ចំបាប់ជើងឯកអាស៊ីអាគ្នេយ៍ ចាប់ផ្ដើមប្រកួតហើយ

ភ្នំពេញ៖ការប្រកួតកីឡាចំបាប់ជើងឯកអាស៊ីអាគ្នេយ៍បានបើកការប្រកួតជាផ្លូវការហើយនៅថ្ងៃទី១៦ធ្នូនេះនាសាលដំបូលទូកសកលវិទ្យាល័យភូមិន្ទភ្នំពេញ។
ព្រឹត្តិការណ៍នេះមានកីឡាករ-កីឡាការិនីចូលរួមសរុប ១១៥នាក់ មកពី ៧ប្រទេស រួមមានម្ចាស់ផ្ទះកម្ពុជា វៀតណាម ថៃ សិង្ហបុរី ហ្វីលីពីន ឥណ្ឌូនេស៊ី និងឡាវ។ ក្រៅពីនេះ ក៏មានជំនាញការមកពីសហព័ន្ធចំបាប់អន្តរជាតិ(UWW)រួមទាំងមន្ដ្រីបច្ចេកទេសអាជ្ញាកណ្ដាល-ចៅក្រមអន្ដរជាតិ មកពីប្រមាណ ១០ប្រទេស ចូលរួមកាត់សេចក្ដី និងរៀបចំការប្រកួតនេះ ជាមួយមន្ដ្រីបច្ចេកទេស និងអាជ្ញាកណ្ដាល-ចៅក្រមកម្ពុជា។
លោកខេស៊ីបាណេតអនុប្រធានសហព័ន្ធកីឡាចំបាប់កម្ពុជានិងជាប្រធានសហព័ន្ធកីឡាចំបាប់អាស៊ីអាគ្នេយ៍បានគូសបញ្ជាក់ថាការប្រកួតកីឡាចំបាប់ជ្រើសរើសជើងឯកអាស៊ីអាគ្នេយ៍ឆ្នាំ២០២២គឺជាការជំរុញលក្ខណៈគ្រប់ជ្រុងជ្រោងបន្ថែមទៀតសម្រាប់ដំណើរឆ្ពោះទៅធ្វើម្ចាស់ផ្ទះ ការប្រកួតកីឡាស៊ីហ្គេម ឆ្នាំ២០២៣ ដែលកម្ពុជារង់ចាំអស់ ៦៤ឆ្នាំ។
លោកខេស៊ីបានសម្ដែងការអរគុណដល់ក្រសួងអប់រំយុវជននិងកីឡាគណៈកម្មាធិការជាតិរៀបចំស៊ីហ្គេមឆ្នាំ២០២៣និងគណៈកម្មាធិការជាតិអូឡាំពិកកម្ពុជាសហព័ន្ធកីឡាចំបាប់
អន្ដរជាតិ(UWW)និងគ្រប់ស្ថាប័នពាក់ព័ន្ធចំពោះកិច្ចសហប្រតិបត្តិការយ៉ាងល្អក្នុងការរៀបចំការប្រកួតនេះ ហើយលោកក៏បានស្វាគមន៍យ៉ាងកក់ក្ដៅ ចំពោះប្រតិភូ និងអត្តពលិកទាំងអស់ ដែលចូលរួមការប្រកួតនេះ។
ព្រឹត្តិការណ៍នេះមិនត្រឹមតែជាព្រឹត្តិការណ៍កីឡាអន្ដរជាតិមួយយ៉ាងសំខាន់សម្រាប់កម្ពុជាប៉ុណ្ណោះទេប៉ុន្ដែជាការបន្ដកសាងសមត្ថភាពទេពកោសល្យនិងជំនាញវិជ្ជាជីរៈរបស់កីឡាករកីឡាការិនីកម្ពុជាដើម្បីត្រៀមខ្លួនជាស្រេចសម្រាប់ការប្រកួតកីឡាស៊ីហ្គេមនិងអាស៊ានប៉ារ៉ា
ហ្គេម ឆ្នាំ២០២៣។ ការប្រកួតនេះ គឺក្នុងគោលបំណង ជួយលើកកម្ពស់ អប់រំ សុខុមាលភាព ខាងផ្លូវចិត្តផ្លូវកាយនិងបច្ចេកទេសដល់កីឡាករកីឡាការិនីទាំងអស់ដើម្បីត្រៀមលក្ខណៈសម្បត្តិក្នុងការប្រកួត ហើយដែលជាឱកាសផ្ដល់នូវមេរៀនបទពិសោធន៍ល្អៗទៀតផង។
លោកអនុប្រធានសហព័ន្ធក៏បានថ្លែងអំណរគុណដល់បណ្ដាប្រទេសនានាដែលបាន
ចូលរួមវគ្គសិក្សា IT វគ្គបណ្ដុះបណ្ដាលអាជ្ញាកណ្ដាល-ចៅក្រម វគ្គគ្រូបង្វឹក វគ្គបោះជំរំ ដែលបានសហការជាមួយជំនាញការមកពីUWWនិងគណៈកម្មការរៀបចំប្រកួតគណៈកម្មាធិការបច្ចេកទេស និងផ្នែកពាក់ព័ន្ធទាំងអស់ ក្នុងគោលបំណងអភិវឌ្ឍវិស័យកីឡាមួយនេះ ឲ្យរីកចម្រើនទៅមុខ និងប្រសើរ សម្រាប់សហព័ន្ធកីឡាចំបាប់កម្ពុជា៕