ថ្ងៃនេះកម្ពុជាធ្វើជាម្ចាស់ផ្ទះ នៃការប្រកួតចំបាប់ជើងឯកអាស៊ីអាគ្នេយ៍

ភ្នំពេញ៖កម្ពុជានឹងបន្ដធ្វើម្ចាស់ផ្ទះរៀបចំការប្រកួតកីឡាចំបាប់ជ្រើសរើសជើងឯកអាស៊ីអាគ្នេយ៍ ឆ្នាំ២០២៣ ចាប់ពីថ្ងៃទី០៦ដល់០៩ ខែធ្នូសប្ដាហ៍នេះ នៅពហុកីឡដ្ឋានជាតិអូឡាំពិក រាជធានីភ្នំពេញ។

ការធ្វើជាម្ចាស់ផ្ទះនេះគឺតបតាមការស្នើសុំរបស់បណ្ដាប្រទេសក្នុងតំបន់បន្ទាប់ពីមើលឃើញកម្ពុជាបានបំពេញតួនាទីយ៉ាងល្អក្នុងនាមម្ចាស់ផ្ទះព្រឹត្តិការណ៍អន្ដរជាតិនាពេលកន្លងមក ។
ការប្រកួតជើងឯកអាស៊ីអាគ្នេយ៍ឆ្នាំនេះ មានអត្តពលិក ២៧៦នាក់ មកពី ៧ប្រទេសចូលរួម រួមមានម្ចាស់ផ្ទះកម្ពុជា ថៃ វៀតណាម ឡាវ សិង្ហបុរី ហ្វីលីពីន និងឥណ្ឌូនេស៊ី ។ អ្វីដែលពិសេសឆ្នាំនេះ គឺមានបន្ថែមវិញ្ញាសាការប្រកួតយុវជនអាយុក្រោម ១៧ឆ្នាំ និងអាយុក្រោម ២០ឆ្នាំ ដែលជាឱកាសដ៏ល្អ សម្រាប់សហព័ន្ធកីឡាចំបាប់កម្ពុជា ដើម្បីជំរុញការអភិវឌ្ឍគុណផលកីឡាករកីឡាការិនីវ័យក្មេងរបស់ខ្លួនឆ្ពោះទៅរកការប្រកួតអន្ដរជាតិនានា ។

កាលពីឆ្នាំ២០២២ ក្នុងការប្រកួតកីឡាចំបាប់ជើងឯកអាស៊ីអាគ្នេយ៍នេះ ម្ចាស់ផ្ទះកម្ពុជា ដណ្ដើមបានមេដាយសរុប ១៩គ្រឿង (មាស ៣ ប្រាក់ ៣ និងសំរឹទ្ធ ១៣) មុនកីឡាចំបាប់កម្ពុជា បានបង្កើតកំណត់ត្រាថ្មី ក្នុងព្រឹត្តិការណ៍ស៊ីហ្គេម លើកទី៣២ ក្រោយដណ្ដើមបានមេដាយសរុប ២០គ្រឿង (មាស ៥ ប្រាក់ ៤ និងសំរឹទ្ធ ១១) ដែលជាការឈ្នះមេដាយច្រើនបំផុត ក្នុងប្រវត្តិសាស្ដ្រប្រកួតកីឡាស៊ីហ្គេមរបស់ខ្លួន ។
លោកខេស៊ីបាណេតអនុប្រធានសហព័ន្ធកីឡាចំបាប់កម្ពុជានិងជាប្រធានសហព័ន្ធកីឡាចំបាប់អាស៊ីអាគ្នេយ៍ បានថ្លែងក្នុងកិច្ចប្រជុំបច្ចេកទេសមុនការប្រកួតថា នេះជាឆ្នាំទី២ ហើយដែលកម្ពុជាបានទទួលសិទ្ធធ្វើម្ចាស់ផ្ទះកីឡាចំបាប់ជើងឯកអាស៊ីអាគ្នេយ៍បន្ទាប់ពីរៀបចំលើកដំបូង កាលពីឆ្នាំ២០២២ មុនឈានដល់ព្រឹត្តិការណ៍ស៊ីហ្គេម លើកទី៣២ ឆ្នាំ២០២៣ ប្រកបដោយភាពជោគជ័យ កាលពីថ្មីៗ ។
លោកថាបណ្ដាប្រទេសអាស៊ីអាគ្នេយ៍គេស្នើសុំកម្ពុជាធ្វើម្ចាស់ផ្ទះការប្រកួតកីឡាចំបាប់ជើងឯកអាស៊ីអាគ្នេយ៍នេះ បន្ទាប់ពីគេមើលឃើញកម្ពុជារៀបចំការប្រកួតល្អនាពេលកន្លងមក ។ហេតុនេះទើបបណ្ដាប្រទេសក្នុងតំបន់បានស្នើសុំរៀបចំជើងឯកនៅកម្ពុជានិងបានបោះឆ្នោតគាំទ្ររូបលោកធ្វើជាប្រធានសហព័ន្ធកីឡាចំបាប់អាស៊ីអាគ្នេយ៍ថែមទៀត។ដូច្នេះក្នុងនាមប្រធានលោកទទួលខុសត្រូវចូលរួម និងគាំទ្រការរៀបចំការប្រកួតនេះ ។
លោកខេស៊ីបន្ដថាបន្ទាប់ពីការខំប្រឹងហ្វឹកហាត់ច្រើនឆ្នាំសម្រាប់ប្រកួតប្រជែងក្នុងស៊ីហ្គេមយើងចង់បន្ដអភិវឌ្ឍន៍កីឡាករកីឡាការិនីកម្ពុជានិងរក្សានូវគុណភាពពួកគេឲ្យកើនឡើងរៀងរាល់ឆ្នាំ ។ ស្របតាមគោលនយោបាយរបស់រាជរដ្ឋាភិបាល និងក្រសួងអប់រំ យុវជន និងកីឡា យើងមានគោលដៅសំខាន់ ២ ក្នុងការប្រកួតនេះ ទី១-ត្រៀមការប្រកួតកីឡាស៊ីហ្គេមឆ្នាំ២០២៥ នៅថៃគឺយើងចង់ឈ្នះមេដាយកាន់តែច្រើននិងទី២ត្រៀមឆ្ពោះទៅរកការប្រកួតកីឡាយុវជនអាស៊ី ឆ្នាំ២០២៩ ដែលកម្ពុជាធ្វើម្ចាស់ផ្ទះ ។