បុរស៤នាក់ ជិះរថយន្ត Ford ពាក់ស្លាកលេខ.ខ.ម ពីភ្នំពេញ ទៅបាញ់សត្វព្រៃនៅខេត្តកោះកុង ត្រូវសមត្ថកិច្ចឃាត់ខ្លួនបាន២នាក់
កោះកុង ៖បុរស២នាក់ ត្រូវបានសមត្ថកិច្ចចម្រុះ ចាប់បាន កាលពីវេលាម៉ោង០១និង ៤០នាទី រំលងអាធ្រាត្រ ឈានចូលថ្ងៃទី៦ ខែកញ្ញា ឆ្នាំ២០២២ នៅភូមិទឹកល្អក់ ឃុំជីផាត ស្រុកថ្មបាំង ខេត្តកោះកុង។ ចំណែក២នាក់ទៀតរត់រួច។
កងកម្លាំងសមត្ថកិច្ចចម្រុះដែលបានព័ទ្ធចាប់បុរសទាំង ២នាក់នោះ រួមមាន កងរាជអាវុធហត្ថ ២នាក់ មន្ត្រីបរិស្ថាន ម្នាក់ អង្គការសម្ព័ន្ធមិត្តសត្វព្រៃចំនួន ០៥នាក់ តំណាងអង្គការការពារសត្វព្រៃ ដឹកនាំដោយជនបរទេស ២នាក់។
បុរស ២នាក់ដែលសមត្ថកិច្ចចម្រុះចាប់បាននោះគឺ៖
១/ឈ្មោះ ស្រី វាសនា ភេទប្រុស អាយុ ៣៥ឆ្នាំ ជនជាតិខ្មែរ មុខរបរ ជាបុគ្គលិកក្រុមហ៊ុន មានទីលំនៅ ក្នុងភូមិអូរដឹម សង្កាក់ចោមចៅ ខ័ណ្ឌសែនសុខ រាជធានីភ្នំពេញ។
២/ ឈ្មោះហុង រត្នមុនី ភេទប្រុស អាយុ ២៩ឆ្នាំ ជនជាតិខ្មែរ មានទីលំនៅសង្កាត់ទឹកល្អក់១ ខ័ណ្ឌទទួលគោក រាជធានីភ្នំពេញ។
ចំណែកវត្ថុតាង ដែលសមត្ថកិច្ចចាប់ឃាត់បាន រួមមាន៖ រថយន្តម៉ាក ហ្វត ពណ៌ត្រេអ៊ី ពាក់ស្លាកលេខ ខេមរភូមិន្ទ( 2-4793 )ចំនួន ០១គ្រឿង សត្វប្រើស ០១ក្បាល សម្ពោច ០១ក្បាល សាច់សត្វមួយស្បោងតូច កាំភ្លើង ០៥ដើម ( វែង ០២ដើម ខ្លី ០៣ដើម និងគ្រាប់ចំនួន ៥៩គ្រាប់)។
បុរសទាំង ២នាក់នោះ ត្រូវបានកងកម្លាំងចម្រុះ បញ្ជូនទៅមន្ទីរបរិស្ថាន ខេត្តកោះកុង និងកសាងសំណុំរឿង បញ្ជូនទៅតុលាការ ចាត់ការ តាមនីតិវិធីច្បាប់៕
