អ្នកអភិរក្ស រកឃើញសម្បុក អកត្រីក្បាលប្រផេះ ៨សម្បុក នៅក្នុងតំបន់ រ៉ាមសារស្ទឹងសែន និង តំបន់រ៉ាមសារបឹងទន្លេឆ្មារ

ភ្នំពេញ- អង្គការជីវិតធម្មជាតិនៅកម្ពុជាបានឱ្យដឹងថា៖ក្នុងរដូវកាលពងកូនថ្មីដែល គិតមកត្រឹមបំណាច់ខែធ្នូ ឆ្នាំ ២០២៣នេះសម្បុកអកត្រីក្បាលប្រផេះចំនួន៨ហើយត្រូវបានរកឃើញនៅក្នុងតំបន់រ៉ាមសារស្ទឹងសែន និងតំបន់រ៉ាមសារបឹងទន្លេឆ្មារ។
ប្រភពដដែលនេះបានឱ្យដឹងថា៖ ក្នុងចំណោមសម្បុុកអកត្រីក្បាលប្រផេះចំនួន៨នេះមាន៦ជាសំបុកថ្មី និង ២ជាសម្បុកចាស់។ អកត្រីក្បាលប្រផេះត្រូវបានចាត់ថ្នាក់ថាជាប្រភេទជិតរងការគំរាមកំហែងខ្លាំងក្នុងបញ្ជីក្រហម IUCN ដោយសារកត្តាបាត់បង់ទីជម្រក ការថយចុះនៃប្រភពចំណី និងសកម្មភាពរំខានរបស់មនុស្ស។ វត្តមានសម្បុកពងកូនរបស់សត្វនេះ សបញ្ចាក់ថាតំបន់រ៉ាមសារសារស្ទឹងសែន និងតំបន់រ៉ាមសារបឹងទន្លេឆ្មារដែលស្ថិតក្នុងទន្លេសាបកំពុងដើរតួដ៏សំខាន់ក្នុងការគាំទ្រការរស់រានមានជីវិតរបស់សត្វអកត្រីក្បាលប្រផេះនេះ។
សូមបញ្ជាក់ថា៖ អកត្រីក្បាលប្រផេះ ជា ប្រភេទសត្វ មានមាឌធំ កវែងជាងអកដទៃ ក្បាលប្រផេះ សំបុរត្នោតចាស់ ចុងកន្ទុយខ្មៅ ពោះ និងកន្ទុយស ដើមទ្រូងពណ៌ឈាមជ្រូក ស្លាបផ្នែកក្រោមពណ៌ខ្មៅ។
ដោយឡែកសម្រាប់ទីជម្រក ភាគច្រើនរស់នៅតាមត្រពាំង ព្រៃលិចទឹក ទន្លេធំៗ ហើយមានគ្រប់ទីកន្លែង និងជាបក្សីមានដោយកម្រ។ បក្សីនេះ ធ្វើការបន្តពូជចាប់ពីខែវិច្ឆិកា ដល់មីនា៕ សំរិត