លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ៖វាយតម្លៃខ្ពស់ និងកោតសរសើចំពោះកិច្ចខិតខំប្រឹងប្រែងរបស់ថ្នាក់ដឹកនាំប្រធានសហព័ន្ធកីឡារាំកម្ពុជា

ភ្នំពេញ៖នាថ្ងៃទី១២ ខែធ្នូ ឆ្នាំ២០២៣ លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត អគ្គស្នងការសមាគមកាយឫទ្ធិនារីកម្ពុជាអញ្ជើញជាអធិបតីដ៏ខ្ពស់ខ្ពស់ពិធីបិទការប្រកួតកីឡារាំជ្រើសរើសជើងឯកថ្នាក់ជាតិ កាលពីល្ងាចថ្ងៃទី១១ ខែធ្នូ ឆ្នាំ២០២៣ នៅសាលមជ្ឈមណ្ឌលជាតិហ្វឹកហ្វឺនកីឡានៃពហុកីឡដ្ឋានអូឡាំពិក ដែលរៀបចំដោយសហព័ន្ធកីឡារាំកម្ពុជាក្រោមការប្រើប្រាស់ថវិកាឧបត្ថម្ភប្រចាំឆ្នាំរបស់ក្រសួងអប់រំ យុវជន និងកីឡា។

លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត បានមានប្រសាសន៍ថា ខ្ញុំសូមថ្លែងអំណរគុណ និងវាយតម្លៃខ្ពស់ កោតសរសើចំពោះកិច្ចខិតខំប្រឹងប្រែងរបស់ថ្នាក់ដឹកនាំប្រធានសហព័ន្ធកីឡារាំកម្ពុជា គ្រូបង្វឹក និង ក្រុមការងារប្រតិបត្តិ ក្រសួងពាក់ព័ន្ធសប្បុរសជន វិស័យឯកជន ដែលកន្លងមកបានខិតខំតស៊ូចែករម្លែក សហការគ្នាដឹកនាំពង្រឹងសហព័ន្ធកីឡារាំតាំងពីបាតដៃទទេ មានតែសិស្ស៣នាក់រហូតសហព័ន្ធរីកចម្រើន មានធនធានកីឡាករកីឡាការិនីឆ្នើមច្រើន មានលក្ខណៈសម្បត្តិគ្រប់គ្រាន់បានចូលជាសមាជិករបស់ សហព័ន្ធកីឡារាំអាស៊ី និងសហព័ន្ធកីឡារាំពិភពលោក ពិសេសចេញទៅប្រកួតលើឆាកអន្តរជាតិជាមួយ ប្រទេសធំៗទទួលបានមេដាយច្រើនគួរជាទីមោទនៈ។

លោកជំទាវបណ្ឌិតបានបន្តថា ព្រឹត្តិការណ៍យ៉ាងល្អ ក្នុងការរៀបចំការប្រកួតកីឡារាំជ្រើសរើសជើងឯកថ្នាក់ជាតិ បានយ៉ាង អធិកអធមដែលកំពុងកើតឡើងនាពេលនេះ ខ្ញុំពិតជាមិននឹកស្មានដល់ថា ខ្មែរយើងអាចហ្វឹកហាត់រាំចង្វាក់ បរទេសបានល្អបែបនេះទេ ពិតណាស់អាស្រ័យដោយព្រះរាជាណាចក្រកម្ពុជា មានសន្តិភាពពេញលេញ ប្រសិនបើពុំមានសន្តិភាព ពុំមានការអភិវឌ្ឍ វិស័យកីឡានឹងមិនអាចរីកលូតលាស់បានឡើយ។ ខ្ញុំសូមគាំទ្រ ប្រធានបទ “កីឡានាំមកនូវ សន្តិភាព និងការអភិវឌ្ឍ” ពិតជាត្រឹមត្រូវខ្លាំងណាស់។

ខ្ញុំសូមអំពាវនាវដល់ក្រសួងពាក់ព័ន្ធ គណៈកម្មាធិការជាតិអូឡាំពិក វិស័យ ឯកជន អង្គការដៃគូរ សូមជួយគាំទ្រនូវ ថវិកា សម្ភារៈបច្ចេកទេស ទីកន្លែងហ្វឹកហាត់សមស្របដល់ សហព័ន្ធកីឡារាំកម្ពុជាដែលដឹកនាំដោយក្រុមស្ត្រី បង្ករឱកាសដល់សហព័ន្ធបានបន្តបេសកម្ម ដើម្បី អភិវឌ្ឍន៏វិស័យកីឡារាំ ទាំងធនធានកីឡាករ-កីឡាការិនី និងគ្រូបច្ចេកទេស ឲ្យកាន់តែរីកចម្រើនទៅមុខ ទៀតស្របតាមស្តង់ដាអន្តរជាតិ និងសូមអំពាវនាវឲ្យបងប្អូនប្រជាពលរដ្ឋ សិស្សនិស្សិត លោក លោកស្រី នាំគ្នាហាត់កីឡា ដោយជ្រើសរើសប្រភេទកីឡាដែលយើងចូលចិត្ត៕