ជនសង្ស័យចំនួន២នាក់ ដែលតែងធ្វើសកម្មភាព ដើរកាច់កញ្ចក់រថយន្តរបស់ប្រជាពលរដ្ឋ ត្រូវបានសមត្ថកិច្ចឃាត់ខ្លួន

រាជធានីភ្នំពេញ ៖ សមត្ថកិច្ចនៃស្នងការដ្ឋាននគបាល រាជធានីភ្នំពេញ ដោយសហការជាមួយកម្លាំងសមត្ថកិច្ចខណ្ឌទួលគោក បានជិះប្រដេញតាមជនសង្ស័យ ដែលតែងតែធ្វើសកម្មភាពដើរកាច់កញ្ចក់រថយន្តស៊េរីទំនើប របស់ប្រជាពលរដ្ឋ បន្ទាប់ពីជនសង្ស័យទាំង2នាក់នោះ បានកាច់កញ្ចក់រថយន្តម៉ាកFord Raptor ដែលម្ចាស់ចតនៅលើដងផ្លូវ 562 ក្នុងខណ្ឌទួលគោក។

ហេតុការណ៍ខាងលើបង្កឲ្យមានការភ្ញាក់ផ្អើលកាលពីវេលាម៉ោង 11និង30នាទីយប់ថ្ងៃទី7 ខែ12 ឆ្នាំ២០២៣ 2023 ចំណុចឃាត់បាននៅលើផ្លូវ 273 សង្កាត់បឹងកក់ទី1 ខណ្ឌទួលគោក រាជធានីភ្នំពេញ។

បើយោងតាមការបញ្ជាក់ពីសាក្សីដែលបានឃើញហេតុការណ៍ខាងលើបានបង្ហើបឲ្យដឹងថា នៅមុនពេលកើតហេតុដោយពួកគេ បានឃើញរថយន្តស៊េរីទំនើបម៉ាក Ford Rator ពណ៌សមួយគ្រឿង ខណៈដែលម្ចាស់បានយកមកចតចោលនៅលើផ្លូវ265 រួចក៏បានចេញទៅហូបអីនៅក្បែរនោះមួយសន្ទុះ ក្រោយមកស្រាប់តែលេចមុខជនសង្ស័យចំនួន2នាក់ ជិះម៉ូតូម៉ាកហុងដាស្គុបពីមួយគ្រឿងមិនចាំផ្លាកលេខ ជិះមកក្បែរថយន្ត2ទៅ3ជុំ ដោយឃើញស្ងាត់និងឱកាសល្អក៏បានជិះម៉ូតូចូលមកអែបកៀននិងរថយន្តហើយម្នាក់ ជាជនដៃដល់ចូលទៅឆ្កឹះកាច់យកកញ្ចក់និងម្នាក់ទៀត ឈរចាំមើលផ្លូវ ។ ប៉ុន្តែខណៈពេលនោះដែរជនសង្ស័យទាំង2នាក់នោះ ក៏បានកាច់កញ្ចក់បានសម្រេចមួយចំហៀងខាងស្តាំបានសម្រេច ក្រោយមកដោយសាក្សីនោះ ឃើញទាន់ក៏ស្រែកចោរៗ ធ្វើឲ្យជនសង្ស័យទាំង2នាក់ ភ័យក៏ជិះម៉ូតូរត់គេចខ្លួន ប៉ុន្តែក្រុមសាក្សីនោះក៏ជិះម៉ូតូប្រដេញតាមពីក្រោយរហូតមកដល់ផ្លូវ 273 ទើបឃាត់ជនសង្ស័យទាំង2នាក់នោះបាន រួចក៏ឃើញវត្តមានខាងកម្លាំងព្រហ្មទណ្ឌកម្រិតស្រាល នៃក្រសួងមហាផ្ទៃ និងកម្លាំងសមត្ថកិច្ចខណ្ឌទួលគោក ចុះមកធ្វើការជួយអន្តរាគមន៍ភ្លាមៗ រួចយកសង្ស័យទាំង2នាក់នោះដឹកទៅកន្លែងកើតហេតុវិញដើម្បីពិនិត្យបន្ថែម។

ក្រោយមកក៏បានឲ្យម្ចាស់រថយន្តទៅដាក់ពាក្យបណ្ដឹង នៅប៉ុស្តិ៍នគរបាលរដ្ឋបាលបឹងកក់ទី1 ចំណែកឯជនសង្ស័យទាំង2នាក់ រួមនិងម៉ូតូម៉ាកស្គុបពីមួយគ្រឿង ត្រូវបានកម្លាំងព្រហ្មទណ្ឌកម្រិតស្រាល បានបញ្ជូនទៅស្នងការដ្ឋាននគរបាលរាជធានីភ្នំពេញ ដើម្បីសួរនាំដោយបន្តតាមនីតិវិធី៕