ការប្រកួតកង់គួក និងកង់ភ្នំជើងឯកជាតិ នឹងពន្យារពេលដល់ដើមខែមករាឆ្នាំ២០២៤

ភ្នំពេញ៖បើតាមការឲ្យដឹងពីលោកនូចំរើនអគ្គលេខាធិការសហព័ន្ធកីឡាទោចក្រយានកម្ពុជាបោះថាត្រូវបានលើកពេលទៅធ្វើចាប់ពីថ្ងៃទី៥ដល់៨មករា២០២៤។
តាមការគ្រោងទុកការប្រកួទាំងកង់គួកទាំងកង់ភ្នំនឹងធ្វើនៅខេត្តកំពង់ឆ្នាំង។សកម្មភាពកង់នៅខេត្តកំពង់ឆ្នាំងមានភាពផុសផុលខ្លាំងខណៈផ្លូវជាតិលេខ៥និងផ្លូវនៅជុំវិញខេត្តក៏ស្រស់ស្អាតមានអំណោយផលដល់វិស័យកីឡាទោចក្រយាននោះ។

ចំពោះប្រភេទកង់ភ្នំក៏បានអាចរៀបចំនៅតំបន់ភ្នំនៃខេត្តកំពង់ឆ្នាំងបានស្របតាមលក្ខណៈបច្ចេកទេសបានល្អប្រសើរប្រហាក់ប្រហែលនឹងខេត្តសៀមរាបដែលធ្លាប់រៀបចំការប្រកួតជើងឯកថ្នាក់ជាតិរៀងរាល់ឆ្នាំផងដែរ។ ម្យ៉ាងទៀតខេត្តកំពង់ឆ្នាំងងាយស្រួលក្នុងការរៀបចំដោយសារជាខេត្តស្ថិតនៅចំណុចកណ្តាលងាយស្រួលមកពីរាជធានីភ្នំពេញហើយប្រតិភូកីឡារកីឡាការិនីមកពីបណ្តាខេត្តនានាក៏ងាយស្រួលដូចគ្នា។
លោកអគ្គលេខាធិការបញ្ជាក់ទៀតថាតាមរយៈការប្រកួតជើងឯកថ្នាក់ជាតិដែលជាព្រឹត្តិការណ៍បច្ចេកទេសកម្រិតខ្ពស់ជាងគេនៃថ្នាក់ជាតិនេះក៏នឹងអាចឱ្យអ្នកជំនាញបានវាស់ស្ទង់វាយតម្លៃឡើងវិញលើក្រុមកីឡាករ កីឡាការិនីជម្រើសជាតិកម្ពុជាផងដែរ ក្រោយពីបានរំសាយ ក្រោយបញ្ចប់ស៊ីហ្គេម លើកទី៣២ ឆ្នាំ២០២៣ ជាប្រវត្តិសាស្ត្រដំបូងនៅកម្ពុជា។

តាមរយៈព្រឹត្តិការណ៍នេះនឹងជ្រើសរើសកីឡាករកីឡាការិនីថ្មីៗដែលដណ្តើមបានសិទ្ធផលខ្ពស់ៗ ដើម្បីប្រមូលផ្តុំឡើងវិញ ក្នុងក្រុមជម្រើសជាតិទាំងប្រភេទកង់ភ្នំ និងកង់គួក សម្រាប់ឆ្នាំ២០២៤ខាងមុខ។
ព្រឹត្តិការណ៍ប្រកួតនេះអាចដំណើរការទៅបានក្រោមគម្រោងថវិកាគាំទ្ររបស់ក្រសួងអប់រំយុវជននិងកីឡាដោយសហព័ន្ធសហការជាមួយសាលាខេត្តកំពង់ឆ្នាំងនឹងរៀបចំការប្រកួតកីឡាទោចក្រយានជើងឯកថ្នាក់ជាតិឆ្នាំ២០២៣។
វិញ្ញាសាប្រកួតមានចំនួន៧រួមមានប្រភេទកង់គូកវិញ្ញាសាកង់គួកបុរសថ្នាល,កង់គួកបុរសឈុតធំ,កង់គួកបុរសនិងប្រភេទកង់ភ្នំមានដូចជាវិញ្ញាសាកង់ភ្នំបុរសថ្នាល,កង់ភ្នំបុរសឈុតធំ, កង់ភ្នំនារី និងកង់ភ្នំបុរស។ចំពោះការទទួលពាក្យចូលរួមប្រកួតកំពុងទទួលរៀងរាល់ថ្ងៃ នឹងបិទបញ្ចប់ត្រឹមថ្ងៃទី២៩ខែធ្នូឆ្នាំ២០២៣នៅទីស្នាក់ការសហព័ន្ធកីឡាទោចក្រយានកម្ពុជា ដែលស្ថិតនៅក្នុងអគារគណៈកម្មាធិការជាតិអូឡាំពិកកម្ពុជា ៕