កុមារីតូចម្នាក់ក្លាយជាសិស្សឆ្នើមទទួលបានជ័យលាភីគិតលេខរហ័ស ត្រៀមខ្លួនទៅដណ្តើមពាននៅប្រទេសម៉ាឡេស៊ី
ភ្នំពេញ៖ សាលាអាយឃីដ កម្មវិធី UCMAS បានរៀបចំកម្មវិធីជំនួបសិស្សឆ្នើមជ័យលាភី ប្រឡងថ្នាក់ជាតិលើកទី៣ របស់ខ្លួន នៅមជ្ឈមណ្ឌលសហប្រតិបត្តិការកម្ពុជា-កូរ៉េ(CKCC) ក្នុងគោលបំណងចែកវិញ្ញាបនបត្រ និងបទចែករំលែកស្តីពីវិធីសាស្រ្តសំខាន់ៗ ដែលទាក់ទងនឹងការត្រៀមខ្លួន ដើម្បីទទួលជ័យលាភី ក្នុងការប្រឡងកម្មវិធីប្រកួតគិតលេខរហ័សថ្នាក់អន្តរជាតិ លើកទី២៣ នៅទីក្រុងកូឡាឡាំពួ ប្រទេសម៉ាឡេស៊ី នៅថ្ងៃទី ៩ ខែ ធ្នូ ឆ្នាំ ២០១៨ ខាងមុខនេះ។
កម្មវិធីនេះត្រូវបានអញ្ជើញចូលរួមពី កញ្ញា ហេង រចនា នាយិកាគ្រប់គ្រងទូទៅ UCMAS កម្ពុជា កញ្ញា ស៊ាម ចាន់សុភ័ក្រ ប្រធានគ្រូបណ្តុះបណ្តាលកម្មវិធី UCMAS កម្ពុជា,ម្ចាស់អាជ្ញាប័ណ្ណ ប្រធានសាខាទូទាំងប្រទេស សិស្សឆ្នើមជ័យលាភីប្រឡងថ្នាក់ជាតិលើកទី៣ ក៏ដូចជាអាណាព្យាបាលសិស្សប្រមាណជាង ៣០០ នាក់។
ក្នុងឪកាសនោះដែរ កញ្ញា ហេង រចនា នាយិកាគ្រប់គ្រងទូទៅ UCMAS កម្ពុជាបានធ្វើការសំណេះសំណាលទៅកាន់សិស្សឆ្នើម ជ័យលាភីនឹងអាណាព្យាបាលសិស្សថា ការប្រឡងថ្នាក់ជាតិលើកទី៣កន្លងផុតទៅជាលទ្ធផលយើងបានរកឃើញសិស្សជ័យលាភី ២៣៩ នាក់ក្នុងនោះមានសិស្សឆ្នើមជ័យលាភី ៥១ នាក់ តំណាងកម្ពុជាមានឱកាសស្វែងយល់ពីបទពិសោធន៍និងបញ្ចេញសមត្ថភាព ជាមួយនឹងកុមារជាច្រើនមកពី ៧៩ ប្រទេសជុំវិញពិភពលោក។ ក្នុងនាមជានាយិកាគ្រប់គ្រងទូទៅនៃកម្មវិធី UCMAS កម្ពុជាពិតមានអារម្មណ៍រីករាយ និងមោទនភាពយ៉ាងខ្លាំងចំពោះលទ្ធផលដ៏ល្អរបស់កុមារ UCMAS កម្ពុជា។
ដោយឡែក អ្នកគ្រូ ស៊ាម ចាន់សុភ័ក្រ ក៏បានធ្វើការចែករំលែកវិធីសាស្រ្តនឹងគន្លឹះសំខាន់ៗមួយចំនួន ដល់ប្អូនៗសិស្សឆ្នើមថា ការប្រឡងថ្នាក់អន្តរជាតិលើកទី ២៣ នៅទីក្រុង កួឡាឡាំពួរ ប្រទេសម៉ាឡេស៊ី ត្រូវបានបែងចែកជាបីវិញ្ញាសារ រួមមាន វិញ្ញាសារសរសេរ ,ស្តាប់ និង មើល។ដោយវិញ្ញាសារសរសេរមាន ១០ កម្រិតហើយកម្រិតនីមួយៗត្រូវប្រឡងមានរយៈពេល ៨ នាទីលើ ២០០ សំណួរ ។ គន្លឹះដើម្បីទទួលបានជ័យលាភីមុនពេលប្រឡង ដូចជាទី១ ជ្រើសរើសនូវសម្ភារៈត្រឹមត្រូវ ចង់សំដៅលើខ្មៅដៃ(B2)ដែលមានគុណភាពខ្ពស់ហើយយ៉ាងហោចណាស់ក៏មាន២ដើមយ៉ាងតិច។ទី២ ការហ្វឹកហាត់ មានន័យថាបេក្ខជនទាំងអស់ទាមទារឱ្យមានការអនុវត្តន៍ទាំងក្នុងនឹងក្រៅសាលាម្តងហើយម្តងទៀតឱ្យបានច្រើនមុនពេលប្រកួត។ទី៣ ការថែទាំសុខភាព ជាសារៈសំខាន់បំផុត និងទី៤ ការលើកទឹកចិត្ត សូមមាតាបិតាលើកទឹកចិត្តដើម្បីកុំឱ្យប្អូនៗមានភាពភ័យខ្លាចក្នុការចូលរួម។
ដោយឡែកអាណាព្យាបាលសិស្ស គឺកុមារី សំណាង និតលីកា ដែលទទួលជ័យលាភីលេខ១ ផ្នែកសរសេរ លោក វិន សំណាង និង អ្នកស្រី ម៉ៅ មានិត បានប្រាប់ឲ្យដឹងស្រដៀងគ្នាថា សម្រាប់លោកនិងភរិយា បានឲ្យកូនស្រីសិក្សាកម្មវិធី UCMAS រយៈពេលជិត១ឆ្នាំហើយ ជាលទ្ធផលឃើញថា ការគិតលេខរបស់កូនគឺល្អទទួលបានពិន្ទុល្អហើយជាក់ស្តែងនៅក្នុងការប្រឡងកម្មវិធី Ucmas ថ្នាក់ជាតិលើកទី៣នេះ កូនស្រីទទួលបានជ័យលាភី និងត្រៀមទៅប្រកួតប្រជែងនៅម៉ាឡេស៊ីឆាប់ៗនេះផងដែរ៕
