ត្រីសម្រាប់ធ្វើប្រហុកផ្អក ចាប់ផ្តើមត្រូវបណ្តើរៗហើយ តែខាងរដ្ឋបាលជលផល មិនទាន់ឃើញមានការជូនដំណឹង ស្តីពីការត្រូវត្រីសម្រាប់ធ្វើប្រហុក នៅឡើយ

ភ្នំពេញ ៖ បើយោងតាមការចេញផ្សាយព័ត៌មានលើហ្វេសប៊ុករបស់លោក ប៉ែន ខុន នៅថ្ងៃទី១៥ខែធ្នូនេះ បានឲ្យដឹងថា លោកម៉ូត ហូសាន់ អ្នកធ្វើអាជីវកម្មនេសាទត្រីតាមគន្លងដាយជួរលេខ៤ ដែលបានជួលពីរដ្ឋបាលជលផល នៅតាមដងទន្លេសាប ក្នុងភូមិសាស្ត្ររាជធានីភ្នំពេញ បានប្រាប់ឱ្យដឹងនៅថ្ងៃទី១៥ខែធ្នូថា ត្រីសម្រាប់ធ្វើប្រហុកផ្អក(ត្រីរៀល) ឃើញមានវត្តមានត្រូវកើនឡើងនៅពីរថ្ងៃចុងក្រោយនេះ ដោយលើកឌុកម្តងក្នុងរយៈពេលកន្លះម៉ោងបានត្រីចម្រុះជិត២០គីឡូក្រាម។

អ្នកនេសាទខាងលើ និយាយឱ្យដឹងទៀតថា ប្រភេទត្រីធំដូចជាច្រកែង ត្រីកែ ប្រាខ្ចៅ ក៏នៅបន្តចាប់បានច្រើនដែរនៅព្រឹកនេះ។ ថ្ងៃស្អែក៤កើត លោកនឹងដូរពីឌុកឬស្សី ទៅជាលូស្បៃ ដើម្បីចាប់ត្រីសម្រាប់ធ្វើប្រហុកផ្អកវិញហើយ បន្ទាប់ពីឃើញប្រភេទត្រីស(ត្រីសម្រាប់ធ្វើប្រហុក) បានចុះមកច្រើននៅថ្ងៃនេះ។

លោកងិន ឌី នាយខណ្ឌរដ្ឋបាលជលផលភ្នំពេញ និយាយឱ្យដឹងដែរថា នៅផ្នែកខាងលើមិនទាន់មានដំណឹងថា ចាប់បានត្រីសម្រាប់ធ្វើប្រហុកផ្អកច្រើននៅឡើយទេ ហើយខាងរដ្ឋបាលជលផល ក៏មិនទាន់ឃើញមានការជូនដំណឹង ស្តីពីការត្រូវត្រីសម្រាប់ធ្វើប្រហុកនៅឡើយដែរ៕