អាជ្ញាធរមីនកម្ពុជា ទទួលពានរង្វាន់ភាពជាអ្នកដឹកនាំគំរូក្នុងវិស័យសកម្មភាពមីន ពីអង្គការស្មារតី នៃអ្នកកីឡា Spirit of Soccer_SOS

ភ្នំពេញ៖ អង្គការស្មារតី នៃអ្នកកីឡា (Spirit of Socc er-SOS) តំណាងដោយ លោក Ben Brett បានប្រគល់ពានរង្វាន់ភាពជាអ្នក ដឹកនាំគំរូក្នុងវិស័យសកម្មភាពមីន ជូនដល់ ឯកឧត្តមបណ្ឌិត លី ធុជ ទេស រដ្ឋមន្រ្តី និងជាអនុប្រធានទី១ អាជ្ញាធរមីន ដែលពានរង្វាន់នេះ គឺជាការលើកទឹកចិត្តដល់កិច្ចខិតខំប្រឹងប្រែងរបស់ថ្នាក់ ដឹកនាំ មន្រ្តី បុគ្គលិក និងស្ថាប័នអាជ្ញាធរ មីនកម្ពុជាទាំងមូលផងដែរ . ពិធីប្រគល់នេះ បានប្រព្រឹត្ដទៅនៅថ្ងៃអង្គារ ១៥ រោច ខែកត្ដិក ឆ្នាំថោះបញ្ចស័កព.ស ២៥៦៧ត្រូវនឹងថ្ងៃទី១២ ខែធ្នូ ឆ្នាំ២០២៣ នៅទីស្នាក់ការអាជ្ញាធរមីនកម្ពុជា។

តំណាងអង្គការស្មារតី នៃអ្នកកីឡា លោក Ben Brett បានលើកឡើងថា៖ គ្រាប់មីន និងសំណល់ជាតិផ្ទុះពីសង្រ្គាម បានគំរាមកំហែងយ៉ាងធ្ងន់ធ្ងរដល់ការ
អភិវឌ្ឍ សេដ្ឋកិច្ច សុខសុវត្ថិភាព និងសុខុមាលភាពរបស់មនុស្សជុំវិញពិភព លោក ព្រមទាំងជាឃាតករសម្លាប់ និងធ្វើបាបដល់ជនស៊ីវិលស្លូតត្រង់ រួមទាំងកុមារ ដោយមិនរើសអើង។
អង្គការ SOS បាននិងកំពុងផ្តល់ការអប់រំអំពីហានិភ័យនៃកិច្ចសង្គ្រោះជីវិត ដល់កុមារ និងសហគមន៍នៅក្នុងប្រទេសដែលហែកហួរដោយសង្រ្គាម ឬក្រោយសង្រ្គាម នៅក្នុងប្រទេសជាង ១០ ជុំវិញពិភពលោក ចាប់តាំងពីឆ្នាំ ១៩៩៦ ដោយបានអប់រំដោយផ្ទាល់ដល់កុមារជាង ១ លាននាក់ និងបានបណ្តុះបណ្តាលវិជ្ជាជីវៈដល់គ្រូបង្វឹកបាល់ទាត់ជាង ២.០០០ នាក់។ នៅប្រទេសកម្ពុជា អង្គការ SOS បានចាប់ផ្តើមក្នុងកម្មវិធីបាល់ទាត់ និងអប់រំការយល់ដឹងអំពីមីន ក្នុងឆ្នាំ ២០០៦ ហើយបានបណ្តុះ បណ្តាលគ្រូបង្វឹកបាល់ទាត់ចំនួន ១៦៧ នាក់ និងបានអប់រំដល់កុមារកម្ពុជាជាង ៥០០.០០០ នាក់ រួមទាំងសហគមន៍រងផលប៉ះពាល់។

បញ្ហាមីននៅកម្ពុជា ក្រោមការ សម្របសម្រួលរបស់អាជ្ញាធរមីន ដែលមាន ឯកឧត្តមបណ្ឌិត លី ធុជ ជាអនុប្រធានទី១ បានលុបបំបាត់ការគំរាមកំហែងពីសហគមន៍ទូទាំងប្រទេស និងបានជួយសង្គ្រោះជីវិតមនុស្សរាប់មិនអស់ និងបានផ្តល់ឱកាសឱ្យប្រជាពលរដ្ឋក្នុងការកសាងសហគមន៍ឡើងវិញប្រកប ដោយសុវត្ថិភាព និងសន្តិសុខ ពេញលេញ ។

លោក Ben Brett បានថ្លែងបន្តទៀតថា ក្រៅពីការងារក្នុងសកម្មភាពមីន ឯកឧត្តមបណ្ឌិត លី ធុជ ក៏ជាអ្នកគាំទ្រដ៏ស្រលាញ់មួយរូបរបស់អង្គការ Spirit of Soccer ក្នុងកម្មវិធីអប់រំកុមារអំពីគ្រោះថ្នាក់នៃគ្រាប់មីន។ ការប្តេជ្ញាចិត្តរបស់ឯកឧត្តមបណ្ឌិត លី ធុជ ចំពោះសកម្មភាពមីន និងការគាំទ្រអង្គការ SOS គឺជាសក្ខីភាពបញ្ជាក់អំពីចរិតលក្ខណៈ និងការប្តេជ្ញាចិត្តក្នុងការធ្វើឱ្យពិភពលោកកាន់តែល្អប្រសើរ។
ឯកឧត្តមទេសរដ្ឋមន្រ្តី លី ធុជ
បានលើកឡើងថា “ពានរង្វាន់ភាពជាអ្នកដឹកនាំគំរូនេះ មិនមែនសម្រាប់តែរូបខ្ញុំ និងស្ថាប័នអាជ្ញាធរមីនកម្ពុជាប៉ុណ្ណោះ
ទេ វាគឺជាពានរង្វាន់ឆ្លុះបញ្ចាំងពីកិច្ចខិតខំប្រឹងប្រែងក្នុងការបំពេញកាតព្វកិច្ច និងការទទួលបាននូវសមិទ្ធផលរួមគ្នារបស់រដ្ឋាភិបាល ម្ចាស់ជំនួយ ដៃគូរអភិវឌ្ឍន៍ ប្រតិបត្តិករ សប្បុរសជន គ្រប់ភាគីពាក់ព័ន្ធ និងប្រជាពលរដ្ឋកម្ពុជាទាំងអស់ ដែលបានផ្តល់ការគាំទ្រដោយគ្មានលក្ខខណ្ឌដល់សកម្មភាពមីននៅកម្ពុជា ក្នុងការជម្នះរាល់បញ្ហាប្រឈមនានាបង្កឡើងដោយសារមីន និងសំណល់ជាតិផ្ទុះពីសង្រ្គាម។”
ឯកឧត្តមទេសរដ្ឋមន្រ្តី បានបញ្ជាក់ថា៖ “ពានរង្វាន់នេះ គឺជាពានរង្វាន់កើតចេញពីនយោបាយ ឈ្នះ ឈ្នះ របស់សម្តេចអគ្គមហាសេនាបតីតេជោ ហ៊ុន សែន ដែលបាននាំមកនូវសុខសន្តិភាព និងស្ថិរភាពជូនប្រទេសជាតិ សម្រាប់ធ្វើជាមូលដ្ឋានគ្រឹះនៃសកម្មភាពមីន និងការអភិវឌ្ឍ។ ជាងនេះទៅទៀត វាកើតចេញពីការតាំងចិត្តយ៉ាងមុះមុតរបស់ សម្តេចមហាបរវធីបតី ហ៊ុន ម៉ាណែត នាយករដ្ឋមន្ត្រី ចំពោះចក្ខុវិស័យរបស់សម្តេចក្នុងការបន្តការពារសន្តិភាព និងស្ថិរភាពរបស់ប្រទេសជាតិ និងដឹកនាំប្រទេសកម្ពុជាឆ្ពោះទៅរកកម្ពុជាមួយដែលគ្មានមីន។”

ឯកឧត្តមបានបញ្ជាក់ថា សមិទ្ធផលរយៈពេលជាង ៣០ឆ្នាំ នៃសកម្មភាពមីន គឹបានមកពីការរួមចំ ណែក គាំទ្រឥតឈប់ឈររបស់ដៃគូអភិវឌ្ឍន៍ ម្ចាស់ជំនួយ និងភាគីពាក់ព័ន្ធសំខាន់ៗ ក្នុងនោះរួមទាំងអង្គការ SOS ដែលបានចូលរួមមកបំពេញការងារនៅប្រទេសកម្ពុជាចាប់តាំងពីឆ្នាំ២០០៦ ក្នុងកម្មវិធីបាល់ទាត់ និងការអប់រំ យល់ ដឹងអំពីមីនដល់កុមារកម្ពុជា និងសហគមន៍រងផលប៉ះពាល់ ក្នុងការបង្ការទប់ស្កាត់ការរងរបួស ការស្លាប់ និងការលើកកម្ពស់ជីវភាពរស់នៅរបស់ប្រជាជន និងសហគមន៍ ដើម្បីបង្កើនសកម្ម ភាពសង្គម និងសេដ្ឋកិច្ចឡើងវិញ ៕ ដោយ សំរិត