៥ថ្ងៃ នាឱកាសភ្ជុំបិណ្ឌ មានប្រជាពលរដ្ឋ ជិត២ម៉ឺននាក់ ប្រើប្រាស់សេវារថយន្តក្រុងសាធារណៈ ទៅមកស្រុកកំណើត-ភ្នំពេញ ដោយឥតថ្លៃ
ភ្នំពេញ៖ អនុវត្តតាមប្រសាសន៍ សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា ដោយបានគិតគូ និងសម្រួលដល់ការចំណាយ ក្នុងការធ្វើដំណើររបស់មន្រ្តីរាជការ កងកម្លាំងប្រដាប់អាវុធ បងប្អូនប្រជាពលរដ្ឋ កម្មករ កម្មារិនី ក្នុងឱកាសបុណ្យភ្ជុំបិណ្ឌនេះ បានឲ្យរដ្ឋបាលរាជធានីភ្នំពេញ រៀបចំរថយន្តក្រុង ចំនួន២១៥គ្រឿង សម្រាប់បម្រើសេវា ដឹកជញ្ជូនសាធារណៈ ដោយមិនបង់ប្រាក់ ត្រូវបានអ្នកនាំពាក្យសាលារាជធានីភ្នំពេញ ឲ្យដឹងថា ត្រឹមរយៈពេល៥ថ្ងៃ មានប្រជាពលរដ្ឋ បានទទួលសេវានេះ ប្រមាណជិត ២ម៉ឺននាក់ ។
លោក ម៉េត មាសភក្តី អ្នកនាំពាក្យសាលារាជធានីភ្នំពេញ នៅថ្ងៃទី១០ ខែតុលា ឆ្នាំ២០១៨នេះ បានឲ្យដឹងថា “រយៈពេល៥ថ្ងៃកន្លងទៅនេះ សាលារាជធានីភ្នំពេញ បានធ្វើការដឹកជញ្ជូន ប្រជាពលរដ្ឋខ្មែរ ដោយឥតគិតថ្លៃ ប្រមាណជិត២ម៉ឺននាក់ ទៅកាន់ស្រុកកំណើត និងត្រលប់មកភ្នំពេញវិញ នៅក្នុងឱកាសបុណ្យភ្ជុំបិណ្ឌ ប្រពៃណីជាតិ” ។
អ្នកនាំពាក្យសាលារាជធានីភ្នំពេញ បានបន្ថែមថា តាមរយៈការផ្តល់សេវាដឹកជញ្ជូន តាមរថយន្តក្រុងចំនួន២១៥គ្រឿង (ទៅមកបណ្តាខេត្ត ១២០គ្រឿង) ដោយឥតបង់ប្រាក់ដែលបានគ្រោងទុក រយៈពេល៦ថ្ងៃនេះ រំពឹងថានឹងមានប្រជាពលរដ្ឋ មិនតិចជាង ២៥ ០០០នាក់ទេ ដែលបានទទួលសេវានេះ៕
