ការព្យួរបណ្តោះអាសន្ននៃគម្រោង EBA ឬទណ្ឌកម្មឯកតោភាគី រយៈពេលខ្លីណាមួយ អាចមានផលប៉ះពាល់ដល់ជីវិតរបស់កម្មករ
ភ្នំពេញ៖ សមាគមរោងចក្រកាត់ដេរនៅកម្ពុជា ហៅកាត់ GMAC ការព្យួរបណ្តោះអាសន្ននៃគម្រោង EBA ឬទណ្ឌកម្មឯកតោភាគីរយៈពេលខ្លីណាមួយ អាចមានផលប៉ះពាល់អវិជ្ជមានរយៈពេលវែងដល់ជីវិតរបស់កម្មករយើង និងគ្រួសាររបស់ពួកគេ។ ភាពរីកចម្រើនទាំងអស់ ដែលកម្ពុជាសម្រេចបានក្នុងរយៈកាល២ទសវត្សរ៍កន្លងមកនេះ តាមរយៈកិច្ចខិតខំប្រឹងប្រែង ពីភាគីពាក់ព័ន្ធទាំងអស់ រួមទាំងដែគូអភិវឌ្ឍន៍ដូចជា សហភាពអឺរ៉ុប អាចត្រូវបានបំផ្លាញយ៉ាងលឿន។
ទោះយ៉ាងណា សមាគមរោងចក្រកាត់ដេរនៅកម្ពុជា នៅតែមានសុទិដ្ឋិនិយមថា វិស័យរបស់យើងនឹងមិនស្ថិតនៅក្នុងការដាក់ទណ្ឌកម្មណាមួយ និងមិនស្ថិតនៅក្នុងគោលដៅដាក់ទណ្ឌកម្មឡើយ។ វិស័យកាត់ដេរសម្លៀកបំពាក់និងស្បែកជើង បានផ្តល់ការងារដោយផ្ទាល់ដល់ប្រជាពលរដ្ឋប្រមាណ ៧០០.០០០នាក់ ដែលជាង៨៥ភាគរយ ជាស្រ្តីមកពីបណ្តាខេត្តជនបទ។ ប្រជាពលរដ្ឋ២នាក់ដទៃទៀត ក្នុងចំណោមប្រជាពលរដ្ឋសរុប១៦លាននាក់ ពឹងផ្អែកលើវិស័យវិស័យកាត់ដេរសម្លៀកបំពាក់និងស្បែកជើង ។ ជារៀងរាល់ខែ ប្រាក់ខែជាង ១៥០ដុល្លារ ត្រូវបានចំណាយទៅលើកម្មករទាំងនេះ។ ដោយសារកិច្ចខិតខំប្រឹងប្រែងជាប់ជានិច្ចពីភាគីពាក់ព័ន្ធទាំងអស់ នៅក្នុងវិស័យរបស់យើងរួមទាំងនិយោជក កម្មករ សហជីព សង្គមស៊ីវិល ដៃគូអភិវឌ្ឍន៍ និងរាជរដ្ឋាភិបាលកម្ពុជា វិស័យផលិតសម្លៀកបំពាក់និងស្បែកជើង បានរីកចម្រើននិងរួមចំណែកយ៉ាងខ្លាំងដល់កំណើនសេដ្ឋកិច្ចនិងកែលម្អជីវភាពរបស់កម្មករយើង។ ស្រ្តីកម្ពុជាក្រីក្ររាប់លាននាក់ និងគ្រួសារ របស់ពួកគេត្រូវបានទាញចេញពីភាពក្រីក្រ។
សមាគមរោងចក្រកាត់ដេរនៅកម្ពុជា បានផ្ញើលិខិតផ្លូវការ ជូនលោកស្រី Cecilia Malmström ស្នងការពាណិជ្ជកម្ម គណៈកម្មការអឺរ៉ុបនៅថ្ងៃទី២០ ខែតុលា ឆ្នាំ២០១៨ ដោយរៀបរាប់ថា ការប្រកាសនាពេលថ្មីៗដែលធ្វើឡើងដោយសហភាពអឺរ៉ុបបង្ហាញអំពីលទ្ធភាពក្នុងការព្យួរបណ្តោះអាសន្ន នៃគម្រោងគំនិតផ្តួចផ្តើមស្តីពីការនាំចូលទំនិញគ្រប់ប្រភេទលើកលែងតែអាវុធ (EBA) សម្រាប់កម្ពុជា គឺជាការភ្ញាក់ផ្អើលសម្រាប់វិស័យឯកជនរួមទាំងវិនិយោគិន កម្មករ ព្រមទាំងអ្នកបញ្ជាទិញដែលទិញពីកម្ពុជា។
សមាគមរោងចក្រកាត់ដេរនៅកម្ពុជា សូមអំពាវនាវឲ្យលោកស្រី Cecilia Malmström ស្នងការពាណិជ្ជកម្ម គណៈកម្មការអឺរ៉ុប មានចំណាត់ការយកចិត្តទុកដាក់ និងការសម្រេចប្រកបដោយការពិចារណា ហើយត្រៀមខ្លួនរួចជាស្រេចដើម្បីផ្តល់ការពិតបន្ថែមទៀតដល់លោកស្រី នៅពេលតម្រូវក្នុងអំឡុងដំណើរការតាមដានរបស់លោកស្រី។
ខាងក្រោមជាលិខិតផ្លូវការរបស់ GMAC ផ្ញើជូនលោកស្រី Cecilia Malmström ស្នងការពាណិជ្ជកម្ម គណៈកម្មការអឺរ៉ុប៖
