ពង្រឹងវិធានការគ្រប់គ្រង់ត្រួតពិនិត្យ បង្ការទប់ស្កាត់ការបង្វែរខុសច្បាប់ នូវសារធាតុគីមីផ្សំ ក្នុងវិស័យកសិកម្ម

ភ្នំពេញ៖ ការផ្សព្វផ្សាយអប់រំអំពីគ្រោះថ្នាក់នៃគ្រឿងញៀន និងការពង្រឹងវិធានការគ្រប់គ្រង់ត្រួតពិនិត្យ បង្ការទប់ស្កាត់ការបង្វែរខុសច្បាប់នូវសារធាតុគីមីផ្សំក្នុងវិស័យកសិកម្ម យកទៅប្រើប្រាស់ក្នុងចង្វាក់ផលិតកម្មគ្រឿងញៀន ត្រូវបានលើកកម្ពស់ឲ្យកាន់តែមានប្រសិទ្ធភាព។

ក្រសួងកសិកម្ម រុក្ខាប្រមាញ់ និងនេសាទ រសៀលថ្ងៃទី២៩ ខែសីហា ឆ្នាំ២០២២ ពិធីផ្សព្វផ្សាយអប់រំ អំពីគ្រោះថ្នាក់នៃគ្រឿងញៀន និងការពង្រឹងវិធានការគ្រប់គ្រង់ត្រួតពិនិត្យ បង្ការទប់ស្កាត់ការបង្វែរខុសច្បាប់នូវសារធាតុគីមីផ្សំក្នុងវិស័យកសិកម្ម ត្រូវបានប្រារព្ធឡើងក្រោមអធិបតីភាព ឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការ នៃអគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំងគ្រឿងញៀន និងឯកឧត្តម គឹម សុន រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ ដែលមានសមាសភាពចូលរួមសរុបចំនួន៩៤ រូប (ស្រី ៦ រូប) ដោយផ្ទាល់ ចំនួន ៣៩រូប និងតាមរយៈកម្មវិធីស៊ូម ចំនួន ៥៥រូប មកពីអង្គភាពជំនាញពាក់ព័ន្ធ និងមន្ទីរ ២៥រាជធានី-ខេត្ត ចំណុះក្រសួងកសិកម្ម រុក្ខាប្រមាញ់ និងនេសាទ។

ពិធីផ្សព្វផ្សាយនេះ មានគោលបំណងដូចខាងក្រោម៖
១. បង្កើនការយល់ដឹងពីផលប៉ះពាល់ និងគ្រោះថ្នាក់នៃគ្រឿងញៀន ដើម្បីធ្វើជាមូលដ្ឋានក្នុងការ ផ្សព្វផ្សាយអប់រំបន្តដល់ផ្នែកពាក់ព័ន្ធក្នុងដែនសមត្ថកិច្ចរបស់ក្រសួង
២. បង្កើនការយល់ដឹងអំពីសារធាតុគីមីផ្សំដែលមានការពាក់ព័ន្ធនឹងការផលិតគ្រឿងញៀន ដោយរួមទាំងសារធាតុគីមីផ្សំដែលប្រើប្រាស់ក្នុងវិស័យកសិកម្ម
៣. លើកកម្ពស់ប្រសិទ្ធភាពនៃការចូលរួមរបស់វិស័យកសិកម្មក្នុងការបង្ការ និងទប់ស្កាត់ការបង្វែរ ខុសច្បាប់នូវសារធាតុគីមីផ្សំក្នុងវិស័យកសិកម្ម យកទៅប្រើប្រាស់ក្នុងចង្វាក់ផលិតកម្មគ្រឿងញៀន។

ក្នុងឱកាសនោះ ឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការ អាជ្ញាធរជាតិប្រយុទ្ធប្រឆាំងគ្រឿងញៀន បានជម្រុញដល់ក្រសួងកសិកម្ម រុក្ខាប្រមាញ់ និងនេសាទ ដែលជាក្រសួងសមាជិករបស់អាជ្ញាធរជាតិប្រយុទ្ធប្រឆាំងគ្រឿងញៀន ត្រូវលើកកម្ពស់ការផ្សព្វផ្សាយអប់រំអំពីផលប៉ះពាល់ និងគ្រោះថ្នាក់នៃគ្រឿងញៀនដល់គ្រប់សមាសភាពពាក់ព័ន្ធក្នុងដែនសមត្ថកិច្ចរបស់ខ្លួនអោយបានជាប្រចាំ ដើម្បីចូលរួមទប់ស្កាត់ និងប្រយុទ្ធប្រឆាំងនឹងបញ្ហាគ្រឿងញៀននៅក្នុងប្រទេសកម្ពុជា។ ជាមួយគ្នានេះ ឯកឧត្តម នាយឧត្តមសេនីយ៍ ក៏បានស្នើសុំក្រសួងធ្វើការពង្រឹង និងពង្រីកវិធានការគ្រប់គ្រងត្រួតពិនិត្យការប្រើប្រាស់សារធាតុគីមីផ្សំក្នុងវិស័យកសិកម្មអោយមានប្រសិទ្ធភាពខ្ពស់ ដើម្បីចូលរួមបង្ការទប់ស្កាត់ការបង្វែរយកទៅប្រើប្រាស់ខុសច្បាប់ក្នុងចង្វាក់ផលិតកម្មគ្រឿងញៀន។

ក្នុងឱកាសនោះផងដែរ ឯកឧត្តម គឹម សុន រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានអះអាងថា ដើម្បីមានប្រសិទ្ធភាព និងទទួលបានលទ្ធផលកាន់តែល្អប្រសើរលើការងារប្រយុទ្ធប្រឆាំងគ្រឿងញៀន ក្រសួងនឹងធ្វើការពង្រឹង និងពង្រីកទាំងសកម្មភាពអប់រំផ្សព្វផ្សាយ និងវិធានការគ្រប់គ្រងត្រួតពិនិត្យការប្រើប្រាស់សារធាតុគីមីក្នុងវិស័យកសិកម្ម ជាពិសេស ពង្រឹងសមត្ថភាពក្រុមការងារ ក៏ដូចជាផ្នែកពាក់ព័ន្ធចាប់ពីថ្នាក់ជាតិ រហូតដល់ថ្នាក់ក្រោមជាតិក្នុងដែនសមត្ថកិច្ចរបស់ក្រសួង ដើម្បីសហការអនុវត្តអោយបានម៉ឺងម៉ាត់សំដៅចូលរួមលប់បំបាត់ការប្រើប្រាស់គ្រឿងញៀន និងបង្ការទប់ស្កាត់ការបង្វែរសារធាតុគីមីផ្សំក្នុងវិស័យកម្ម យកទៅប្រើប្រាស់ក្នុងចង្វាក់ផលិតកម្មគ្រឿងញៀនខុសច្បាប់។