រដ្ឋមន្រ្តីក្រសួងកិច្ចការនារី និង ថ្នាក់ដឹកនាំខណ្ឌកំបូលនាំយកទេយ្យទាន និងបច្ច័យមួយចំនួនទៅប្រគេនព្រះសង្ឃ គង់ចាំព្រះវស្សា បិណ្ឌទី៣ នៅវត្ត អង្គត្រកៀត និងវត្ត គោកខ្សាច់

ភ្នំពេញ៖លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្រ្តីក្រសួងកិច្ចការនារីនិងជាប្រធានក្រុមការងារថ្នាក់ជាតិ ចុះជួយមូលដ្ឋានខណ្ឌកំបូល រួមទាំងមន្រ្តីអ្នកមុខអ្នកការក្រោមឱវាទ ក្រុមការងារចុះជួយខណ្ឌកំបូល និងថ្នាក់ដឹកនាំខណ្ឌកំបូល អាជ្ញាធរសង្កាត់ និងពុទ្ធបរិស័ទមួយចំនួនផងនោះ បាននាំយកនូវទេយ្យទាន និងបច្ច័យមួយចំនួនទៅវេប្រគេនព្រះសង្ឃ គង់ចាំព្រះវស្សាតាមទំនាមព្រះពុទ្ធសាសនា នៅវត្តអង្គត្រកៀតក្នុងសង្កាត់កន្ទោក និង វត្តគោកខ្សាច់ ស្ថិតក្នុងសង្កាត់ ប្រទះឡាង នៃខណ្ឌកំបូល រាជធានីភ្នំពេញ។

ថ្ងៃនេះ ជាថ្ងៃកាន់បិណ្ឌវេនទី៣ បើតាមទំនាមទំលាប់ ដែលប្រជាពុទ្ធបរិស័ទខ្មែរយើងបានប្រារពធ្វើជារៀងរាល់ឆ្នាំ តាមបែបគន្លងព្រះពុទ្ធសាសនា ដើម្បីនាំយកនូវចង្ហាន់បិណ្ឌបាត្រ ទេយ្យទាន និងបច្ច័យផងនោះ ទៅប្រគេនព្រះសង្ឃដែលគង់ចាំវស្សានៅក្នុងទីអារាមនៃវត្តនីមួយៗ ដើម្បីឧទ្ទិសមហាកុសល ផលបុណ្យជូនទៅបុព្វការីជនមាន៖ មាតា បិតា ជីដូន ជីតា គ្រូអាចារ្យ វរៈជនស្នេហាជាតិ និងក្រុមញ្ញាតិ ដែលបានចែកឋានទៅ ព្រមទាំងសន្សំបុណ្យកុសល ដើម្បីខ្លួនឯង កូនចៅ និងប្រទេសជាតិ ឱ្យបានជួបនូវសេចក្តីសប្បាយជារៀងដរាបទៅ៕