ម៉ូតូនិងរថយន្តបុកគ្នាស្លាប់ម្នាក់

កណ្តាល៖ នគរបាលស្រុកមុខកំពូល បានឲ្យដឹងថា រណីគ្រោះថ្នាក់ចរាចរណ៍ផ្លូវគោករវាងម៉ូតូនិងរថយន្ត កើតហេតុនៅ ថ្ងៃអង្គារ ទី៣០ ខែតុលា ឆ្នាំ២០១៨ វេលាម៉ោង៨និង២៥នាទី លើផ្លូវជាតិ លេខ៦ចន្លោះគីឡូមែត្រលេខ៣៩-៤០ ចំណុច ភូមិកំពង់ប្រាសាទ ឃុំស្វាយអំពារ ស្រុកមុខកំពូល ខេត្តកណ្តាល បណ្ដាលអោយស្លាប់មនុស្ស១នាក់ ភេទប្រុស ខូចខាត ម៉ូតូ១គ្រឿង និងរថយន្ត១គ្រឿង ។

នគរបាល បានបញ្ជាក់សភាពរឿងហេតុថា កាលពីថ្ងៃនិងវេលាកើតហេតុខាងលើ មានម៉ូតូមួយគ្រឿង ម៉ាកហុងដាC១០០ ពណ៌ខ្មៅ ពាក់ផ្លាកលេខ រ២៥២៨ភ.ព១ បើកបរដោយឈ្មោះ ស្រី ហ៊ិន ភេទ ប្រុស អាយុ៧២ឆ្នាំ មានទីលំនៅភូមិ ស្វាយអំពារ ឃុំស្វាយអំពារ ស្រុកមុខកំពូល ខេត្តកណ្ដាល (មានពាក់មួកសុវត្តិភាព) ធ្វើដំណើរពី ត្បូងទៅជើង លុះមកដល់ចំណុចកើតហេតុបានបត់ឆ្វេងឆ្លងផ្លូវទៅទិសខាងលិច ស្របពេលនោះរថយន្តមួយ គ្រឿងម៉ាកសាំយ៉ុង ពណ៌សំបកឪឡឹក ពាក់ផ្លាកលេខ ភ្នំពេញ២Z-៣៩៨១ បើកបរដោយឈ្មោះ ដួង ដារិទ្ធ ភេទប្រុស អាយុ៣១ឆ្នាំ មានទីលំនៅភូមិព្រែកសង្កែ ឃុំពាមកោះស្នា ស្រុកស្ទឹងត្រង់ ខេត្តកំពង់ចាម ធ្វើដំណើរពីជើងទៅត្បូង ក្នុងល្បឿនលឿនបានមកបុកម៉ូតូរបស់ជនរងគ្រោះបណ្ដាលអោយស្លាប់នៅកន្លែងកើតហេតុ ក្រោយមករថយន្តបង្កព្យាយាមបើករត់គេច តែត្រូវបានសមត្ថកិច្ចឃាត់បាននៅចំណុចស្ពានលេខ៧តែម្តង ។

នគរបាលបានសេចក្ដីសន្និដ្ឋានថា គ្រោះថ្នាក់នេះ បណ្តាលមកពីអ្នកបើកបររថយន្តម៉ាកសាំយ៉ុង បើកបរល្បឿនលឿនក្នុងទីប្រជុំជនខ្វះការប្រុងប្រយ័ត្ន ៕