គ្រោះថ្នាក់ចរាចរ រវាងម៉ូតូ និងរថយន្ត ស្លាប់បុរសម្នាក់

កណ្តាល៖ ស្នងការដ្ឋាននគរបាលខេត្តកណ្តាល បានឲ្យដឹងថា ករណីគ្រោះថ្នាក់ចរាចរ ផ្លូវគោករវាង ម៉ូតូ និងរថយន្ត
កើតហេតុនៅថ្ងៃចន្ទទី២៩តុលា២០១៨ វេលាម៉ោង ២២ : ៤៥ នាទី នៅលើផ្លូវជាតិលេខ១ ចន្លោះគីឡូម៉ែត្រ ២៧-២៨ ចំណុចភូមិ ខ្សុំ ឃុំបន្ទាយដែក ស្រុកកៀនស្វាយ ខេត្តកណ្តាល បណ្តាលឲ្យស្លាប់ ១នាក់ ភេទប្រុស និងខូចខាតម៉ូតូ១ គ្រឿង។

ប្រភពដដែល បានបញ្ជាក់ពីរឿងហេតុនេះថា កាលពីថ្ងៃនិងវេលាកើតហេតុខាងលើ មានម៉ូតូ១គ្រឿងម៉ាក HONDA Dream ស៊េរី២០១១ ពណ៌ខ្មៅ ពាក់ស្លាកលេខ ភ្នំពេញ ១BC-៦៤៨៨ បើកបរដោយឈ្មោះ រិន វណ្ណដេត ភេទ ប្រុស អាយុ ២០ ឆ្នាំ ស្លាប់ មានទីលំនៅភូមិដីឥដ្ឋកោះផុស ឃុំដីឥដ្ឋ ស្រុកកៀនស្វាយ ខេត្តកណ្តាល បើកបរក្នុងទិសដៅពីអ្នកលឿងទៅភ្នំពេញ លុះពេលមកដល់ចំណុចកើតហេតុ ក៏បានបុកពីក្រោយរថយន្តធុនធំ (មិនស្គាល់អត្តសញ្ញាណ) ដែលឈប់មានទិសដៅស្របគ្នា បណ្តាលឲ្យស្លាប់អ្នកបើកម៉ូតូ នៅកន្លែងកើតហេតុ ចំណែកភាគីខាងរថយន្ត បានបើករត់គេចខ្លួនបាត់ ។
ករណីនេះបណ្តាលមកពីអ្នកបើកបរម៉ូតូ បើកក្នុងល្បឿនលឿនខ្វះការប្រុងប្រយ័ត្ន ៕