នាយឧត្តមសេនីយ៍ សន្ដិបណ្ឌិត នេត សាវឿន អញ្ជើញដឹកនាំកិច្ចប្រជុំផ្សព្វផ្សាយផែនការការពារសន្ដិសុខ និងសណ្ដាប់ធ្នាប់ ការប្រកួតកីឡាស៊ីហេ្គម លើកទី៣២ និងកីឡាអាស៊ានប៉ារ៉ាហ្គេម លើកទី១២ ឆ្នាំ២០២៣

រាជធានីភ្នំពេញ ៖ ព្រឹកថ្ងៃអង្គារ ទី២៧ ខែកញ្ញា ឆ្នាំ២០២២ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងជាប្រធានគណៈកម្មការសន្តិសុខ និងសណ្តាប់ធ្នាប់ នៃគណៈកម្មាធិការជាតិ CAMSOC បានអញ្ជើញដឹកនាំកិច្ចប្រជុំផ្សព្វផ្សាយផែនការការពារសន្តិសុខ និងសណ្តាប់ធ្នាប់ ក្នុងឱកាសពិធីប្រកួតកីឡាស៊ីហ្គេម លើកទី៣២ និងកីឡាអាស៊ានប៉ារ៉ាហ្គេម លើកទី១២ នៅនាយកដ្ឋានអង្គរក្ស។

កិច្ចប្រជុំនេះ ក៏មានការអញ្ជើញចូលរួមពី ឯកឧត្តម វ៉ាត់ ចំរើន រដ្ឋលេខាធិការក្រសួងទេសចរណ៍ និងជាអគ្គលេខាធិការគណៈកម្មការជាតិ CAMSOC, ឯកឧត្តម លោកជំទាវ ជាថ្នាក់ដឹកនាំកងកម្លាំង និងអាជ្ញាធរសមត្ថកិច្ចពាក់ព័ន្ធជាច្រើនរូបទៀត។
មានប្រសាសន៍នៅក្នុងកិច្ចប្រជុំ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងជាប្រធានគណៈកម្មការសន្តិសុខ និងសណ្តាប់ធ្នាប់ នៃគណៈកម្មាធិការជាតិ CAMSOC បានណែនាំអោយអាជ្ញាធរ កងកម្លាំង និងអង្គភាពពាក់ព័ន្ធទាំងអស់ ត្រូវប្រើប្រាស់កម្លាំងការពារអោយបានសមស្របទៅតាមទីតាំងជាក់ស្តែង និងមានការផ្លាស់ប្តូរវេន។ ឯកឧត្តម ក៏បានលើកទឹកចិត្តដល់គ្រប់បញ្ជាការអង្គភាពទាំងអស់ ចូលរួមយកចិត្តទុកដាក់ក្នុងកិច្ចការពារ ព្រោះនេះជាកិត្តិយសសម្រាប់ប្រទេសជាតិ ក៏ដូចជាសម្រាប់រាជរដ្ឋាភិបាល និងប្រជាពលរដ្ឋ ខណៈដែលកម្ពុជាទទួលធ្វើជាម្ចាស់ផ្ទះក្នុងការប្រកួតកីឡាស៊ីហ្គេម ហើយក៏ជាកាលៈទេសៈមួយដែលពិភពលោកកំពុងកើតមានបញ្ហាផ្សេងដូចជា៖ ជំងឺកូវីដ-១៩ បញ្ហាភេរវកម្ម សង្គ្រាមរុស្សី និងអ៊ុយក្រែន និងវិបត្តិសេដ្ឋកិច្ចទំនិញឡើងថ្លៃ។ រីឯបញ្ហាមួយវិញទៀតនៅមានជនឆ្លៀតឱកាស ខណៈនៅពេលមានពិធីបុណ្យផ្សេងៗមានមនុស្សច្រើន ហើយតែងមានបទល្មើសកើតមានឡើងទាំងករណី លួច ឆក់ ដូច្នេះត្រូវតែមានផែនការការពារអោយបានហ្មត់ចត់ និងច្បាស់លាស់។

ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន ក៏បានបញ្ជាក់ជូនអង្គប្រជុំពីគោលដៅអាទិភាពដែលត្រូវធ្វើការការពារ ដែលចាំបាច់ត្រូវមានការរៀបចំផែនការអោយបានច្បាស់លាស់ការពារពិធីដង្ហែរភ្លើងគុបពីប្រទេសឡាវ និងជុំវិញបឹងទន្លេសាប ជាពិសេសពិធីប្រគល់ភ្លើងគុបដែលប្រារព្ធធ្វើឡើងនៅខេត្តសៀមរាប ក្រោមព្រះរាជាធិបតីដ៏ខ្ពង់ខ្ពស់បំផុតរបស់ព្រះមហាក្សត្រ។ ទន្ទឹមនោះក្រៅពីការការពារទីលានប្រកួតនៅតាមរាជធានី ខេត្ត ក៏មានគោលដៅអាទិភាពផ្សេងទៀតដូចជា៖ ព្រលានយន្តហោះ កន្លែងស្នាក់នៅរបស់ថ្នាក់ដឹកនាំប្រតិភូ និងកីឡាករ និងគោលដៅសំខាន់ផ្សេងទៀត ដែលកិច្ចទាំងអស់នេះប្រគល់អោយគណៈបញ្ជាការឯកភាពរាជធានីខេត្តជាអ្នកទទួលខុសត្រូវទៅតាមទីតាំងក្នុងមូលដ្ឋានរៀងខ្លួន។ ឯកឧត្តម បានគូសបញ្ជាក់ថា ទីតាំងសំខាន់មួយទៀតដែលត្រូវការពារអោយបានដាច់ខាត គឺទីកន្លែងប្រារព្ធពិធីបើក និងបិទការប្រកួតកីឡាស៊ីហេ្គម លើកទី៣២ និងកីឡាអាស៊ានប៉ារ៉ាហ្គេម លើកទី១២ ឆ្នាំ២០២៣ ដែលមានវត្តមានចូលរួមរបស់ សម្តេចតេជោ ហ៊ុន សែន និងប្រជាពលរដ្ឋប្រមាណជិត៦ម៉ឺននាក់ចូលរួមទស្សនាផងដែរ។ ហើយក្រៅពីកម្លាំងអាជ្ញាធរមានសមត្ថិកិច្ចទាំង៣ប្រភេទ ឯកឧត្តម ក៏បានជំរុញអោយមានការចូលរួមសហការពីភ្នាក់ងារសន្តិសុខឯកជន និងសហភាពសហព័ន្ធយុវជនកម្ពុជា ផងដែរ។

ជាចុងក្រោយ ឯកឧត្តម នាយឧត្តមសេនីយ៍ នេត សាវឿន បានណែនាំបន្ថែមចំពោះការប្រើប្រាស់កម្លាំង គឺត្រូវប្រើកម្លាំងនគរបាល កម្លាំងអាវុធហត្ថ និងបញ្ជាការកងអង្គរក្សជាគោល រីឯកម្លាំងកងទ័ពសម្រាប់ត្រៀមបម្រុង។ នៅតាមបណ្តាខេត្តត្រូវប្រើប្រាស់ប្រជាការពារជាកម្លាំងជំនួយ ចំណែកនៅរាជធានីភ្នំពេញប្រើប្រាស់ភ្នាក់ងារសន្តិសុខឯកជន និងសហភាពសហព័ន្ធយុវជនកម្ពុជា ជាកម្លាំងជំនួយ។ គ្រប់គោលដៅត្រូវមានទីបញ្ជាការ និងត្រូវមានអ្នកទទួលខុសត្រូវហ្មត់ចត់។ ឯកឧត្តម ក៏បានជំរុញអោយគ្រប់អង្គភាពជំនាញដែលពាក់ព័ន្ធ សូមយកផែនការរួមដែលទទួលបាននៅពេលនេះរៀបចំបន្ស៊ីគ្នាឡើងវិញ ដើម្បីកសាងផែនការបញ្ចូលក្នុងផែនការរួម មានន័យថាផែនការទ្រឹស្តីបន្ស៊ីគ្នាជាមួយកម្លាំងជាក់ស្តែងអោយបានឯកភាពគ្នាទាំងកម្លាំងបញ្ជាការ និងកម្លាំងអនុវត្ត។ ត្រូវពង្រឹងបញ្ជាការគ្រប់គ្រងតាមប្រព័ន្ធវិទ្យុទាក់ទង តេឡេក្រាម និងវត្តអាប់ ដើម្បីបញ្ជារ ក៏ដូចជាទទួលបានភាពការណ៍រហ័សទាន់ពេលវេលា៕