អ្វីៗសុទ្ធតែជាគោលដៅសម្រាប់ស៊ីហ្គេម ឆ្នាំ២០២៣។យើងបានរៀបចំគោលដៅនៃការហ្វឹកហាត់គោលការណ៍នៃការហ្វឹកហាត់តាមដំណាក់កាល។ ដំណាក់កាលទី១ គឺការចូលរួមប្រកួតស៊ីហ្គេម នៅវៀតណាម ដែលគិតថា យើងធ្វើបានល្អចំពោះការការពារ។ នៅលើកនេះ យើងនឹងរៀបចំដំណាក់កាលទី២ គឺការការពាររួមនឹងការវាយបកបូកនឹងការប្រយុទ្ធបន្ថែមទៀតហើយនឹងការអភិវឌ្ឍន៍ជាបណ្ដើរៗទៅលើគុណផលម្នាក់ៗ។គ្រប់ការប្រកួតអន្តរជាតិទាំងអស់ដែលជម្រើសជាតិបាល់ទាត់នារីរៀបចំគឺសុទ្ធសឹងជាគោលដៅសម្រាប់ឆ្នាំ២០២៣ ទាំងអស់។

នៅឆ្នាំ២០២៣យើងក៏មានគម្រោងនឹងកោះអញ្ជើញកីឡាការិនីខ្មែរបរទេសនៅឯក្រៅប្រទេសមកចូលរួមបន្ថែមទៀតដូចជានៅអូស្ត្រាលីក៏ដូចជានៅសហរដ្ឋអាមេរិកហើយនឹងបន្ត
ស្រាវជ្រាវកីឡាការិនីកូនខ្មែរសញ្ជាតិបរទេសហ្នឹងបន្ថែមទៀតនៅដូចជាលីគរបស់បារាំង ក៏ដូចជាកាណាដាយើងនឹងបន្តខិតខំស្រាវជ្រាវហើយបន្តធ្វើយ៉ាងម៉េចកោះអញ្ជើញពួកគាត់មកចូលរួមក្នុងស៊ីហ្គេម ឆ្នាំ២០២៣។
សូមបញ្ជាក់ថាក្រុមបាល់ទាត់ជម្រើសជាតិនារីកម្ពុជានឹងចូលរួមប្រកួតពានរង្វាន់បាល់ទាត់នារីប្រចាំតំបន់អាស៊ីអាគ្នេយ៍ (AFF Women’s Championship) ពីថ្ងៃទី០៤ ដល់ថ្ងៃទី១៧ ខែកក្កដា ខាងមុខ នៅប្រទេសហ្វីលីពីន៕