គណៈប្រតិភូជាន់ខ្ពស់ទីក្រុងហូជីមិញ បានអញ្ជើញមកដល់ អាកាសយានដ្ឋានអន្តរជាតិភ្នំពេញហើយ ដើម្បីបំពេញទស្សនកិច្ចផ្លូវការនៅព្រះរាជាណាចក្រកម្ពុជា៣ថ្ងៃ

ភ្នំពេញ៖ គណៈប្រតិភូជាន់ខ្ពស់ទីក្រុងហូជីមិញ ដឹកនាំដោយ លោក ង្វៀន វ៉ាន់ នេន សមាជិកការិយាល័យនយោបាយបក្សកុម្មុយនិស្តវៀតណាម និងជាលេខាគណៈកម្មាធិការបក្សទីក្រុងហូជីមិញ នារាត្រីថ្ងៃសុក្រ ទី១៦ ខែធ្នូ ឆ្នាំ២០២២នេះបានអញ្ជើញមកដល់អាកាសយានដ្ឋានអន្តរជាតិភ្នំពេញដោយសុវត្ថិភាព ដើម្បីបំពេញទស្សនកិច្ចផ្លូវការនៅព្រះរាជាណាចក្រកម្ពុជាចំនួន៣ថ្ងៃ។
គណៈប្រតិភូ ត្រូវបានទទួលយ៉ាងរាក់ទាក់ពីសំណាក
លោកនួន ផារ័ត្ន អភិបាលរងរាជធានីភ្នំពេញ តំណាងអោយ លោកឃួង ស្រេង អភិបាលរាជធានីភ្នំពេញ ,សមាជិកគណៈកម្មាធិការកណ្តាលគណបក្សប្រជាជាជនកម្ពុជា និងជាប្រធានគណៈកម្មាធិការគណបក្សប្រជាជាជនកម្ពុជារាជធានីភ្នំពេញ ដល់អាកាសយានដ្ឋានអន្តរជាតិភ្នំពេញតែម្តង។
តាមគម្រោងគណៈប្រតិភូជាន់ខ្ពស់ទីក្រុងហូជីមិញនឹងអញ្ជើញបំពេញទស្សនកិច្ចជាផ្លូវការនៅព្រះរាជាណាចក្រកម្ពុជា ចាប់ពីថ្ងៃទី១៦ ដល់ថ្ងៃទី១៨ ខែធ្នូ ឆ្នាំ២០២២ ក្នុងនោះរួមមាន៖ នៅព្រឹកថ្ងៃទី១៧ធ្នូ ស្អែកនេះ គណៈប្រតិភូនឹងជួបសម្តែងការគួរសមជាមួយលោកឃួង ស្រេង អភិបាលរាជធានីភ្នំពេញ ,សមាជិកគណៈកម្មាធិការកណ្តាលគណបក្សប្រជាជាជនកម្ពុជា និងជាប្រធានគណៈកម្មាធិការគណបក្សប្រជាជាជនកម្ពុជារាជធានីភ្នំពេញនៅសាលារាជធានីភ្នំពេញ ហើយបន្តមកនៅថ្ងៃអាទិត្យ ទី១៨ ខែធ្នូ ឆ្នាំ២០២២ គណៈប្រតិភូជាន់ខ្ពស់ទីក្រុងហូជីមិញអញ្ជើញនឹងអញ្ជើញនិវត្តន៍ទៅកាន់មាតុប្រទេសវិញ៕