ប៉េតង់ចេញដំណើរទៅសហរដ្ឋអាមេរិក ដើម្បីប្រកួតជើងឯកពិភពលោកហើយ

ភ្នំពេញ៖ថ្ងៃទី០៨ខែកក្កដាឆ្នាំ២០២២ក្រុមប្រតិភូកីឡាប៉េតង់កម្ពុជាបានធ្វើដំណើរកាលពីវេលាម៉ោង១២និង៤០នាទីរំលងអធ្រាត្រថ្ងៃសុក្រ ទី០៨ខែកក្កដាឆ្នាំ២០២២នេះទៅកាន់សហរដ្ឋអាមេរិក ដែលជាម្ចាស់ផ្ទះរៀបចំការប្រកួតកីឡាពិភពលោក (The World Games 2022 Birmingham, USA) ឆ្នាំ២០២២។

ប្រតិភូកីឡាប៉េតង់កម្ពុជាមានចំនួន៥នាក់ គឺ កីឡាការិនី អ៊ុក ស្រីមុំ និងកីឡាការិនី អ៊ុន ស្រីយ៉ា ដឹកនាំដោយកញ្ញា គិន សំណាង អគ្គលេខាធិការងសហព័ន្ធកីឡាប៊ូល និងប៉េតង់កម្ពុជា លោក ហៀន ថាវរ: មន្រ្តីសហព័ន្ធ និងលោក ចាន់ វិចិត្រ មន្រ្តីព័ត៌មាន។
កញ្ញាគិនសំណាង បានគូសបញ្ជាក់ថាការប្រកួតកីឡាពិភពលោកនេះមានប្រភេទកីឡាច្រើនចម្រុះប៉ុន្តែកម្ពុជាបានបញ្ជូនផ្នែកប៉េតង់ចូលរួមដោយមានកីឡាការិនី២នាក់គឺ កីឡាការិនី អ៊ុក ស្រីមុំ និងកីឡាការិនីអ៊ុនស្រីយ៉ាដោយត្រូវប្រកួតលើ២វិញ្ញាសាគឺវិញ្ញាសា២នាក់ទល់២នាក់ និងវិញ្ញាសាវាយយកពិន្ទុ។
កញ្ញាអគ្គលេខាធិការរងរូបនេះបន្តថាប៉េតង់កម្ពុជាសង្ឃឹមថា នឹងទទួលបានលទ្ធផលល្អ ដោយ សារសហព័ន្ធមានផែនការច្បាស់លាស់ក្នុងការសម្រិតសម្រាំងកីឡាការិនីដែលមានបទពិសោធន៍ និងបច្ចេកទេសខ្ពស់ ដោយធ្លាប់ឆ្លងកាត់ការប្រកួតកម្រិតអន្តរជាតិញឹកញាប់ ព្រមទាំងជាម្ចាស់មេដាយមាសកម្រិតអន្តរជាតិទៀតផង។

កីឡាការិនី អ៊ុន ស្រីយ៉ា បានបញ្ជាក់ថា ការចេញទៅលើកនេះ គឺខ្លួនបានត្រៀមលក្ខណៈបានល្អដោយបានហ្វឹកហាត់និងសមផ្នែកបច្ចេទេសជាមួយកីឡាការិនី អ៊ុក ស្រីមុំ ក្នុងការសហការប្រកួតជាក្រុម នៅសហរដ្ឋអាមេរិកនេះ។ កីឡាការិនី អ៊ុន ស្រីយ៉ា បានបន្តថា កីឡាករ កីឡាការិនីរបស់ប្រទេសជាឧបសគ្គសម្រាប់ប៉េតង់កម្ពុជា មានចម្លោះពី៨ ទៅ១០ប្រទេស ដូចជាប្រទេសថៃ, បារាំង, ដាណាម៉ាក ជាដើម ដែលតែងតែប្រកួតយ៉ាងស្វិតស្វាញជាមួយក្រុមជម្រើសជាតិកម្ពុជាលើឆាកអន្តរជាតិក្នុងព្រឹត្តិការណ៍ធំៗ ដូចជាការប្រកួតកីឡាស៊ីហ្គេម កម្រិតអាស៊ី និងជើងឯកពិភពលោក។

សូមបញ្ជាក់ថាការប្រកួតកីឡាពិភពលោកឆ្នាំ២០២២ធ្វើនៅ Birmingham នៃសហរដ្ឋអាមេរិក ចាប់ពីថ្ងៃទី០៨ ដល់ថ្ងៃទី១៥ ខែកក្កដា ឆ្នាំ២០២២ ៕