លោកមុំ វណ្ណា នាយកគេហទំព័រភ្នំពេញរីផតធើ ថ្វាយព្រះសព្ទសាធុការពរជ័យ ក្នុងព្រះរាជពិធីបុណ្យចម្រើន ព្រះជន្ម ព្រះករុណាជាអម្ចាស់ជីវិតលើត្បូង ព្រះមហាក្សត្រ នៃព្រះរាជាណាចក្រកម្ពុជា គម្រប់ព្រះជន្ម ៧០ ព្រះវស្សា យាងចូល ៧១ ព្រះវស្សា

ភ្នំពេញ ៖ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត
បពិត្រ ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត! នាឱកាសដ៏មហានក្ខត្តឫក្សវិសេសវិសាលនេះ លោកមុំ វណ្ណា នាយកគេហទំព័រភ្នំពេញរីផតធើ សូមក្រាបបង្គំអភិវន្ទសម្តែងថ្វាយនូវអំណរសាទរឥតឧបមា ប្រកបដោយកតញ្ញូកតវេទិតាធម៌យ៉ាងជ្រាលជ្រៅបំផុត ចូលរួមថ្វាយព្រះសព្ទសាធុការពរជ័យ ក្នុងព្រះរាជពិធីបុណ្យចម្រើន ព្រះជន្ម ព្រះករុណាជាអម្ចាស់ជីវិតលើត្បូង ព្រះមហាក្សត្រ នៃព្រះរាជាណាចក្រកម្ពុជា គម្រប់ព្រះជន្ម ៧០ ព្រះវស្សា យាងចូល ៧១ ព្រះវស្សា ដែលនឹងប្រព្រឹត្តទៅនៅថ្ងៃអាទិត្យ ១០រោច ខែពិសាខ ឆ្នាំថោះ៖ បញ្ចស័ក ពុទ្ធសករាជ ២៥៦៧ ត្រូវ នឹងថ្ងៃទី១៤ ខែឧសភា ឆ្នាំ២០២៣ ខាងមុខនេះ។

ស្ថិតក្នុងឱកាសដ៏មហាជ័យមង្គលាភិរម្យថ្លៃថ្លានេះ ទូលព្រះបង្គំ យើងខ្ញុំទាំងអស់គ្នា សូមព្រះបរមរាជានុញ្ញាតអភិវន្ទ លំឱនកាយវាចាចិត្ត ប្រកបដោយកតញ្ញូតាធម៌យ៉ាងក្រៃលែង ថ្វាយចំពោះ ព្រះករុណាជាអម្ចាស់ជីវិតលើត្បូង ក្នុងព្រះ បរមនាមជាព្រះប្រមុខរដ្ឋ និងជាព្រះនិមិត្តរូបកម្ពុជា ព្រះអង្គបានថ្វាយនូវព្រះកាយពល និងព្រះបញ្ញាញាណ បំពេញនូវព្រះ រាជសកម្មភាព និងព្រះរាជកិច្ចជាច្រើន ក្នុងវិស័យការទូត អប់រំ សង្គមកិច្ច មនុស្សធម៌ សុខាភិបាល វប្បធម៌ និងសាសនា ធ្វើឱ្យ ប្រជារាស្ត្រខ្មែរ រស់នៅប្រកបដោយភាពសុខដុមរមនា ជាពិសេសព្រះរាជបេសកកម្មដ៏ឧត្តង្គឧត្តម រួមចំណែកយ៉ាងធំធេង ជាមួយនឹង សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្នុងការនាំយកនូវ ព្រះអគ្គិជ័យកីឡា ជាថ្មីម្តងទៀត ដើម្បីរៀបចំព្រឹត្តិការណ៍កីឡាស៊ីហ្គេម លើកទី៣២ ដែលប្រជារាស្ត្រខ្មែរបានទន្ទឹងរង់ចាំ អស់រយៈពេល ៦៤ ឆ្នាំ កន្លងមកហើយ ប្រកបដោយក្តីមោទនភាពជាទីបំផុត។

ទូលព្រះបង្គំ យើងខ្ញុំទាំងអស់គ្នា សូមលើកហត្ថប្រណម្យបួងសួងដល់គុណបុណ្យព្រះរតនត្រ័យ កែវទាំងបី វត្ថុស័ក្តិសិទ្ឋិ ទាំងឡាយក្នុងលោក ទេវតាថែរក្សាទឹកដីនៃព្រះរាជាណាចក្រកម្ពុជា ប្ញទ្ធិបារមីទេវតាថែរក្សាព្រះមហាស្វេតច្ឆត្រ និងទេវតាឆ្នាំថ្មី ព្រះនាម “កិមិរាទេវី” សូមជួយបីបាច់ថែរក្សា អភិបាលបោះព្រំព្រះសព្ទសាធុការពរជ័យគ្រប់ប្រការ ថ្វាយជូន ព្រះករុណា ជាអម្ចាស់ជីវិតលើត្បូង ព្រះមហាក្សត្រ នៃព្រះរាជាណាចក្រកម្ពុជា សូមបានសមប្រកបដោយព្រះពុទ្ធពរបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ដើម្បីគង់ប្រថាប់ជាម្លប់ដ៏សុខក្សេមក្សាន្តសម្រាប់ប្រជារាស្ត្រខ្មែរជានិច្ចនិរន្តរ៍។ សូមព្រះករុណាថ្លៃវិសេសជាទីសក្ការៈដ៏ខ្ពង់ខ្ពស់បំផុត ទ្រង់ព្រះមេត្តាទទូលនូវភក្ដីភាពដ៏ស្មោះស្ម័គ្រ និងអភិវន្ទនកិច្ច ដ៏ខ្ពង់ខ្ពស់បំផុតពីទូលព្រះបង្គំ យើងខ្ញុំទាំងអស់គ្នា៕