បុរសម្នាក់ស្លាប់នៅនឹងកន្លែង ដោយរថយន្តធុនធំបើកកិន ពេលដួលម៉ូតូ

សៀមរាប៖ សមត្ថកិច្ចស្រុកពួក បានឲ្យដឹងថា ករណីគ្រោះថ្នាក់ចរាចរ រវាងរថយន្ត និង ម៉ូតូ នៅលើផ្លូវជាតិលេខ៦ ត្រង់ចំណុចចន្លោះគីឡូម៉ែត្រលេខ៣២៦និង៣២៧ ក្នុងទឹកដីភូមិព្រៃក្មេង ឃុំខ្នាត ស្រុកពួក ខេត្តសៀមរាប កាលពីវេលាម៉ោង៩ព្រឹក ថ្ងៃទី១១ ខែតុលា ឆ្នាំ២០១៨នេះ បណ្ដាលឲ្យមនុស្សម្នាក់បានស្លាប់ភ្លាមនៅនឹងកន្លែងកើតហេតុ ។

សមត្ថកិច្ចស្រុកពួក បានឲ្យដឹងទៀតថា មុនពេលកើតហេតុ មានរថយន្តម៉ាកហ៊ីយ៉ាន់ដាយ ពណ៌ស ពាក់ស្លាកលេខត្បូងឃ្មុំ 3A-1188 សណ្ដោងរ៉ឺម៉កពណ៌ខៀវ 4A-0105 បើកបរដោយឈ្មោះ ផុន ម៉េងស្រ៊ី ភេទប្រុស អាយុ ២៣ឆ្នាំ មុខ​របរបើកបរ រស់នៅភូមិជ្រួស ឃុំចក ស្រុកអូររាំងឪ ខេត្តកំពង់​ចាម បើកបរមកពីទិសខាងលិចទៅទិសកើត ដឹកដំឡូងមីចំនួន២៧តោន ត្រូវបានសមត្ថកិច្ចឃាត់ខ្លួន ក្រោយពីកើតហេតុ រីឯម៉ូតូម៉ាកហុងដាឌ្រីម ពណ៌ខ្មៅ សេរីឆ្នាំ២០១៧ ពាក់ស្លាកលេខសៀមរាប 1Y-5509 បើកបរដោយឈ្មោះ ឆៃ រ៉ាដឿង ភេទប្រុស អាយុ២៣ ឆ្នាំ រស់នៅភូមិជ័យ សង្កាត់ទឹកវិល ក្រុងសៀមរាប បានទទួលរងគ្រោះស្លាប់ នៅនឹងកន្លែងកើតហេតុ មុខរបរជាងសំណង់ បើកបរមកពីទិសខាងកើតទៅទិសខាងលិច ។
មូលហេតុដែលបង្កឲ្យកើតមានករណីគ្រោះថ្នាក់ចរាចរនេះ គឺអ្នកបើកបរម៉ូតូ បានបើកវ៉ារថយន្ត១បាំងកន្លះ មិនស្គាល់អត្តសញ្ញាណ បានរេចង្កូត ហើយបើកបុកពីមុខ និងចូលក្រោមរថយន្តធុនធំ ដឹកដំឡូងមី ។

ក្រោយពេលកើតហេតុ សមត្ថកិច្ចនគរបាលជំនាញស្រុកពួក បានចុះទៅពិនិត្យ និងធ្វើការវាស់វែង និងដកហូតវត្ថុតាងយកមករក្សាទុក នៅអធិការដ្ឋាននគរបាលស្រុកពួក ដើម្បីអនុវត្តនីតិវីធីបន្ត ៕