អភិបាលរាជធានីភ្នំពេញ ចេញលិខិតជូនពរ សូមគោរពជូន សម្តេចអគ្គមហាសេនាបតីតេជោ ហ៊ុន សែន ប្រធានឧត្តមក្រុមប្រឹក្សាព្រះមហាក្សត្រ និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នៃចំណងអាពាហ៍ពិពាហ៍ខូប ៤៨ ឆ្នាំ
ភ្នំពេញ ៖ ក្នុងឱកាសប្រកបដោយសិរីមង្គលប្រសើរថ្លៃថ្លា នៃចំណងអាពាហ៍ពិពាហ៍ខូប ៤៨ ឆ្នាំ របស់ សម្តេចអគ្គមហាសនាបតីតេជោ ហ៊ុន សែន ប្រធានឧត្តមក្រុមប្រឹក្សាព្រះមហាក្សត្រ និង សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលនឹងប្រព្រឹត្តទៅនៅថ្ងៃសុក្រ ៩រោច ខែមិគសិរ ឆ្នាំថោះ បញ្ចស័ក ព.ស.២៥៦៧ ត្រូវនឹង ថ្ងៃទី៥ ខែមករា ឆ្នាំ២០២៤ ខាងមុខនេះ ក្នុងនាមក្រុមប្រឹក្សា គណៈអភិបាល ថ្នាក់ដឹកនាំគ្រប់លំដាប់ថ្នាក់ មន្ត្រីរាជការ កងកម្លាំង ប្រជាពលរដ្ឋទាំងអស់ក្នុងរាជធានីភ្នំពេញ និងក្នុងនាមខ្ញុំបាទផ្ទាល់ យើងខ្ញុំទាំងអស់គ្នា សូមសម្ដែងនូវអំណរសាទរ និងសូមគោរពចូលរួមជូននូវសព្ទសាធុការពរជ័យ ដោយស្មោះអស់ពីដួងចិត្ត។
ជាការពិតណាស់ ក្នុងចំណងអាពាហ៍ពិពាហ៍ជាអមតៈ របស់សម្តេចតេជោ ហ៊ុន សែន និង សម្ដេចកិត្តិព្រឹទ្ធបណ្ឌិត ទោះបីត្រូវបានចាប់ផ្តើមឡើងក្នុងគ្រាដ៏សែនកម្សត់ ដែលពោរពេញទៅដោយការលះបង់ខ្ពស់បំផុត ប៉ុន្ត ក្រោមគំរូវីរភាពដឹកនាំ ប្រកបដោយភាពឈ្លាស់វៃ ប៉ិនប្រសប់ និងគតិបណ្ឌិត សម្ដេចទាំងទ្វេ បាននាំយកមាតុភូមិកម្ពុជា ឱ្យទទួលបាននូវ “សន្តិភាព” ពេញបរិបូរណ៍ និងការអភិវឌ្ឍលើគ្រប់វិស័យ ជាពិសេសការស្តារកិត្តិយស និងកិត្យានុភាព កម្ពុជា ឱ្យកាន់តែមានភាពល្បីរន្ទឺសុះសាយជាបន្តបន្ទាប់ទៅក្នុងតំបន់ និងពិភពលោក ប្រកបដោយក្តីមោទនភាពបំផុត សម្រាប់ប្រជាជនកម្ពុជាគ្រប់រូប៕