សមត្ថកិច្ចបញ្ជាក់ថា ជនរងគ្រោះម្នាក់ ត្រូវបានគេបោកបញ្ឆោត ឲ្យថតរូបសម្តែងធ្វើទារុណកម្ម ក្នុងរូបភាពជម្រិតទារប្រាក់ ដើម្បីទារប្រាក់ពីឪពុកម្តាយនៅប្រទេសចិន ប្រហែល ៣៣ម៉ឺនដុល្លារ មិនមានពាក់ព័ន្ធករណីជំរិតទារប្រាក់នោះទេ

ភ្នំពេញ ៖ អគ្គនាយកដ្ឋានអន្តោប្រវេសន៍ បានឲ្យដឹងថា នៅថ្ងៃទី២៨ ខែធ្នូ ឆ្នាំ២០២៣ វេលាម៉ោង ១១ និង៥០នាទីថ្ងៃត្រង់ អគ្គនាយកដ្ឋានអន្តោប្រវេសន៍បានទទួលពាក្យបណ្តឹងអន្តរាគមន៍តាមរយៈប្រពន្ធទូរស័ព្ទ GDI Hotline ពីជនជាតិចិនឈ្មោះ XIA LINFAN ភេទប្រុស ត្រូវជាឪពុករបស់ជនរងគ្រោះឈ្មោះ XIA TIAN ភេទប្រុស ជាសិស្សកំពុងសិក្សានៅប្រទេសអូស្ត្រាលី ត្រូវបានក្រុមចាប់ជំរិតបោកបញ្ឆោតឲ្យធ្វើដំណើរមកប្រទេសកម្ពុជា កាលពីថ្ងៃទី២៤ ខែធ្នូ ឆ្នាំ២០២៣ ហើយបង្ខំឲ្យធ្វើលិខិតខ្ចីប្រាក់ ដើម្បីជំរិតទារប្រាក់ពីសាច់ញាតិជនរងគ្រោះ ចំនួន ២,៣៤៤,០០០(លុយចិន) ប្រហែល ៣៣ម៉ឺនដុល្លារអាមេរិក។

បន្ទាប់មក ឪពុករបស់ជនរងគ្រោះបានមកដាក់ពាក្យបណ្តឹងផ្ទាល់នៅអគ្គនាយកដ្ឋានអន្តោប្រវេសន៍ ដើម្បីស្នើសុំជួយអន្តរាគមន៍។
ក្រោយពីធ្វើការស្រាវជ្រាវអគ្គនាយកដ្ឋានអន្តោប្រវេសន៍ បានស្វែងរកឃើញជនរងគ្រោះ នៅវេលាម៉ោង ១៥ និង០០នាទីរសៀល នាថ្ងៃដដែល នៅសណ្ឋាគារបាលី ស្ថិតនៅបន្ទប់៣៣៧ នៃសណ្ឋាគារ Bali Hotel ភូមិទ្រុងមាន់ សង្កាត់អូរបែកក្អម ខណ្ឌសែនសុខ រាជធានីភ្នំពេញ និងបានពិនិត្យឃើញមានបង់រុំរបួសប្រឡាក់ពណ៌ក្រហម (សង្ស័យសម្តែង) បន្ទាប់មកបានអញ្ជើញជនរងគ្រោះមកធ្វើការសាកសួរបន្ត នៅអគ្គនាយកដ្ឋានអន្តោប្រវេសន៍។

យោងតាមការសាកសួរ ជនរងគ្រោះត្រូវបានគេបោកបញ្ឆោត ឲ្យថតរូបសម្តែងធ្វើទារុណកម្ម ក្នុងរូបភាពជម្រិតទារប្រាក់ ដើម្បីទារប្រាក់ពីឪពុកម្តាយនៅប្រទេសចិន មិនមានពាក់ព័ន្ធករណីជំរិតទារប្រាក់នោះទេ។

ជាមួយគ្នានេះ អគ្គនាយកដ្ឋានអន្តោប្រវេសន៍ សូមអំពាវនាវដល់ជនបរទេសទាំងអស់ កុំឲ្យមានការយល់ច្រលំថា ព្រះរាជាណាចក្រកម្ពុជាជាគោលដៅក្នុងការរត់ពន្ធមនុស្ស ឬចាប់ជម្រិត និងសូមកុំយកព្រះរាជាណាច្រកម្ពុជា ធ្វើជាទីតាំងសម្រាប់ប្រព្រឹត្តបទល្មើសដោយលួចលាក់ ឬអំពើណាមួយដែលធ្វើឲ្យប៉ះពាល់ដល់កេរ្ត៍ឈ្មោះរបស់កម្ពុជា លើឆាកអន្តរជាតិ៕