មន្ទីរសាធារណការខេត្តព្រះវិហារ ជួសជុល ថែទាំ ផ្លូវក្រាលគ្រួសក្រហម តាមផ្លូវក្រវ៉ាត់ព្រំដែន កម្ពុជា-ថៃ ប្រវែងជិត១០គីឡូម៉ែត្រ
ភ្នំពេញ៖ កំណាត់ផ្លូវខេត្តលេខ២PVH១ ប្រវែងជិត១០គីឡូម៉ែត្រ ដែលជា ផ្លូវក្រវ៉ាត់ព្រំដែន កម្ពុជា–ថៃ ស្ថិតក្នុងឃុំស្រអែម ស្រុកជាំក្សាន្ត ដែលរងការខូចខាតដោយកន្លែង ត្រូវបានមន្ទីរសាធារណការ និងដឹកជញ្ជូនខេត្តព្រះវិហារធ្វេីការជួសជុល ថែទាំឡេីងវិញ ។
លោក សំ លាងទ្រី ប្រធានមន្ទីរ សាធារណការនិងដឹកជញ្ជូនខេត្តព្រះវិហារ បានអោយដឹងថា៖ ថ្ងៃទី២២ ខែមិថុនាឆ្នាំ២០២២នេះ ក្រុមការងារជួសជុល ថែទាំផ្លូវថ្នល់ នៃមន្ទីរសាធារណការនិងដឹកជញ្ជូនខេត្តព្រះវិហារ បានធ្វេីការ ជួសជុល ថែទាំ លេីកំណាត់ផ្លូវខេត្តលេខ២PVH១ ប្រវែង ៩,៥០គីឡូម៉ែត្រ ចាប់ពីភូមិបង្គោលប្រាំបី ដល់ ភូមិអង្គ្រង ឃុំស្រអែម ស្រុកជាំក្សាន្ត ដោយធ្វើការថែមដីល្បាយថ្ម កៀរសម្រួល ស្រោចទឹក កិនបង្ហាប់។
លោកបញ្ជាក់ថា កំណាត់ផ្លូវខេត្តលេខ2PVH1 ដែលក្រុមការងារកំពុងធ្វេីការ ជួសជុល ថែទាំ នៅពេលនេះ គឺជាប្រភេទផ្លូវក្រាលគ្រួសក្រហម តាមផ្លូវក្រវ៉ាត់ព្រំដែន កម្ពុជា–ថៃ ជាផ្លូវដែលមានសារ:សំខាន់សម្រាប់ប្រជាពលរដ្ឋធ្វេីដំណេីរ និងដឹកជញ្ជូនកសិផលផ្សេងៗ ពិសេសជាផ្លូវយុទ្ធសាស្ត្រដ៍សំខាន់សម្រាប់កងទ័ពថែមទៀតផង។
លោក សំ លាងទ្រី សូមបងប្អូនបេីកបរដោយប្រុងប្រយ័ត្ន ប្រកបដោយស្មារតីទទួលខុសត្រូវខ្ពស់ ដេីម្បីជៀសវាងការកេីតឡេីងនូវករណីគ្រោះថ្នាក់ជាយថាហេតុផ្សេងៗ៕