លោកបណ្ឌិត មាស សារិន វាយតម្លៃខ្ពស់ចំពោះវគ្គ អាជ្ញាកណ្តាល-ចៅក្រមសីដក់ ថ្នាក់ជាតិប្រចាំឆ្នាំ២០២៣

ភ្នំពេញ៖លោកបណ្ឌិត មាស សារិន ទីប្រឹក្សាផ្ទាល់សម្តេចវិបុសសេនាភក្តី សាយ ឈុំ ប្រធានព្រឹទ្ធសភានិងជាប្រធានសហព័ន្ធកីឡាសីដក់ និងឈិនឡូនកម្ពុជានាព្រឹកថ្ងៃទី ១២ ខែធ្នូ ឆ្នាំ២០២៣ បានអញ្ជើញបិទវគ្គបណ្ដុះបណ្ដាលគណៈកម្មការរៀបចំការប្រកួតនៅទីស្នាក់ការគណៈកម្មាធិការជាតិអូឡាំពិកកម្ពុជា ដោយ ធ្វើ ឡើង ដើម្បីសម្រួចសមត្ថភាពមន្ដ្រី បច្ចេក ទេសរបស់ សហព័ន្ធ ដើម្បីត្រៀមរៀបចំការប្រកួត កីឡាសីដក់ ជ្រើស រើសជើងឯកថ្នាក់ជាតិ ឆ្នាំ២០២៣ ចាប់ពីថ្ងៃទី១៣ ដល់ថ្ងៃទី១៥ ខែធ្នូខាងមុខនេះ
លោកបណ្ឌិត មាស សារិន ប្រធានសហព័ន្ធកីឡាសីដក់ និងឈិនឡូនកម្ពុជាបានវាយតម្លៃខ្ពស់ចំពោះការខិតខំប្រឹងប្រឹងរៀបចំវគ្គបណ្តុះបណ្តុះបណ្តាល ក៏ដូចជាសិក្ខកាម ដែលជាមន្ត្រីអាជ្ញាកណ្តាល-ចៅក្រមដែលចូលរួមខិតខំក្រេបជញ្ជក់ចំណេះដឹង ដើម្បីយកទៅអភិវឌ្ឍវិស័យកីឡាសីដក់ និងឈិនឡូនកម្ពុជាឲ្យកាន់តែរីកចម្រើនបន្ថែមទៀត។

លោកប្រធានសហព័ន្ធចាត់ទុកថា វគ្គបណ្តុះបណ្តាល ក្រោមការគាំទ្រថវិកា របស់ក្រសួងអប់រំ យុវជន និងកីឡា នាពេលនេះ ជាការអភិវឌ្ឍកម្រិតសមត្ថភាពឲ្យកាន់តែខ្ពស់បាន គឺត្រូវតែសិក្សាលើទ្រឹស្តីហើយត្រូវភ្ជាប់ជាមួយនឹងការអនុវត្តជាក់ស្តែងផងដែរ។ មុនការប្រកួតនានា សហព័ន្ធ តែងតែបើកវគ្គបណ្តុះបណ្តាលជាមុនសិន ដើម្បីពង្រឹងសមត្ថភាពមន្ត្រីបច្ចេកទេសឲ្យកាន់ តែល្អប្រសើរបន្ថែម។ នៅពេលខាងមុខឆាប់ៗនេះ សហព័ន្ធកីឡាសីដក់ និងឈិនឡូន កម្ពុជានឹងរៀបចំការប្រកួតជើងឯកថ្នាក់ជាតិរបស់ខ្លួន ប្រចាំឆ្នាំ២០២៣ នៅភ្នំពេញ។

កញ្ញា សួង ចាន់តូរ៉ាទី អគ្គលេខាធិការស្តីទីសហព័ន្ធកីឡាសីដក់ និងឈិនឡូនកម្ពុជា បញ្ជាក់ថា យោងតាមផែនការកសាងធនធានមនុស្សរបស់សហព័ន្ធកីឡាសីដក់ និងឈិនឡូន កម្ពុជា និងដោយមានការអនុញ្ញាតជាគោលការណ៍របស់លោកប្រធាន សហព័ន្ធកីឡាសីដក់ និងឈិនឡូនកម្ពុជា គណៈកម្មធិការប្រតិបត្តិរបស់សហព័ន្ធកីឡាសីដក់ និងឈិនឡូនកម្ពុជា សហការជាមួយក្រសួងអប់រំ យុវជន និងកីឡា។
ការរៀបចំបើក

វគ្គបណ្តុះបណ្តាលអាជ្ញាកណ្ដាល-ចៅក្រម កីឡាសីដក់ថ្នាក់ជាតិ ចាប់ពីថ្ងៃទី៧-១២ ខែធ្នូ ឆ្នាំ២០២៣ ដោយមានសិក្ខាកាម ចំនួន៣១នាក់ ក្នុងនោះមានស្រី្ត ២១ នាក់។ ចំពោះការវាយតម្លៃនៃការសិក្សារួមមាន៖ និទ្ទេសល្អណាស់ ២៥ ភាគរយ ល្អ ៤០ ភាគរយ មធ្យ ២៥ ភាគរយ និងនិទ្ទេសមធ្យម ១០ភាគរយ។

សូមបញ្ជាក់ថា វគ្គបណ្តុះបណ្តាលអាជ្ញាកណ្តាល-ចៅក្រមថ្នាក់ជាតិ ឆ្នាំ២០២១នេះ ផ្តោតសំខាន់ការសិក្សាលើលក្ខន្តិកៈរបស់សហព័ន្ធកីឡាសីដក់ និងឈិនឡូនកម្ពុជា, ការបង្កើតអង្គការកីឡា, តួនាទី ភារកិច្ចរបស់អាជ្ញាកណ្ដាល-ចៅក្រម (បានអនុវត្តន៍ផ្ទាល់នៅ លើទីលាន), សិក្សាអំពីបទបញ្ជានៃល្បែងកីឡាសីដក់ និងការរៀបចំព្រឹត្តិការណ៍ កីឡាផងដែរ៕