ករណីឃាតកម្មវាយសំពងក្បាលសម្លាប់ ត្រូវនគរបាលខេត្តព្រៃវែងស្រាវជ្រាវបំបែកសំណុំរឿងឃាត់ខ្លួនមនុស្ស ៦នាក់

ខេត្តព្រៃវែង៖ ស្នងការដ្ឋាននគរបាលខេត្តព្រៃវែង កាលពីថ្ងៃទី០១ ខែធ្នូបានស្រាវជ្រាវបំបែកសំណុំរឿងឃាតកម្មមួយករណី ដោយឃាត់ខ្លួនបានជនដៃដល់ម្នាក់ និងបក្ខ ៥នាក់ទៀត ក្រោយរៀបគម្រោងវាយសម្លាប់ជនរងគ្រោះ ដែលជាពូបង្កើតរបស់ខ្លួន នៅភូមិព្រៃព្រហ្ម ឃុំពោធិ៍ទី ស្រុកស៊ីធរកណ្ដាល កាលពីយប់ថ្ងៃទី២៩ ខែវិច្ឆិកា ឆ្នាំ២០២៣ ។

ក្រោយពីទទួលបានបទបញ្ជារបស់លោកឧត្តមសេនីយ៍ទោឈឿន ប៊ុនឆន ស្នងការនគរបាលខេត្តព្រៃវែង លោកឧត្តមសេនីយ៍ត្រី ពៅ ជីវី ស្នងការរងទទួលផែនការងារនគរបាលព្រហ្មទណ្ឌបានដឹកនាំកម្លាំងជំនាញព្រហ្មទណ្ឌនៃស្នងការដ្ឋាននគរបាលខេត្តសហការជាមួយកម្លាំងនគរបាលស្រុកពារាំងនិងស្រុកស៊ីធរកណ្ដាល ឈានទៅដល់កំណត់បាននូវមុខសញ្ញាជនសង្ស័យក្នុងករណីឃាតកម្មនៅស្រុកពារាំងខេត្តព្រៃវែង ដែលជនសង្ស័យបានធ្វើសកម្មភាពនៅវេលាម៉ោង២ និង០០នាទី រំលងអាធ្រាត្រ ថ្ងៃទី២៩ ខែ វិច្ឆិកា ឆ្នាំ២០២៣ ត្រង់ចំណុចវាលស្រែមួយកន្លែងស្ថិតនៅខាងលិចភូមិ សាមគ្គី ឃុំព្រៃព្នៅ ស្រុកពារាំងខេត្តព្រៃវែង រហូតដល់ថ្ងៃទី០១ខែធ្នូ ឆ្នាំ២០២៣ ទើបកម្លាំងជំនាញព្រហ្មទណ្ឌ ធ្វើការស្រាវជ្រាវស៊ើបអង្កេតនិងឃាត់ខ្លួន បាននូវមុខសញ្ញាជនសង្ស័យចំនួន១នាក់ រួមនិងបក្សពួកចំនូន៥នាក់ផ្សេងទៀត។

ជនសង្ស័យដែលសមត្ថកិច្ចឃាត់ខ្លួនបាននោះមានឈ្មោះដូចខាងក្រោម÷
១-ឈ្មោះ ចឹក រី ភេទប្រុសរស់នៅភូមិ ព្រៃព្រហ្ម ឃុំពោធិ៍ទី ស្រុកស៊ីធរកណ្ដាល ខេត្តព្រៃវែង(ជាជនដៃដល់) ២-ឈ្មោះ ណុល ណាត (ហៅញេ៉ប) ភេទប្រុស ៣- ឈ្មោះ ចឹក រ៉េត ភេទប្រុស៤-ឈ្មោះ ហ៊ន ឡាយ ភេទប្រុស ៥-ឈ្មោះ អួន សាង ភេទប្រុស និង ៦- ឈ្មោះ អ៊ន់ ហេម ភេទស្រី (ត្រូវជាប្រពន្ធរបស់ជនសង្ស័យ) អ្នកទាំង៦ នាក់ខាងលើ មានទីលំនៅភូមិ ព្រៃព្រហ្ម ឃុំ ពោធិ៍ទី ស្រុកស៊ីធរកណ្ដាល ខេត្តព្រៃវែង ហេតុការណ៍នេះកើតឡើងនៅថ្ងៃទី ២៩ ខែវិច្ឆិកា ឆ្នាំ ២០២៣ វេលាម៉ោង ២និង០០នាទីរំលងអាធ្រាត្រ ដោយឈ្មោះ ចឹក រី មានទីលំនៅភូមិ-ឃុំ កើតហេតុខាងលើបានទៅមើលអន្លង់(ដាក់ត្រី) ចម្ងាយប្រហែល ៣០០ម៉ែត្រត្រង់ចំណុចវាលស្រែមួយកន្លែង ស្ថិតនៅប៉ែកខាងលិច ភូមិសាមគ្គី ឃុំ ព្រៃព្នៅ ស្រុកពារាំង ខេត្តព្រៃវែង ជនសង្ស័យឈ្មោះចឹក រី បានធ្វើសកម្មភាពដោយយកចបជីក មកវា..យ.ទៅលើជនរងគ្រោះឈ្មោះ ឡុច អ៊ាង ភេទ ប្រុស អាយុ ៥០ ឆ្នាំរស់នៅភូមិ-ឃុំ ជាមួយគ្នាបណ្ដាលឱ្យជនរងគ្រោះរងរបួសចំនួន៥កន្លែង ហើយបណ្ដាលឱ្យស្លាប់បាត់បង់ជីវិត នៅលើវាលស្រែត្រង់ចំណុចកើតហេតុខាងលើតែម្ដង។

រហូតដល់ថ្ងៃទី ០១ ខែធ្នូ ឆ្នាំ២០២៣ កម្លាំងជំនាញព្រហ្មទណ្ឌខេត្ត សហការជាមួយកំលាំងអធិការដ្ឋាននគរបាលស្រុកពារាំង និងកម្លាំងនគរបាលស្រុកស៊ីធរកណ្ដាល បានស្រាវជ្រាវស៊ើបអង្កេតរកមុខសញ្ញាដែលធ្វើសកម្មភាព ក្នុងករណីឃាតកម្មនេះនឹងបានឃាត់ខ្លួនជនសង្ស័យបានចំនួន៦ នាក់ស្រី១នាក់មកកាន់ស្នងការដ្ឋាននគរបាលខេត្តព្រៃវែងដើម្បីសាកសួរ ពេលនោះជនសង្ស័យទាំង ៦ នាក់មិនបានសហការសារភាពប្រាប់សមត្ថកិច្ចទេ លុះដល់ថ្ងៃទី០២ខែឆ្នាំដដែលទើបឈ្មោះ ចឹក រី ភេទប្រុសដែលជាជនដៃដល់ បានសារភាពប្រាប់សមត្ថកិច្ចថា÷ក្រោយពីបានវាយសម្លាប់លើជនរងគ្រោះរួចមក ខ្លួនក៏បានទៅហៅឈ្មោះណុល ណាត. ចឹក រ៉េត. ហ៊ន ឡាយ.អួន សាង ឱ្យទៅជួយសែងសាកសពមកដាក់ក្នុងស្រែលើជញ្ជាំ្រងដែលមានទឹកដក់ជាប់នឹងភ្លឺស្រែចម្ងាយ ២០០ម៉ែត្រពីកន្លែងកើតហេតុ ជនសង្ស័យបាននិយាយថាជនរងគ្រោះឈ្មោះឡុច អ៊ាងនោះត្រូវជាពូបង្កើតរបស់ខ្លួន។

ក្រោយពីបានស្តាប់ចម្លើយសារភាពលម្អិតរបស់ជនសង្ស័យរួចមកមូលហេតុដែលឈ្មោះចឹក រី វាយសម្លាប់ជនរងគ្រោះឈ្មោះឡុច អ៊ាង នោះគឺដោយសារតែមានគំនុំទំនាស់ក្នុងគ្រួសារជាមួយគ្នាអស់រយៈពេល១៥ ឆ្នាំកន្លងមកហើយដោយឈ្មោះ ឡុច អ៊ាងខឹងនិងឈ្មោះចឹក រី ថាបានយកប្រពន្ធរបស់ខ្លួន ហើយរាល់ពេលផឹកស៊ីស្រវឹងម្ដងៗឈ្មោះឡុច អ៊ាង តែងតែស្រែកជេរដៀមដាមឈ្មោះចឹក រី រហូតហើយឈ្មោះចឹក រី ក៏បានខឹងគុំឈ្មោះ ឡុច អ៊ាងត្រលប់ទៅវិញ ទើបនៅថ្ងៃទី ២៨ ខែវិច្ឆិកា ឆ្នាំ២០២៣ ឈ្មោះ ចឹក រី បានរៀបគម្រោងការតាមដានឈ្មោះឡុច អ៊ាងចាប់ពីម៉ោង ១៨:០០ នាទីយប់រហូតដល់ម៉ោង ២៣:០០នាទី ដឹងថាឈ្មោះ ឡុច អ៊ាងកាន់សម្ភារៈឆ្លុះត្រីដើរទៅខាងត្បូងភូមិ ព្រៃព្រហ្ម ខ្លួនក៏ត្រឡប់មកផ្ទះវិញ រហូតដល់ម៉ោងប្រហែល១ រំលងអធ្រាត្រថ្ងៃទី ២៩ ខែវិច្ឆិកាឆ្នាំ ២០២៣ ក៏បានយកចបជីកដែលទុកនៅក្រោមផ្ទះប្រវែងប្រហែល១ម៉ែត្រដើររកឈ្មោះឡុច អ៊ាង ឃើញនៅកំពុងដើរឆ្លុះត្រី ត្រង់ចំណុចជាប់ភ្លឺស្រែមានជញ្រ្ជាំងខាងត្បូង ភូមិសាមគ្គី ឃុំព្រៃព្នៅ ស្រុកពារាំងខេត្តព្រៃវែងរួចក៏វាយសម្លាប់ឈ្មោះឡុច អ៊ាង តែម្ដង។

បច្ចុប្បន្ន ជនសង្ស័យទាំង៦នាក់ខាងលើនៅថ្ងៃទី០៦ខែធ្នូ បានត្រូវបានកម្លាំងជំនាញនគរបាលព្រហ្មទណ្ឌ នៃស្នងការដ្ឋាននគរបាលខេត្តព្រៃវែង កំពុងបំពេញនីតិវិធី បញ្ជូនទៅសាលាដំបូងខេត្តព្រៃវែង ដើម្បីចាត់ការតាមផ្លូវច្បាប់៕