ក្រុមហែលទឹក ពាក់ជើងទា បង្កើនការហ្វឹកហាត់

ភ្នំពេញ៖ក្នុងមហិច្ឆតារប្រជែងយកមេដាយនាស៊ីហ្គេមលើកទី៣២ឆ្នាំ២០២៣ដែលកម្ពុជាធ្វើជាម្ចាស់ផ្ទះនោះក្រុមហែលទឹកជម្រើសជាតិហែលទឹកពាក់ជើងទាចំនួន៦នាក់ក្នុងនោះកីឡាករ៤នាក់និងកីឡាការិនី២នាក់កំពុងបង្កើនហ្វឹកហាត់កានតែខ្លាំងក្លាជាងមុន។
លោក ហែមថុន ពន្លឺ គ្រូបង្វឹកជម្រើសជាតិផ្នែកហែលទឹកពាក់ជើងទា គូសបញ្ជាក់ ថា បច្ចុប្បន្ននេះក្រុមជម្រើជាតិហែលទឹកពាក់ជើងទាកំពុងសម្រុកហ្វឹកហាត់យ៉ាងសកម្មសម្រាប់ចំនួនកីឡាករ កីឡាការិនីទាំង៦នាក់ ដោយមិនទាន់បានស្វែងរកបន្ថែមនោះនៅឡើយ។ ម្យ៉ាងទៀត ពេលនេះមិនទាន់អាចបន្ថែមចំនួនបាន ដោយសារខ្វះខាតសម្ភារៈហ្វឹកហាត់ លើវិញ្ញាសាហែលជើងទានេះ។ នៅពេលខាងមុខឆាប់ៗនេះ ផ្នែកហែលជើងទា នឹងបន្ថែមចំនួនកីឡាករ កីឡាការិនីមួយចំនួនទៀត ពេលសម្ភារហ្វឹកហាត់មានគ្រប់គ្រាន់។

សម្រាប់កម្មវិធីហ្វឹកហាត់វិញ ត្រូវបានគ្រូបង្វឹករូបនេះអះអាងថា មានរយៈពេល៦ថ្ងៃ ក្នុងនោះ៣ថ្ងៃ គឺហែលទឹកសម្រាប់ត្រៀមចូលរួមប្រកួតកីឡាជាតិ លើកទី៣ នាខែវិច្ឆិកា ឆ្នាំ២០២២ រីឯ៣ថ្ងៃទៀត ពីថ្ងៃព្រហស្បតិ៍ ដល់ថ្ងៃសៅរ៍ គឺហែលពាក់ជើងទា។ ក្នុង១ថ្ងៃៗ ការហ្វឹកហាត់ធ្វើឡើងចំនួន២ពេល ក្នុង១ពេលៗ មាន៣ម៉ោង។ ដូច្នេះ ក្នុង១ថ្ងៃ មានចំនួន ៦ម៉ោង។
ក្រោយបញ្ចប់កម្មវិធីកីឡាជាតិការហ្វឹកហាត់នេះនឹងត្រូវកាត់ចោលការហែលទឹក៣ថ្ងៃនោះដោយបង្កើនម៉ោងហ្វឹកហាត់សម្រាប់វិញ្ញាសាហែលជើងទាសុទ្ធ។តាមផែនការសហព័ន្ធខ្មែរកីឡាហែលទឹកកំពុងទាក់ទងជាមួយខាងភាគីវៀតណាមដើម្បីបញ្ជូនក្រុមជម្រើសជាតិ
ហែលពាក់ជើងទា ទាំង៦នាក់ ទៅហ្វឹកហាត់នៅទីនោះ នាពេលខាងមុខ។

គ្រូបង្វឹករូបនេះ បានរំឭុកថា ជាមួយនឹងសមិទ្ធផលជាមេដាយ ២លើក កន្លងមក គឺមេដាយសំរឹទ្ធ១វិញ្ញាសា ក្នុងការប្រកួតកីឡាស៊ីហ្គេម លើកទី៣១ នៅប្រទេសវៀតណាម កាលពីខែឧសភា ឆ្នាំ២០២២ និងការប្រកួតពានរង្វាន់ហែលជើងទាពិភពលោក (Finswimming’s World Cup) កាលពីខែកញ្ញា ឆ្នាំ២០២២ នៅប្រទេសថៃ គឺជាកម្លាំងរុញឲ្យក្រុមជម្រើសជាតិនេះខិតខំពុះពារកាន់តែខ្លាំងក្លាដើម្បីជាក្តីសង្ឃឹមកាន់តែ
ខ្ពស់ដើម្បីឈានទៅដណ្តើមមេដាយជូនជាតិជាប្រវត្តិសាស្ត្រជាលើកដំបូងក្នុងពេលកម្ពុជាទទួលរៀបចំធ្វើម្ចាស់ផ្ទះ ស៊ីហ្គេម លើកទី៣២ ឆ្នាំ២០២៣។
លោកសង្ឃឹមថាតាមរយៈការប្រឹងប្រែងអស់ពីកម្លាំងកាយចិត្តរួមគ្នានេះប្រភេទកីឡាហែលពាក់ជើងទាកម្ពុជា នឹងទទួលបានលទ្ធផលល្អជាក់ជាមិនខាន។ កាលពីត្រៀមស៊ីហ្គេម ២០២២ នៅវៀតណាម យើងទើបនឹងចាប់ផ្តើមរយៈពេលខ្លី ប៉ុន្តែយើងទទួលបានលទ្ធផលល្អ។ ការត្រៀមស៊ីហ្គេម ២០២៣ យើងនឹងមានពេលវេលាមួយវែងជាង ជាមួយនឹងការហ្វឹកហាត់ បង្កើនការហ្វឹកហាត់នៅប្រទេសវៀតណាមបន្ថែមដោយសារប្រទេសវៀតណាមគឺជាជើងឯកលើវិញ្ញាសាហែលជើងទានេះ។ ដូច្នេះ កត្តាត្រៀមខ្លួនរួមផ្សំទាំងអស់នេះ យើងរំពឹងថា យើងនឹងទទួលបានលទ្ធផលល្អជូនជាតិ ក្នុងពេលស៊ីហ្គេម ២០២៣ ជាក់ជាមិនខាន៕