អាជ្ញាធរនិងមន្ទីរជំនាញ ចុះពិនិត្យនិងដោះស្រាយតំបន់លិចលង់ដោយសារជំនន់ទឹកភ្លៀងនៅភូមិតាង៉ូវក្រោម សង្កាត់និរោធន៍
ភ្នំពេញ៖ ដើម្បីដោះស្រាវនូវកង្វល់របស់បងប្អូនប្រជាពលរដ្ឋនៅក្នុងខណ្ឌច្បារអំពៅ ពិសេស ប្រជាពលរដ្ឋរស់នៅតំបន់លិចលង់ដោយសារជំនន់ទឹកភ្លៀងនៅភូមិតាង៉ូវ ក្រោម សង្កាត់និរោធន៍ អាជ្ញាធរខណ្ឌច្បារអំពៅនិងមន្ទីរជំនាញ នៅថ្ងៃទី២៤ខែកញ្ញាឆ្នាំ២០១៨បានចុះពិនិត្យនិងដោះស្រាយជូនប្រជាពលរដ្ឋ សំដៅធ្វើយ៉ាងណានាំទឹកចេញ បញ្ជៀសអោយបាននូវការលិចលង់ភូមិដ្ឋានប្រជាពលរដ្ឋ ។
ការងារនេះ កាលពីថ្ងៃទី២៤ខែកញ្ញាឆ្នាំ២០១៨លោក ចេង មុនីរ៉ា អភិបាលខណ្ឌច្បារអំពៅ និង លោក សាំ ពិសិដ្ឋ ប្រធានមន្ទីរសាធារណការនិងដឹកជញ្ជូនរាជធានីភ្នំពេញ ព្រមទាំងមន្ត្រីអង្គភាពលូទឹក បានចុះពិនិត្យនិងដោះស្រាយជូនប្រជាពលរដ្ឋនៅតំបន់លិចលង់ដោយសារជំនន់ទឹកភ្លៀងនេះ ខណៈពេលទឹកទន្លេកំពុងឡើងខ្ពស់ ហើយមន្ត្រីជំនាញបានសម្រេចបិទទ្វារទឹកបង្ហូរចូលទន្លេនោះ។
មន្ត្រីរដ្ឋបាលរាជធានីភ្នំពេញបានអោយដឹងថាលើការងារនេះ អាជ្ញាធរនិងមន្ទីរជំនាញបានប្រើរថយន្តបូមលូចំនួន ៣គ្រឿង ទឹកកំពុងហូរយ៉ាងខ្លាំងតាមបណ្តាញលូឆ្លងកាត់វត្តកំសាន្តឆ្ពោះមកប្រឡាយបារាំងរួចបូមទឹកបញ្ចេញនៅស្ថានីយ៍ព្រះពន្លា ដែលសង្ឃឹមថាទឹកនឹងស្រកនាពេលយប់នេះ។
លោក សាំ ពិសិដ្ឋ ប្រធានមន្ទីរសាធារណការនិងដឹកជញ្ជូនរាជធានីភ្នំពេញបានអោយដឹងនៅព្រឹកថ្ងៃ២៥ កញ្ញានេះថា ចំពោះរថយន្តបូបលូនេះ យើងធ្វើចាប់ពីតំបន់ភូមិតាង៉ូវក្រោមរហូតដល់ ប្រឡាយបារាំង និងបូមទឹកបញ្ចេញនៅស្ថានីយ៍ព្រះពន្លា ។កិច្ចការងារនេះយើងត្រូវធ្វើការពង្វាងលូ ដោយខ្ចីវត្តកំសាន្ត ដើម្បីប្រើប្រាស់សិន ដោយអោយទឹកឆ្លងតាត់វត្តមកលូថ្មី ដែលរដ្ឋបាលខណ្ឌច្បារអំពៅបានដាក់រួច មានប្រវែងជា១៦០០ម៉ែត្រ នៅការដោះស្រាវជូនប្រជាពលរដ្ឋវានឹងបានប្រសើរឡើង៕
