សហព័ន្ធកីឡាវាយកូនគោលកម្ពុជា បាន នាំនូវវិភាគទានចំនួន ៥០.០០០ ដុល្លារអាមេ រិក ចូលរួមគាំទ្រដល់គម្រោងសម្តេចតេជោសម្រាប់សកម្មភាពមីនផ្តល់ដីសុវត្ថិភាព បង្កើតស្នាមញញឹម

ភ្នំពេញ៖ នៅទីស្នាក់ការ អាជ្ញាធរមីន លោក ជា បូរ៉ា រដ្ឋលេខាធិការក្រសួងទេសចរណ៍ និងជាអគ្គលេខាធិការសហព័ន្ធកីឡាវាយកូនគោល កម្ពុជា តំណាងដ៏
ខ្ពង់ខ្ពស់ សម្តេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ និងជាប្រធានសហព័ន្ធកីឡាវាយកូន គោលកម្ពុជា បាននាំយកនូវវិភាគទានសប្បុរធម៌ចំនួន៥០.០០០ដុល្លារអាមេរិក របស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ប្រគល់ជូនអាជ្ញាធរមីន ដើម្បីចូលរួមគាំទ្រដល់គម្រោងសម្តេចតេជោសម្រាប់សកម្មភាពមីន “ផ្តល់ដីសុវត្ថិភាព បង្កើតស្នាម ញញឹម ដែលថវិកានេះ ទទួលបានពីការចូល រួមឧបត្ថម្ភក្នុងព្រឹត្តិការណ៍ប្រកួតកីឡាវាយកូនគោល “ពានរង្វាន់សម្ដេចតេជោនាយករដ្ឋមន្ត្រី លើកទី៦”កាលពីថ្ងៃទី២៤ ខែធ្នូ ឆ្នាំ២០២២កន្លង ទៅនេះ ។ ពិធីនេះបានប្រព្រឹត្ដទៅកាលពី រសៀលម្សិលមិញ កុម្ភៈ ឆ្នាំ២០២៣ នៅស្នាក់ការកណ្ដាលផ្ទាល់ ។
លោកទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន បានថ្លែងអំណរគុណយ៉ាងជ្រាលជ្រៅជូនចំពោះសហព័ន្ធកីឡាវាយកូនគោលកម្ពុជា ក្រោមការដឹកនាំរបស់ សម្តេចពិជ័យសេនា ដែលបាននាំយកនូវថវិការបស់សម្តេចតេជោនាយករដ្ឋមន្រ្តី ក្នុងការចូលរួមដោះស្រាយបញ្ហាមីននៅកម្ពុជា ហើយវិភាគទាននេះ នឹងអាចចូលរួមផ្តល់នៅភាពកក់ក្តៅជូនប្រជាពលរដ្ឋបានយ៉ាងច្រើន ក៏ដូចជាជួយផ្សព្វផ្សាយ និងជម្រុញវិស័យទេសចរណ៍កម្ពុជា ឲ្យមានភាពកាន់តែទាក់ទាញ និងប្រកប ដោយសុវត្ថិភាព។
លោកទេសរដ្ឋមន្រ្តី បានមានប្រសាសន៍ថា ដោយមានការគាំទ្រពីរាជរដ្ឋាភិបាល ប្រទេសជាមិត្ត ដៃគូអភិវឌ្ឍន៍ និងសប្បុរសជននានា កម្ពុជាអាចយកឈ្នះសង្រ្គាមប្រយុទ្ធប្រឆាំងនឹងគ្រាប់មីន និងអាចឈានទៅប្រកាសកម្ពុជាគ្មានមីនឆ្នាំ២០២៥ ស្របតាមទស្សនវិស័យរបស់សម្តេចតេជោនាយករដ្ឋមន្រ្តី៕ សំរិត