ការប្រកួតកីឡារាំកម្ពុជានេះ ធ្វើឡើងក្នុងគោលបំណងលើកកម្ពស់ សមត្ថភាពបច្ចេកទេស ដល់ក្រុមអត្តពលិករាំកម្ពុជា ត្រៀមប្រកួតកីឡារាំអន្តរជាតិនានា

ភ្នំពេញ ៖ លោកជំទាវឧកញ៉ា ហ៊ុន ស៊ីណាត អគ្គទីប្រឹក្សាផ្ទាល់សម្តេច ព្រះអភិសិរីសុគន្ធ មហាសង្ឃរាជគណធម្មយុត្តិកនិកាយនៃព្រះរាជាណាចក្រកម្ពុជា ព្រះនាងតូច ជេនណា នរោត្តម ជាទូតសុឆន្ទៈសហព័ន្ធកីឡារាំកម្ពុជា និងលោកស្រី ញ៉ូម មរកត រដ្ឋលេខាធិការក្រសួងកិច្ចការនារី និងជា ប្រធាន សហព័ន្ធកីឡារាំកម្ពុជានៅថ្ងៃទី ១១ ខែធ្នូ ឆ្នាំ២០២៣ បានអញ្ជើញជាកិត្តិយសក្នុងពិធីបើកការបកួតកីឡារាំ ជ្រើសរើសជើងឯកថ្នាក់ជាតិឆ្នាំ២០២៣ នៅដំបូលទូកនៃមជ្ឈមណ្ឌលជាតិហ្វឹកហ្វឺនកីឡា។

លោកជំទាវឧកញ៉ា ហ៊ុន ស៊ីណាត បានមានប្រសាសន៍អរគុណយ៉ាងជ្រាលជ្រៅចំពោះក្រសួងអប់រំ យុវជន និង កីឡាដែលបានមានគោលការណ៍ឲ្យសហព័ន្ធកីឡារាំកម្ពុជា រៀបចំព្រឹត្តិការណ៍នេះឲ្យកើតឡើងក្នុងគោលបំណងលើកកម្ពស់ សមត្ថភាពបច្ចេកទេសដល់កីឡាករ-កីឡាការិនីទាំងអស់ ដើម្បីត្រៀមលក្ខណៈសម្បត្តិ ក៏ដូចជាការប្រម ប្រមូលធនធានកីឡាករ-កីឡាការិនី មានសក្តានុពលចូលរួមប្រកួតជ្រើសរើសជើងឯកកីឡារាំថ្នាក់ជាតិឆ្នាំ ២០២៣ ត្រៀមចូលរួមប្រកួតកីឡារាំអន្តរជាតិនានា នៅពេលខាងមុខនេះ។

លោកជំទាវឧកញ៉ា បានបញ្ជាក់ថា សហព័ន្ធកីឡារាំកម្ពុជាមានការអភិវឌ្ឍន៍ និងរីកចម្រើនពីមួយថ្ងៃទៅមួយថ្ងៃទាំងធនធានកីឡាករ-កីឡាការិនី និងសមត្ថិភាពនៃការចូលរួមប្រកួតថ្នាក់ជាតិ និងអន្តរជាតិទទួលបានលទ្ធផលផ្លែផ្កា គួរជាទីមោទនៈ។ ការប្រកួតកីឡារាំនៅថ្ងៃនេះជាការឆ្លុះបញ្ចាំងនូវសមត្ថភាព ចំណេះដឹងបទពិសោធន៍ បច្ចេកទេស ថ្មីៗ និងទេពកោសល្យរបស់កីឡាករ-កីឡាការិនី បានធ្វើការហ្វឹកហាត់អស់រយៈពេលជាច្រើនឆ្នាំកន្លងមក ដោយនាំយកមកប្រកួតប្រជែងនៅក្នុងថ្ងៃនេះ។

លោកជំទាវឧកញ៉ា ហ៊ុន ស៊ីណាត បានបន្ថែមទៀតថា កីឡាករ-កីឡាការិនីទាំងអស់ត្រូវខិតខំយកចិត្តទុក ដាក់គោរពនូវបទបញ្ជាប្រកួតនានា ដែលសហព័ន្ធកីឡារាំកម្ពុជា ក៏ដូចជាគណៈកម្មាធិការជាតិអូឡាំពិកបានចែងឡើង រក្សានូវស្មារតីសាមគ្គីភាព គោរពដៃគូរបស់ខ្លួនក្នុងពេលប្រកួត ប្រឹងបញ្ចេញឲ្យ អស់ពីសមត្ថភាពដើម្បីឈានទៅដណ្តើមមេដាយសម្រាប់ខ្លួនឯង ពិសេសត្រៀមខ្លួនចេញទៅប្រកួតលើឆាក អន្តរជាតិ និងត្រៀមធ្វើជាម្ចាស់ផ្ទះនៅឆ្នាំ២០២៩ខាងមុខប្រកបដោយជោគជ័យ។

លោកជំទាវ ញ៉ែម មរកត ក៏បានមានប្រសាសន៍ស្នើសូមមន្ត្រីថ្នាក់ដឹកនាំ គណៈកម្មាធិការប្រតិបត្តិ លោកគ្រូ អ្នកគ្រូបង្វឹក និងកីឡាករ-កីឡាការិនី បន្ដរក្សាសាមគ្គីភាពផ្ទៃក្នុងសហការគ្នា បង្កើនភាពស្និតស្នាលស្វាហាប់ ក្នុងការងារជំនាញកីឡារាំឲ្យកាន់តែខ្លាំងក្លា និងឆន្ទៈមោះមុត ដើម្បីឆ្ពោះទៅរកភាពជោគជ័យក្នុងការប្រកួត កីឡារាំអន្តរជាតិនានា នៅពេលខាងមុខនេះ។ ការប្រកួតកីឡារាំជ្រើសរើសជើងឯកថ្នាក់ជាតិប្រចាំឆ្នាំ ២០២៣ លើ២៣ប្រភេទវិញ្ញាសា រួមមាន៖ វិញ្ញាសា រាំគូ Latin Dance និង វិញ្ញាសា Standard Dance មានប្រតិភូ គ្រូបង្វឹក កីឡាករកីឡាការិនី ចំនួន៥០ នាក់ មកពីក្លឹបចំនួន៦ក្លឹប ក្នុងនោះមានក្លឹបមហាផ្ទៃ ក្លឹបកងទ័ពជើងទឹក ក្លឹបរខេត្តកណ្ដាល ក្លឹបខេត្តកំពង់ចាម ក្លឹប Joy School នឹងប្រព្រឹត្តទៅនៅពីថ្ងៃទី១១ ខែធ្នូ ឆ្នាំ២០២៣ នៅក្នុងនាពេលនេះ។

លោកជំទាវប្រធានបានបន្តថា ប៉ុន្មានឆ្នាំចុងក្រោយនេះក្រោមដំបូលនៃសន្តិភាព វិស័យកីឡា និងចលនាអូឡាំពិកកម្ពុជា បានបោះ ជំហានយ៉ាងស្វាហាប់ និងសកម្មបំផុតឆ្ពោះទៅសមាហរណកម្មកម្រិតសមត្ថភាពកីឡាកម្ពុជាទៅក្នុងតំបន់ ទ្វីប និងពិភពលោក។ ការរីកចម្រើនលូតលាស់ឆាប់រហ័ស និងផុសផុលក្នុងសង្គមចាប់អារម្មណ៍ និងចូលរួម សកម្មភាពកីឡារបស់យុវជន និងប្រជាពលរដ្ឋបានបង្ហាញពីការដឹកនាំត្រឹមត្រូវ និងប៉ិនប្រសព្វជាមួយគោលនយោបាយកីឡាច្បាស់លាស់ របស់រាជរដ្ឋាភិបាលទើបវិស័យកីឡាជាតិទទួលបាននូវសមិទ្ធផល ការងារគួរជាទីមោទនបែបនេះ៕