ឃុំខ្លួនដាក់ពន្ធនាគារព្រៃស ជនត្រូវចោទ ជាតៃកុងរថយន្តពីរនាក់ ដែលបង្កគ្រោះថ្នាក់បណ្តាលឲ្យមនុស្សស្លាប់និងរបួស
ភ្នំពេញ៖ ចៅក្រមស៊ើបសួរសាលាដំបូងរាជធានីភ្នំពេញ ចេញដីកាបង្គាប់ឲ្យឃុំខ្លួនដាក់ពន្ធនាគារព្រៃស ជនត្រូវចោទចំនួនពីរនាក់ ក្នុងបង្កគ្រោះថ្នាក់ចរាចរពីរករណីផ្សេងគ្នា បណ្តាលឲ្យជនរងគ្រោះស្លាប់ និងរបួស។
ក្នុងនោះ ករណីទី១ គឺលោក ហេង កេសរោ ចៅក្រមស៊ើបសួរសាលាដំបូងរាជធានីភ្នំពេញ ចេញដីកាបង្គាប់ឲ្យឃុំខ្លួន ជនត្រូវចោទម្នាក់នៅមណ្ឌលឃុំខ្លួន(ម១) ព្រៃស កាលពីថ្ងៃទី២៦ ខែកញ្ញា ឆ្នាំ២០១៨ ពីបទ បើកបរដោយធ្វេសប្រហេស ខ្ជីខ្ជា មិនប្រុងប្រយ័ត្ន ឬមិនគោរពកាតព្វកិច្ចបណ្តាលឱ្យរបួសនិងស្លាប់ដល់អ្នកដទៃ។
ជនត្រូវចោទឈ្មោះ អៀម ថៃ ភេទប្រុស អាយុ២៩ឆ្នាំ រស់នៅភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ។
លោកវរសេនីយ៍ឯក សែម គន្ធា នាយការិយាល័យនគរបាលចរាចរណ៍ផ្លូវគោករាជធានីភ្នំពេញបានឱ្យដឹងថាកាលពីថ្ងៃអាទិត្យ ១៤កើត ខែភទ្របទ ឆ្នាំច សំរឹទ្ធិស័កព.ស២៥៦២ ត្រូវនឹងថ្ងៃទី២៣ ខែកញ្ញា ឆ្នាំ២០១៨ វេលាម៉ោង១៩និង៣០នាទី នៅចំណុចមុខផ្ទះលេខ៣(អ៊ី ចាន់ថា) លើផ្លូវលេខ៩៩ កែងផ្លូវលំ ភូមិជង្រុក ស្ថិតក្នុងសង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញមានករណីគ្រោះថ្នាក់ចរាចរណ៍មួយបានកើតឡើងបណ្តាលឲ្យមនុស្សស្លាប់ម្នាក់ របួសធ្ងន់ម្នាក់។ មូលហេតុរថយន្ត បើកបរលឿន និងបើកស្ថិតក្នុងស្ថានភាពស្រវឹងមានអាត្រាជាតិអាល់កុល1,27Mg/L ។
ចំណែកករណីទី២ គឺ លោក ម៉េង តូនី ចៅក្រមស៊ើបសួរសាលាដំបូងរាជធានីភ្នំពេញ ចេញដីកាបង្គាប់ឲ្យឃុំខ្លួន ត្រូវចោទម្នាក់នៅមណ្ឌលឃុំខ្លួន(ម១)ព្រៃស នៅថ្ងៃទី២៧ ខែកញ្ញា ឆ្នាំ២០១៨។
ជនត្រូវចោទឈ្មោះ ហោ ចាន់ ភេទប្រុស អាយុ២១ឆ្នាំ ជនជាតិខ្មែរ មុខរបរជាងផ្សារដែក ទីកន្លែងកំណើតភូមិឡូ៣៣ ឃុំត្រែង ស្រុករតនមណ្ឌល ខេត្តបាត់ដំបង ទីលំនៅបច្ចុប្បន្នភូមិរោងចក្រ សង្កាត់គោកឃ្លាង ខណ្ឌសែនសុខ រាជធានីភ្នំពេញ។ ជនខាងលើត្រូវចោទពីបទៈបើកបរដោយធ្វេសប្រហេស ខ្ជីខ្ជា មិនប្រុងប្រ័ត្នបណ្តាលឱ្យរបួសអ្នកដទៃ នៅចំណុផ្លូវលេខ២០១១ សង្កាត់គោគឃ្លាង ខណ្ឌសែនសុខ រាជធានីភ្នំពេញ កាលពីថ្ងៃទី២៤ ខែកញ្ញា ឆ្នាំ២០១៨ តាមបញ្ញាត្តិមាត្រា៨៣ នៃច្បាប់ស្តីពីចរាចរណ៍ផ្លូវគោក៕
