ភូមិស្ទឹងសំរោង ឃុំអូរបាក់រទេះ ស្រុកកំពង់សីលា ខេត្តព្រះសីហនុ ទឹកឡេីងមានកំពស់ ៥.២០ម៉ែត្រពីបាតស្ទឹង រីឯអាកាសធាតុកំពុងភ្លៀង អាជ្ញាធរណែនាំឲ្យមានការប្រុងប្រយ័ត្នខ្ពស់
(ព្រះសីហនុ)៖ ថ្ងៃទី១២ ខែកក្កដា ឆ្នាំ២០២២វេលាម៉ោង ១១:៣០នាទី ស្ថានភាពកំពស់ទឹក នៅស្ពានស្ទឹងសំរោង ចំណុចចន្លោះគីឡូម៉ែត្រលេខ 115-116 ក្នុងភូមិស្ទឹងសំរោង ឃុំអូរបាក់រទេះ ស្រុកកំពង់សីលា ខេត្តព្រះសីហនុ ទឹកឡេីងមានកំពស់ ៥.២០ម៉ែត្រពីបាតស្ទឹង រីឯអាកាសធាតុកំពុងភ្លៀង។
បើការតាមការសន្និដ្ឋានរបស់អាជ្ញាធរ សភាពទឹកឡេីងនិងដល់កំពស់៥,៦០ម៉ែត្រ ទៅ៥,៧០ម៉ែត្រ
និងត្រូវប្រកាសអាសន្ន។
រីឯសភាពការណ៍ ក្នុងមូលដ្ឋាន អហ ស្រុកកំពង់សីលាវិញនៅវេលាម៉ោង៨’៣០នាទីព្រឹក ថ្ងៃទី១២ ខែកក្កដា ឆ្នាំ២០២២ កម្លាំងកងរាជអាវុធហត្ថ ស្រុកកំពង់សីលា ចំនួន០៤នាក់ ដឹកនាំដោយលោកអនុសេនីយ៍ឯក សួន ធា មេបញ្ជាការរងស្រុក សហការជាមួយកម្លាំងគណៈបញ្ជាការឯកភាពរដ្ឋបាលស្រុកកំពង់សីលា ដឹកនាំដោយលោក សៅ បុរីវឌ្ឍនៈ អភិបាលស្រុកកំពង់សីលា ចុះពិនិត្យស្ថានភាពទឹកជំនន់ដោយទឹកភ្លៀងចំណុចភូមិក្រាំងអាត់ចាស់ ឃុំកំពង់សីលា ស្រុកកំពង់សីលា ខេត្តព្រះសីហនុ ដែលមានប្រជាពលរដ្ឋរស់នៅចំនួន៤២ខ្នងផ្ទះ ក្នុងនោះរងគ្រោះដោយជំនន់ទឹកភ្លៀងចំនួន ៣៧ខ្នងផ្ទះ (ពុំមានរងគ្រោះដល់អាយុជីវិតមនុស្ស រឺសត្វពាហនៈឡេីយ )។
