ទេសរដ្ឋមន្រ្តី ចម ប្រសិទ្ធ ជំរុញឲ្យមន្ទីរឧស្សាហកម្មខេត្តប៉ៃលិន យកចិត្តទុកដាក់ឲ្យបានម៉ត់ចត់បំផុត លើការងារមាត្រាសាស្ត្រ គឺដាច់ខាតអនុវត្តឲ្យបានត្រឹមត្រូវ គឺជញ្ជីងថ្លឹងផលិតផលកសិផលប្រជាពលរដ្ឋ ក្នុងរដូវប្រមូលផល
ប៉ៃលិន ៖ ឯកឧត្តមកិត្តិសេដ្ឋាបណ្ឌិត ទេសរដ្ឋមន្រ្តី ចម ប្រសិទ្ធ បានលើកឡើងដោយបានសង្កត់ធ្ងន់ឲ្យមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ខេត្តប៉ៃលិន យកចិត្តទុកដាក់ឲ្យបានម៉ត់ចត់បំផុត លើការងារមាត្រាសាស្ត្រ គឺដាច់ខាតអនុវត្តឲ្យបានត្រឹមត្រូវជាពិសេស គឺជញ្ជីងថ្លឹងផលិតផលកសិផលប្រជាពលរដ្ឋ ក្នុងរដូវប្រមូលផល ដូចជា ដំឡូងមី ពោត ស្វាយ តាង៉ែន ឬដំណាំហូបផ្លែដ៏ទៃទៀត គឺត្រូវប្រាកដថាជញ្ជីងថ្លឹងលើកសិផលទាំងនោះ មានភាពត្រឹមត្រូវមិនលំអៀង គឺមិនស៊ីភ្នែកជញ្ជីង គឺក្នុងគោលបំណងការពារផលប្រយោជន៍ប្រជាកសិករយើងគ្រប់រូប ដែលខិតខំប្រកបរបរដាំដុះដោយលំបាក។
នៅព្រឹកថ្ងៃទី១២ ខែមីនា ឆ្នាំ២០២៣ ឯកឧត្ដមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្រ្តី រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានអញ្ជើញជាអធិបតីក្នុងពិធីប្រកាសតែងតាំងមុខតំណែងប្រធានមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ខេត្តប៉ៃលិន នៅមន្ទីរអប់រំយុវជន និងកីឡា ខេត្តប៉ៃលិន ។
មានប្រសាសន៍នាឱកាសនោះ ឯកឧត្ដមកិត្តិសេដ្ឋាបណ្ឌិត ទេសរដ្ឋមន្រ្តី ចម ប្រសិទ្ធ បានពាំនាំនូវការផ្តាំផ្ញើ សាកសួរសុខទុក្ខដោយក្តីនឹករលឹកពីសំណាក់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និង សម្តេចកិត្តិព្រឹទ្ធបណ្ឌិត ផ្ញើជូនចំពោះថ្នាក់ដឹកនាំខេត្ត ស្រុក ក្រុង គ្រប់លំដាប់ថ្នាក់ មន្ត្រីរាជការ, កងកម្លាំងប្រដាប់អាវុធគ្រប់ប្រភេទ រួមទាំងប្រជាពលរដ្ឋរបស់យើងនៅខេត្តប៉ៃលិនទាំងអស់ ដែលបានខិតខំរួមចំណែកជាមួយរាជរដ្ឋាភិបាល ចូលរួមថែរក្សាការពារសុខសន្តិភាព សណ្តាប់ធ្នាប់ សាធារណៈ រក្សាបានស្ថិរភាពនយោបាយ ស្ថិរភាពសង្គម និងជំរុញការអភិវឌ្ឍសេដ្ឋកិច្ច សង្គមលើគ្រប់វិស័យ ។
យើងទាំងអស់គ្នាពិតជាមានភាពកក់ក្តៅ និងក្តីសប្បាយរីករាយជាខ្លាំង ដោយបានឃើញប្រទេសជាតិ មានសុខសន្តិភាពពេញលេញបរិបូរណ៍ មានឱកាសអភិវឌ្ឍជាតិមាតុភូមិ រហូតសម្រេចបាននូវការ រីកចម្រើនលូតលាស់លើគ្រប់វិស័យ និងមានអ្វីៗគ្រប់បែបយ៉ាងដូចបច្ចុប្បន្ននេះ ដែលពីមុនមក យើងមិននឹកស្មានដល់។ សមិទ្ធផលដ៏ថ្លៃថ្លាមិនអាចកាត់ថ្លៃបានទាំងអស់នេះ បានកើតមានឡើង ក្រោម “ម្លប់សន្តិភាព” ដែលមានតម្លៃជាប្រវត្តិសាស្ត្រសម្រាប់ប្រជាជាតិយើង ក្រោមការដឹកនាំដ៏ ឈ្លាសវៃ ត្រឹមត្រូវ ប្រកបដោយគតិបណ្ឌិតដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា។
ស្នាដៃដឹកនាំប្រទេសនេះ គឺជាមោទនភាព ជាតិ និងជាកាលានុវត្តន៍ភាពដ៏អស្ចារ្យ ដែលពុំត្រឹមតែប្រជាជនកម្ពុជាប៉ុណ្ណោះទេ ដែលទទួលស្គាល់ នូវសច្ចភាពនេះ ប៉ុន្តែត្រូវបានមជ្ឈដ្ឋានអន្តរជាតិ និងប្រទេសលើសកលលោកទទួលស្គាល់ជាសកល និងកត់ត្រាជាគំរូ។ ផ្តើមចេញពីជោគជ័យដ៏ប្រត្យក្សនេះ ទើបនាំមកនូវវិបុលភាព សុខដុមរមនា ហើយប្រទេសជាតិរបស់យើងបានបន្តការអភិវឌ្ឍប្រទេសលើគ្រប់វិស័យ ហើយនាំមកនូវការកែប្រែ កំណើនសេដ្ឋកិច្ចជាតិ ដែលរងផលប៉ះពាល់ពីវិបត្តិជំងឺកូវីដ-១៩ ពីអត្រាអវិជ្ជមាន -៣,១% នៅក្នុង ឆ្នាំ២០២០ ជំរុញទៅជាកំណើនវិជ្ជមានដល់ ៥,២% ក្នុងឆ្នាំ២០២២កន្លងមក។
តាមការព្យាករណ៍, ជាមួយនឹងបរិយាកាសអំណោយផលខាងបរិស្ថានសេដ្ឋកិច្ច សង្គម និងវិនិយោគបែបនេះ កម្ពុជាអាច នឹងបន្តសម្រេចបានអាត្រាកំណើនសេដ្ឋកិច្ចក្នុងរង្វង់ ៥,៦% ក្នុងឆ្នាំ២០២៣នេះ។
ជាមួយនឹងការអបអរសាទរចំពោះលោក ដួង អ៊ីម ដែលត្រូវបានតែងតាំងជាប្រធានមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងបានណែនាំឲ្យលោកដួង អ៊ីម បន្តខិតខំបំពេញភារកិច្ចជូនក្រសួង និងជូនខេត្ត ក្នុងការបម្រើប្រជាពលរដ្ឋ, ធុរជន អាជីវករនានាក្នុងខេត្ត ,ដោះស្រាយបញ្ហាប្រឈមនានាក្នុងអង្គភាព, រក្សាឱ្យបាននូវធ្លុងសាមគ្គីភាព ឯកភាពគ្នាក្នុងមន្ទីរ ហើយសកម្មធ្វើការងារ, ហ៊ានធ្វើ ហ៊ានទទួលខុសត្រូវ និងធ្វើជាគំរូល្អដល់មន្ត្រី ក្រោមឱវាទរួចមក ឯកឧត្តមកិត្តិសេដ្ឋាបណ្ឌិត ទេសរដ្ឋមន្រ្តី ចម ប្រសិទ្ធ បានលើកឡើងពីភារកិច្ចរបស់ក្រសួង ហើយបានសង្កត់ធ្ងន់ឲ្យមន្ទីរយកចិត្តទុកដាក់ឲ្យបានម៉ត់ចត់បំផុតលើការងារមាត្រាសាស្ត្រ គឺដាច់ខាតអនុវត្តឲ្យបានត្រឹមត្រូវជាពិសេស គឺជញ្ជីងថ្លឹងផលិតផលកសិផលប្រជាពលរដ្ឋ ក្នុងរដូវប្រមូលផល ដូចជា ដំឡូងមី ពោត ស្វាយ តាង៉ែន ឬដំណាំហូបផ្លែដ៏ទៃទៀត គឺត្រូវប្រាកដថាជញ្ជីងថ្លឹងលើកសិផលទាំងនោះ មានភាពត្រឹមត្រូវមិនលំអៀង គឺមិនស៊ីភ្នែកជញ្ជីង គឺក្នុងគោលបំណងការពារផលប្រយោជន៍ប្រជាកសិករយើងគ្រប់រូប ដែលខិតខំប្រកបរបរដាំដុះដោយលំបាក ៕
