ឃុំខ្លួន ថៅកែទិញ-លក់រថយន្ត ពាក់ព័ន្ធ យកកាតគ្រីឡាន ៩គ្រឿង ទៅបញ្ចាំយកលុយជាង ១២ម៉ឺនដុល្លារ
ភ្នំពេញ៖ លោក អ៊ឹម វណ្ណៈ ចៅក្រមស៊ើបសួរ នៃសាលាដំបូងរាជធានីភ្នំពេញ នៅរសៀលថ្ងៃទី១ ខែតុលា ឆ្នាំ២០១៨នេះ
បានចេញដីការបង្គាប់ឱ្យឃុំខ្លួនជន ថៅកែលក់រយន្ត ករណីរំលោភលើទំនុកចិត្ត យកលុយចំនួន១២៧៥០០ដុល្លារ ដាក់ពន្ធនាគារ ដើម្បីរង់ចាំជំនុំជម្រះទោសជាក្រោយ។
ការសម្រេចរបស់លោកចៅក្រមស៊ើប គឺធ្វើឡើងបន្ទាប់ពីលោក ខាំ សុផារី ព្រះរាជអាជ្ញរង អមសាលាដំបូងរាជធានីភ្នំពេញ
បានចោទប្រកាន់ថៅកែលក់រថយន្តឈ្មោះ ប្រាក់ ប៊ុណ្ណា ពីបទ រំលោភលើទំនុកចិត្ត តាមមាត្រា៣៩១, ៣៩២នៃក្រមព្រហ្មទណ្ឌ។
យោងតាមរបាយការណ៍សមត្ថកិច្ចបានបញ្ជាក់ថា ដើមចម នៃរឿងរ៉ាវនេះបានកើតឡើង គឺបុរសនោះ ត្រូវបានប៉ូលិសខណ្ឌទួលគោក ចាប់ខ្លួន កាលពីថ្ងៃទី២៧ ខែកញ្ញា ឆ្នាំ២០១៨ វេលាម៉ោង ១៨ និង ២០នាទី ដោយចោទពីបទរំលោភលើទំនុកចិត្ត ( យកលុយចំនួន ១២៧៥០០ដុល្លារ ) តាមរយៈយករថយន្តចំនួន ៩គ្រឿង មកបង្ហាញឱ្យជនរងគ្រោះឃើញ និងតម្កល់កាតគ្រីរថយន្តចំនួន ៩សន្លឹក ឱ្យជនរងគ្រោះទុកចិត្ត )។ ប៉ុន្តែទីបំផុត មិនមានឡានទាំង ៩គ្រឿងនោះទេ គឺម្ចាស់លុយ បានត្រឹមតែយកកាតគ្រីឡានប៉ុណ្ណោះ។
បុរសនោះ ត្រូវបានឃាត់ខ្លួន នៅចំណុចការ៉ាស់សាំងសូគីមិច ផ្លូវ លេខ១១០ ក្រុមទី៣៣ ភូមិ១០ សង្កាត់ផ្សារដេប៉ូទី៣ ខណ្ឌទួលគោក រាជធានីភ្នំពេញ។
ជនសង្ស័យ បានប្រព្រឹត្តបទល្មើស នៅចំណុចយានដ្ឋាន លាងរថយន្ត គ្មានយីហោ នៅផ្លូវលំ ភូមិទួលគោក សង្កាត់ទួលសង្កែរ ខណ្ឌឬស្សីលកែវ រាជធានភ្នំពេញ កាលពីអំឡុងក្នុងឆ្នាំ២០១៥។
លោកវរសេនីយ៍ទោ សុខ ហេង អធិការខណ្ឌទួលគោក បានឱ្យដឹងថា ជនសង្ស័យឈ្មោះ ប្រាក់ ប៊ុណ្ណា ភេទប្រុស អាយុ ៤៧ឆ្នាំ ជនជាតិខ្មែរ មុខរបរ ទិញ-លក់រថយន្ត ស្នាក់នៅផ្ទះលេខ៧ ផ្លូវ លេខ៥២៨ សង្កាត់បឹងកក់ទី១ ខណ្ឌទួលគោក រាជធានីភ្នំពេញ។ រីឯជនរងគ្រោះឈ្មោះ ប្រាក់ ពិសិដ្ឋ ភេទប្រុស អាយុ ៣៣ឆ្នាំ ជនជាតិខ្មែរ មុខរបរ អាជីវករ ស្នាក់នៅផ្ទះលេខ៣០ ផ្លូវបើកថ្មី សង្កាត់ទំនប់ទឹក ខណ្ឌចំការមន រាជធានីភ្នំពេញ។
ប៉ូលិសបន្តថា ជនរងគ្រោះ បានប្រគល់ប្រាក់សរុបចំនួន ១២៧៥០០ ដុល្លារ ទៅជនសង្ស័យ ជាថ្នូរនឹងការដាក់ឡានបញ្ចាំទាំង ៩គ្រឿង។ តែទីបំផុត ជនរងគ្រោះ បានត្រឹមតែកាតគ្រីប៉ុណ្ណោះ។ កាលពីកំឡុងក្នុងឆ្នាំ២០១១ រហូតដល់ឆ្នាំ២០១៤ ជនរងគ្រោះឈ្មោះ ប្រាក់ ពិសិដ្ឋ ភេទប្រុស អាយុ៣៣ឆ្នាំ ជនជាតិខ្មែរ បានបើកប្រកបមុខរបរ ទិញ-លក់រថយន្ត នៅឃ្លាំងដីឡូត៍ ពុំចាំលេខ ផ្លូវលំ ក្នុងភូមិទួលគោក សង្កាត់ទួលសង្កែរ ខណ្ឌឬស្សីកែវ រាជធានីភ្នំពេញ នៅជាប់យានដ្ឋានលាង រថយន្ត របស់ជនសង្ស័យឈ្មោះ ប្រាក់ ប៊ុណ្ណា ភេទប្រុស អាយុ៤៧ឆ្នាំ ជនជាតិខ្មែរ ក្នុងពេលនោះ ជនសង្ស័យឈ្មោះ ប្រាក់ ប៊ុណ្ណា បានយកលុយចំនួន ១២៧៥០០$ (ដប់ពីរម៉ឺនប្រាំពីរពាន់ប្រាំរយដុល្លារ សហរដ្ឋអាមេរិក ) ដោយយករថយន្តចំនួន ៩គ្រឿង ស៊េរីទំនើប មកបង្ហាញឲ្យជនរងគ្រោះឃើញ និងតំកល់ទុកកាតគ្រីរថយន្តខាងលើ ចំនួន ០៩សន្លឹក ឲ្យជនរងគ្រោះទុកចិត្ត ) រួចហើយ យកលុយពីជនរងគ្រោះ ទៅរកស៊ីទិញ-លក់រថយន្ត ពេលចំណេញ ទើបយកលុយមកចែកឲ្យជនរងគ្រោះវិញ ក្រោយពេលដែលយក លុយពីជនរងគ្រោះហើយ រហូតមកដល់ក្នុងឆ្នាំ២០១៥ ស្រាប់តែជនសង្ស័យឈ្មោះ ប្រាក់ ប៊ុណ្ណា គេចខ្លួនបាត់ រហូតព្រមទាំងបាត់រថយន្តចំនួន ០៩គ្រឿងខាងលើដែរ នៅសល់តែប័ណ្ណសំគាល់យានយន្ត ដែលជនសង្ស័យ យកមកដាក់តំកល់នៅនឹងជនរងគ្រោះ ក្រោយមក ជនរងគ្រោះបានព្យាយាមស្វែងរកជនសង្ស័យឈ្មោះ ប្រាក់ ប៊ុណ្ណា និងរករថយន្តខាងលើទាំង ០៩គ្រឿង លុះមកដល់ថ្ងៃទី២៧ ខែកញ្ញា ឆ្នាំ២០១៨ វេលាម៉ោងប្រហែល ១៦ និង ១០នាទី ជនរងគ្រោះបានប្រទះឃើញរថយន្តមួយគ្រឿងម៉ាក MERCEDES. BENZ C240 ពណ៌ទឹកប្រាក់ ពាក់ស្លាកលេខ ភ្នំពេញ 2Y-6446 ដែលជនសង្ស័យយកបង្ហាញ ក្នុងពេលតំកល់កាតគ្រី យកលុយទៅ ស្ថិតនៅស្ថានីយចាក់ប្រេងសាំងសូគីមិច ផ្លូវលេខ១១០ ក្រុមទី៣៣ ភូមិ១០ សង្កាត់ផ្សារដេប៉ូទី៣ ខណ្ឌទួលគោក រាជធានីភ្នំពេញ ដោយនៅនឹងឈ្មោះ ខៀវ សេរី ភេទប្រុស អាយុ ៤៩ឆ្នាំ ជនជាតិខ្មែរ កំពុងបើកបរ ក៏ប្តឹងសមត្ថកិច្ចយើង ឲ្យជួយអន្តរាគមន៍ ឃាត់រថយន្តនេះ ទើបឃើញជនសង្ស័យឈ្មោះ ប្រាក់ ប៊ុណ្ណា មកដល់ ជនរងគ្រោះ ក៏ឃាត់ខ្លួនជនសង្ស័យឈ្មោះ ប្រាក់ ប៊ុណ្ណា និងនាំយករថយន្តខាងលើ មកកាន់អធិការដ្ឋាននគរបាលខណ្ឌទួលគោក ដើម្បីសាកសួរ តែម្ដង។
ដោយឡែក ឈ្មោះ ខៀវ សេរី (ជាអ្នកទិញរថយន្តពីឈ្មោះ ប្រាក់ ប៊ុណ្ណា ) ក្រោយពីធ្វើការសាករួច សមត្ថកិច្ចយើង បានឲ្យត្រឡប់ទៅលំនៅឋានវិញ និងធ្វើការដកហូតរថយន្ត ទុកនៅអធិការដ្ឋាននគរបាលខណ្ឌទួលគោក រក្សារទុកជាបណ្ដោះអាសន្ន។
ជនសង្ស័យខាងលើ ត្រូវបានឃាត់ខ្លួនជាបណ្តោះអាសន្ន នៅអធិការដ្ឋាននគរបាលខណ្ឌទួលគោក ដើម្បីសាកសួរ និងកសាងសំណុំរឿង បញ្ជូនទៅសាលាដំបូង រាជធានីភ្នំពេញ ចាត់ការតាមផ្លូវច្បាប់៕